Elongo lyomauyelele nomakwatathano gopautekinika tali ende kashona mooskola

Ominista yElongo oya koleke kutya omulandu gwokuyambulapo omauyelele nomakwatathano gopautekinika mooskola dhomoNamibia otagu ende kashona ihe okwa popi kutya otaku ningwa oonkambadhala opo ku lundululwe onkalo ndjoka, ko kwaadhike omalalakano gegandjo lyuunongo mboka mokati kaanaskola.

Uuyelele mboka owa gandjwa kOminista yElongo, Katrina Hanse-Himarwa pethimbo a gandja oshipopiwa she shopashigwana kombinga yonkalo yelongo moshilongo oshiwike sha piti.

Aandungiki naatseyinawa yoompito dhiilonga oya kunkilile kutya uunongo nontseyo yomauyelele nomakwatathano gopautekinika oya pumbiwa mokumona iilonga oshowo pankalamwenyo, moomvula dhongashiingeyi.

“Aaniilonga ayehe otaya pumbiwa ya kale notseyo. Kaye shi owala aaniilonga ihe nomonkalathano ya kehe esiku uunongo mboka owa pumbiwa. Uuministeli wiikwameni oshowo uundjolowele otawu longitha omakwatathano gopautekinika onkene osha pumbiwa noonkondo uuministeli welongo wu dheule aanaskola moshikondo shoka,” Leo Svotwa, omukuluntuskola gwoTanben College ta ti.

Omukomeho gwoJobs Unlimited, Gerhard Jansen okwa zimine kutya kehe oompito yiilonga otayi pula ontseyo yokompiuta. Iilonga kehe naambyoka ino pumbwa okukala wa kuutumba komeho gokompiuta kehe esiku otayi pumbwa opo wu kale wu na ontseyo yeuveko lyopetameko lyokompiuta.”

Okwa popi kutya aakongi yiilonga mboka kaye na ontseyo yokompiuta otaya mono iihuna mokukonga iilonga.

Jansen okwa popi kutya mokukwashilipaleka egandjo lyuunongo mboka mooskola, naku kwashilipalekwe woo kutya aanaskola inaya longwa ooprogramma ndhoka oonkulu ano ihadhi longithwa we.

Minista okwa popi kutya nonando oshikondo otashi kondjo megandjo lyuunongo mboka, oye na elago molwaashoka konyala aakuthimbinga ayehe otaya kondjo mokuyambidhidha oshiyetwa po shoka.

Colette Rieckert, omukomeho gwoWindhoek Gymnasium, okwa popi kutya uunongo wokompiuta ngashiingeyi owafa owala uunongo welaka, na okwa gwedha po kutya kehe iilonga omuntu ta longo ihe oku na uunongo wokompiuta nena oku na ompito onene yuuwanawa.

Hanse-Himarwa okwa popi mEtitano kutya ooskola ndhoka dhi na iilongitho yomauyele nomakwatathano gopautekinika otadhi longo nuudhigu mokugandja uunongo mboka kaanaskola .

Shimwe shomwaamboka otayi etitha uupyakadhi nomukundu ngoka, ompumbwe yaalongi yadheuka moshilongwa shoka.

Omunambelewa omukomeho gwelongo lyoICT literacy and information and communications moNational for Educational Development (NIED), Olga Maartens okwa popi kutya omukundu gumwe otagu etithwa kompumbwe yookompiuta dha gwana mooskola.

Okwa popi kutya okupitila miilonga ye mbyoka yi li okugandja omadheulo miikwautekinika nomauyelele kaalongiskola moshilongo ashihe, oyendji itaya nyeyeta kombinga yompumbwe yuunongo ihe ompumbwe yiikwathitho yelongo moshilongwa shoka mooskola.

Okwa popi kutya nonando ongaaka ope na omilandu dhoka dha tulwa miilonga dha nuninwa okukandulapo omukundu ngoka.

Okwa popi kutya olundji aalongiskola otaya longo oshindji nonando ope na ompumbwe yiikwathitholongo, na otaya tsuwa omukumo opo ya konge omayele nomadhilaadhilo mokulongitha ookompiuta ndhoka nonando oonshona na itadhi gwana mooskola.

Pahapu dhe, aalongi otaya vulu okulongitha oongodhi dhopeke, ndhoka oyendji pamwe naanaskola ye na nale onga omukalo gwokulonga oshilongwa shoka.

Okwa popi kutya aalongi otaya vulu okulongitha oongodhi moshilongwa shoka nonando aanaskola inaya pitikwa okuya noongodhi dhawo dhopeke kooskola.

Maartens okwa popi kutya uuministeli otawu gandja woo iigongiilonga yi na sha nuunongo womauyelele nomakwatathano gopautekinika kaalongiskola pandondo yopaitopolwa, nokugandja omakwatho kaalongi nooskola miikumungu ya guma elongo lyomauyelele nomakwattahano gopautekinika.

JANA-MARI SMITH