Elelo lyaKahandja tali ka hanagulapo oombashu

Oombashu dhaali pamulandu otadhi hanagulwapo mOkahandja nonando inaku gandjwa esiku lya hugunina kooyene yoombashu dhaali pampango molukanda lwaFive Rand opo ya kale ya kutha po oombashu dhawo. Oombashu ndhoka odha tulwa omadhidhiliko kutya otadhi hanagulwapo. Konyala aakwanezimo ya thika po-100 otaya ka dhigwa kaa ye na omagumbo sho oombashu dhawo kwa tegelelwa dhi hanagulwepo momalukanda ga thika pugaali mOkahandja. Pahapu dhElelo lyOndoolopa yaKahandja, Omunambelewa Omukuluntu gwElelo lyOndoolopa ndjoka Frans Enkali, okwati, ehanagulepo lyoombashu dhoka olya nuninwa okuya moshipala eyopombanda lyomuyalu omunene gwoombashu dhaali pamulandu mondoolopa ndjoka. Enkali okwati, aakwashigwana inaya tseyithilwa natango esiku lyahugunina moka ye na okukala ya kuthapo oombashu dhawo ihe oombashu dhimwe odha pewa nale omadhidhiliko kutya otadhi kuthwapo. Enkali okwa lombwele oNamibian Sun kutya oombashu ndhoka otadhi kuthwapo molwaashoka odha tulwa pomahala mpoka dhili pwaahena epitikilo okuza kElelo lyOndoolopa. Okwati, ooyene yoombashu dhoka oya pula opo muni e ya pe ethimbo opo ya kale ya kuthamo iinima yawo manga. “MuDesemba gwo-2013 elelo lyondoolopa olya nkukilile aakwashigwana opo yiikaleke kokule nokutula oombashu dhawo pomahala mpoka inaya pewa omapitikilo kelelo. Yamwe oya taambako ekunkililo ndyoka omanga yamwe yeli dhini nokudhika oombashu dhawo. Shika oshetu thigi twaahena omukalo gumwe gwaaheshi ngoka gwokukuthapo oombashu ndhoka,” Enkali ta ti. Ongula yOlyomakaya oNamibian Sun oya talele po olukanda lwaFive Rand moka aakwashigwana yamwe ya popi kutya ekuthopo lyoombashu dhawo kali li pauyuuki molwaashoka ka ye na mpoka taya yi. Aakwashigwana yamwe oya popile kutya itaya popi ekuthepo lyoombashu dhawo molwaashoka oya futa nale oshimaliwa sha thika pooN$1 000 opo ya vule okupewa omeya nolusheno. “Onda kala nda tegelela olusheno uule woomvula odhindji monena. Onda li ndi na ehala ihe inandi pewa ompito opo ndi li landeko kumuni. Paife otandi yi peni? Ota tu lumbu monkalo ombwiinayi yaana omeya nolusheno. Otu li monkalo yaashi yopauntu molwaashoka ota tu thiminikwa opo tu longithe iihwa uuna eshito lya ithana. Ehanagulepo lyoombashu dhetu itali kala pauyuuki,” gumwe gwomaakwashigwana mboka ngoka a tindi okutumbulwa kedhina a popi. Omukashigwana gumwe okwa popi kutya uuna ombashu ye ya hanagulwapo nena otaka ya owala ketoto lyiiyagaya hoka taku ekelwahi iinima yawo nokutungulula ombashu ye. “Itandi kala ndaana egumbo. Ondi na okukala ndi na ehala ndyoka tandi ithana egumbo. Ehanagulepo lyombashu yandje itali yindje moshipala opo ndi tungulule natango ombashu yandje,” omukwashigwana ngoka a popi. Omukomeho gwEwawa lyAanyasha mOngundu yoSwapo, Elijah Ngurare, pethimbo a popitha oshigongi shoSwapo molukanda ndoka mOlyomakaya okwa popi kutya epangelo olya pumbwa oku gandja omahala gevi kaakwashigwana mboka na okwa pula aaleli ya hulithepo omukalo gwokuhanagulapo oombashu dhaakwashigwana. “Aantu ayehe mwakwatelwa mboka ye na oombashu molukanda lwaFive Rand oya pumbwa okupewa omahala omeya nolusheno oshowo omayakulo ageye gomalelo goondolopa,” Ngurare ta popi. OKAHANDJA FAITH SANKWASA