Ehafo Trust lya hala evi

KENYA KAMBOWE

Konima sho ya landitha po oshiltopolwa shawo shevi komiliyona 21 mo-2015 momudhingoloko gwaKlein Windhoek elelo lyEhafo otali kongo ehala mpoka tali vulu okulanda ehala epe.

Omunashipundi gwEhafo Board of Trustees, Andrew Matjila okwa lombwele oNamibian Sun kutya natango otaya kongo evi ihe ina yelitha kutya otaya ka mona ehala ndyoka muule wethimbo li thike peni.

Epangelo olya li lya tulilemo oshipotha elelo lyehangano ndyoka oomvula dha piti, pethimbo ehangano ndyoka lya li liipyakidhila nokulanditha po ehala ndyoka.

Elelo lyEhafo, lya thikama po muMatjila, Rolene Boer, Dora Lebereki-Thlababella, Paul Helmut, Walter Louw nehangano lyegameni lyomaliko lyoTIA Protection Service CC.

Sho a pulwa kombinga yoshipotha shoka, Matjila okwa popi kutya kape na oshipotha molwaashoka oshipotha shoka sha li po osho owala aantu mboka taya lumbu nuulema ya li ya indikwa okuya meni lyehala ndyoka lya landithwa po monena.

Oshikumungu shoka shepato lyehala ndyoka osha tameke mo-2007 konima sho ehangano ndyoka lya kala li na oondjo dhaantu dha thika pomiliyona 4 na itali vulu okufuta iimaliwa mbyoka, nenge okufuta aaniilonga. Omunashipundi gwehangao ndyoka okwa ka konga omakwatho kiikondo ya yooloka yepangelo.

Omuprima nale Nahas Angula okwa gandja ekwatho kehangano ndyoka, nomikuli dhaantu odha futwa.

Konima yiiwike iishona aaniilonga pamwe nomunashipundi gwehangano ndyoka oya koleke kutya otaya futwa kepangelo, sha landula etsokumwe ndyoka lya ningwa.

Okatokolitho ka ningwa ketsokumwe ndyoka, oka utha kutya uuna omikuli dha futwa nena omaliko gehangano ndyoka otaga lundululilwa kepangelo nepangelo otali ka tsikila nokufuta aaniilonga yehangano ndyoka.

Nonando ongaaka, omukalelipo gwehangano ndyoka miikwaveta Andreas Vaatz sho a pulwa kombinga yokatokolitho hoka okwa popi kutya ngele etsokumwe ndyoka inali shayinwa nena omaliko ngoka ogooyene yotango yehangano.

Vaatz, ngoka a kalelepo Ehafo Trust okutameka mo- 2012, okwa popi kutya natango okwa li kwa ningwa omutumba gumwe pokati kehangano ndyoka nuuministeli welongo, na okwa ningwa okatokolitho kutya kutya egandjo lyomaliko ngoka miikaha yepangelo itali ningwa we.

Sho a pulwa kutya omolwashike epangelo ya tsikile nokufuta oondjambi dhaaniilonga mboka okutameka o-2007 ihe inali hulitha po iifuta mbyoka sho okatokolitho ka ningwa, okwa yamukula kutya keshi kutya omolwashike na okuwete kutya ngiika epangelo otali kwathele aantu mboka taya lumbu nomaulema.

Mutjila okwa koleke koshifokundaneki shika kutya aantu mboka taya lumbu nomaulema oyeli taya futwa natango kepangelo okutameka mo-2007.