Emino lyoshimongwa: Oshigwana sha ndjika oonyala mevi

Ominista yOmidhingoloko Pohamba Shifeta oya popi kutya omahala gopaushitwe kehe ga gamenwa naga simanekwe nomayambulepo kehe taga ningwa momahala ngoka naga ningweape na ezimino lyoshigwana. Shifeta okwa popi ngaaka pethimbo a talelepo mEtitano lya piti aakwashigwana yomOtjivalunda oshowo Iipumbu yaTshilongo Community Conservancy, poshigongi shoka sha ningilwa momukunda Eengombe mUuvudhiya, omolwa oonkambadhala tadhi ningwa opo ku ningwe omina yoshimongwa mehala moka.Aakwashigwana mboka ya tokola okugamena ehala lyawo na oyeli ompinge nomina ndjoka, natango oya holola omaiyuvo gawo kutya itaya popile emino lyoshimongwa okuza mekango lyomongwa ndyoka tali adhika momudhingoloko gwawo. “Nena ngele kape na otroma nena omakango ngoka itaga kala nomongwa, nomahangano gaakwashigwana otaga ka mona iihuna. Omakango ngoka ohaga nana aantu taya zi nomoAngola, mboka haya yambidhidha omahangano ngoka goshigwana. Itatu popile emino lyoshimongwa,” Nashumba Isak ngoka a popi pehala lyaakwashigwana yehala ndyoka lya gamenwa oshowo pehala lyokomitiye yUuvudhiya Constituency Development a popi. Otjivalunda, ehala tali adhika monooli yEtosha National Park, na oli na omakango gomongwa gaali Otjivalunda 1 mOtamanzi moshitopolwa shaMusati, oshowo Otjivalunda 2 mUuvudhiya. Omakango agehe ngoka gaali ogeli kohi yetonatelo lyElelo lyUukwambi. Pethimbo lyomutumba ngoka gwa ningwa mEtitano, Shifeta okwa tindi okupopya kombinga yeindilo ndyoka lya ningwa opo ku tamekithwe opoloyeka yemino lyomongwa, ta popi kutya monena oshikumungu shoka oshili oshinima shopaveta. Nonando ongaaka Shifeta okwa lombwele aakwashigwana kutya uuthemba wawo okutinda omayambulepo kehe ngoka tage ya gumu muuwinayi. “Ekotampango otali popi kutya kehe omayambulepo ngoka taga ningwa momahala gopaushitwe ga gamenewa naga ningwe pazimino lyoshigwana. Omuntu ita vulu owala okutameka okuninga omayambulepo gontumba omanga ina popya noshigwana. Oshigwana osha pumbwa okutota po ookomitiye dhomalelo dhoka tadhi kala nokuninga omatokolo pehala lyaakwashigwana momahala ngoka.”Ehangano ndyoka lya ningi eindilo ndyoka, lyoGecko Namibia, olya tindilwa onzapo yoenvironmental clearance certificate kuKomufala gwomidhingoloko, Teofilus Nghitila nomonena otaya pataneke etokolo ndyoka lya ningwa.Gecko Namibia (Pty) Ltd, okwa tameke omaindilo ge gemino lyoshimongwa okuza mekango ndyoka momvula 2012. Opoloyeka ndjoka oyi li uukumwe okupitila mehangano ndyoka li li oshitopolwa shoGecko Otjivalunda Holdings (Pty) Ltd, oli na mo oopresenda 50 dhiipambuliko mehangano lyOndonga-Uukwambi Mining Enterprises (Pty) Ltd (OUME), ndyoka olyo li na omukandapitiko gwokumina gwoiexclusive prospecting licence (EPL) 4365, ndjoka yi na uunene woohecta 20 650.Minista okwa gandja omayele kaakwashigwana mboka opo yatotepo okomitiye ndjoka tayi ya kalelepo moshikumungu shoka.Aakwashigwana mOtjivalunda oya tota po nale oIipumbu Ya Tshilongo Conservancy oshowo Ekango subcommittees opo ya pataneke emino lyoshimongwa momakango ngoka. Nonando opoloyeka ndjoka oya tindwa koshigwana, ope na aanapolotika mboka taye yi popile, na oya hala opoloyeka ndjoka yi pewe omulilo omuzizi.Okwa hololwa kutya konima nkene oshigwana sha tindi emino ndyoka muSepetemba gwo 2012, Elelo lyUukwambi olya tokola okukala itali holoka miigongi yokomitiye yehala ndyoka lya gamenwa. Aakwashigwana mboka yeli iilyo yokomitiye yehala ndyoka oya popi kutya Elelo lyUukwambi pamwe naNgoloneya gwaShana, Clemens Kashuupulwa, otaya yi pondje oompango, sho taya popile opoloyeka ndjoka. Shifeta okwa ningi woo omutumba nElenga lyUukwambi, Herman Ndilimani Iipumbu. MOmutumba ngoka gwa ningwa pwEengombe, Kashuupulwa okwa kalelwa po komugandjimayele gwe gwowina Michael Mwinga. Omukomeho gwoGecko Namibia Pine van Wyk okwali a popi omasiku ga piti kutya oya hala okutota ofaabulika yokulonga oothewa oshowo omina yomongwa. Van Wyk, okwa popi kutya momvula yo 2013, Gecko Namibia pamwe nOUME, oya yambidhidhwa koEnviro Dynamics, opo yangonge po oEnvironmental Impact Assessment (EIA) mo 2013, yi na sha niilonga yokumina oshimongwa mekango ndyoka. EIA oya gandjwa kuuministeli womidhingoloko momasiku ga 6 gaDesemba mo 2013, na komufala gwomidhongoloko okwa li tindi eindilo ndyoka pambelewa momasiku 24 gaJuli 2014.”Gecko Namibia okwa ningi eindilo lyokupataneka etindo ndyoka, momasiku ga 7 gaAguste 2014, na oya tegelela natango oshizemo.Nghitila okwa popi kutya emino ndyoka otali vulu okweeta eyonagulo kuushitwe, nokweetitha ekango ndyoka li kale kali na we omongwa.ILENI NANDJATO

Emino lyoshimongwa: Oshigwana sha ndjika oonyala mevi

Comments

Namibian Sun 2025-06-19

Please login to leave a comment

Emino lyoshimongwa: Oshigwana sha ndjika oonyala mevi

Comments

Namibian Sun 2025-06-19

Please login to leave a comment

Login