‘Vakainhu longeni noudiinini’ - Shekudja
Elenga ekulunhu mElelo lopamifyuululwakalo laMbadaja, Hiteni Shekudja okwa kumaida ovakainhu va longe noudiinini opo va kufe ondjala momaumbo nomoshilongo ashishe.
Okwa lombwela yo ovakainhu vaha kale ve litonya ndele tambule nomaoko aeshe eemhito douleli odo tadi holoka po, kutya nee omomalelo opamifyuululwakalo ile omelelo lopapolitika.
Okwe lipopya ye mwene ta ti oha longo oye aeke omukainhu mokati kovalumenhu vahapu melelo lopamifyuululwakalo laMbdaja, ashike ota wanifa po oilonga yaye nawa ngaashi omalenga makwao.
“Oita yovakainhu nai twikile, efindano oli li komesho,†osho a ti.
Shekudja okwa li ta popi poshoongalele sha li sha longekidwa kevava lovakainhu moSwapo (SPWC) sha ningilwa mOnandjaba mOkalongo mOlomakaya okudimbuluka efiku lovakainhu mounyuni olo hali tyapulwa momafiku 8 March odula keshe. Hamushanga wopedu woSPWC Eunice Iipinge oye a li omupopi a fimana wefiku.
Poshoongalele opa kalwa yo komuunganeki woSPWC moshitukulwa shaMusati, Rakel Shoopala, na kahewa kaye Lucia Nghaamwa wokOhangwena; kansela woshikandjohoololo shaKalongo Elizabeth Mwanyangapo, omuunganeki woSwapo mOkalongo Lamek Mwanyangapo, elenga ekulunhu laMbadja Mathias Walaula nengafifi linene loomeme nomalomaloma ovalumenhu.
Ebba Kandjaba na Lesian Neliwa ova li noshinakuwanifwa shokuyandja eedjapo da sheywa kovanangeshefa vonhumba nokovanhu oohandimwe, ovo tava pandulwa molwaashi hava yambidida oivilo mOkalongo opo i ende nawa.
Kandjaba, oo e li omuhongifikola ha longo ounangeshefa, okwa ti ongeshefa oyo i kwete oshiwana shaashi oyo tai eta omayakulo popepi noshiwana.
“Moimaliwa oyo hatu lande nayo meengeshefa, omo hamu kufwa oimaliwa oyo hatu yambididwa nayo kovanangeshefa ngeenge tu na oivilo yoludi ngaashi eli,†osho a ti ngaho.
Okwa kunghilila ovanangeshefa ava va pewa eedjapo vehe ke di tule koshi yeekofa ndele ve ke di leke meengeshefa davo ile meeseti momaumbo avo opo di monike kovanhu, vo va monike yo nokutya vo oilyo yoSwapo nohava yambida oSwapo. Omuwiliki woomeme mOkalongo Netumbo Kaanduka okwa pandula eshi oshikandjohoololo shaKalongo sha hoololwa omo mu danenwe efiku lovakainhu mounyuni neudo.
Comments
Namibian Sun
No comments have been left on this article