Epangelo na li tule miilonga ooveta dhoondando yevi

Epangelo olya pulwa opo li tule miilonga oompango dhoka tadhi kwatele komeho oondando dhevi moshilongo. Eindilo ndika olya ningwa koshilyo shomutumba gwelelo lyoNational Youth Council, Natangwe Ithete, pethimbo kwa tulwa miilonga okambo taka ithanwa ‘Intergeneration Dialogue: Youth and Land’. Etulo miilonga lyokambo hoka oya ningwa sha landula olopota ndjoka ya pitithwa muFebruali kutya oofamili owala 73 dha tulululwa kepangelo pethimbo lyoshikakomvula sha piti na oofamala owala 18 dha landwa kUuministeli wOmavi nOmatulululo. Pahapu dha Ithete, aakwashigwana oyendji otaya iyadha yaana evi molwaashoka evi olya kuthako kaakengeli oshowo kaazaizai. Okwati, epangelo olya pumbwa okutula miilonga omikalo dhoka tadhi vulu okukwatela komeho oondando dhelando lyevi moNamibia. “Nonando ota tu kondjo opo tu mone evi moshilongo, aantu yetu oyendji otaya iyadha momalukanda nomoluhepo. Ngele inatu kotoka onkalo ndjika otayi ka e ta uupyakadhi uunene moshilongo shetu,” Ithete ta ti. Ithete okwa longitha ompito ndjoka mokuholola euvo nayi lye moprogramma yetulululo lyaakwashigwana, ndjoka otaku hololwa kutya oya tululula owala aanyasha yakalelapo oopresenda 1. “Omuyalu nguka oguli pevi noonkondo noshindji osha pumbwa natango okuningwa opo ku endelelithwe omukalo ngoka. Ota tu vulu ngiini okutsa omukumo aantu yetu mboka kaaye na evi opo yakale ye na einekelo ngele nani kaye na evi nenge omagumbo gawo yene,” Ithete ta pula. Sho a popi poshituthi sha faadhana, Ominista yEvi Alpheus !Naruseb okwati, oonkundathana dhoka dha ningwa muFebruali odha tothamo iitsa ya simana kombinga yoshikumungu shaanyasha nevi naashoka osha ningi oshikundathanwa oshinene pokati kepangelo naakuthimbinga ayehe moshikumungu shoka. Minister okwati, aanyasha oya pumbwa okudheulwa nokupewa owino yiikumungu yi na sha nevi opo owala taku vulu woo okukandulwapo uupyakadhi wompumbwe yevi mokati kaanyasha yaNamibia. “Ota tu indile oNational Youth Council yi tsikile nokutothamo omikundu ndhoka dha taalela oshikondo shoka oshowo okutaambako omaupyakadhi ngoka ga taalela aanyasha yaNamibia,” !Naruseb ta ti. OVENDUKA FAITH SANKWASA