Edhipago lyoompanda dhaNamibia momapapa guukongo tali ngongotwa

ELLANIE SMIT

Uukongo woompanda dhaNamibia ndhoka oonduudhe oshowo edhipago lyoompanda ndhoka onga oshitopolwa shepapa ndyoka hali falwa koUS okuza moNamibia, owa nyana natango komahangano gopauyuni.

Enyano ndyoka ngashiingeyi olya ningwa koongundu dhegameno lyiiyamakuti muuyuni sha landula shoUS Fish oshowo Wildlife Service ya mono epitiko okuza komukengeli gwomoTexas opo ya fale koUS, epapa ndyoka okuza kompanda ndjoka a li a yaha omvula ya piti moNamibia.

Ehangano olya gandja etseyitho momasiku 20 gaSepetemba kombinga yehalo lyawo lyokugandja omukanda ngoka muule womasiku 10.



Omahangano ngaashi, oHumane Society of the United States, Humane Society International, Humane Society Legislative Fund and Centre for Biological Diversity momukanda ngoka ya pititha oya holola kutya epitiko ndyoka otali pataneke nokulyatela pevi egamenenepo lyiiyamakuti mbyoka ya gamenwa muAfrika.

Omahangano ngoka oga holola kutya edhipago lyoompanda ndhoka nokufala ooniga dhawo pondje yiilongo itashi gandja uuwananawa washa kiiyamakuti yoludhi ndoka.





Ompanda ndjoka yoomvula 27 oya yahwa komukongo gwaTexas, Lacy Harber ngoka a futu oshimaliwa shoomayovi ogendji kosafari club auction, opo a pewe epitiko lyokuyaha ompanda onduudhe moNamibia.

Omahangano gaali guukongo, lyoDallas Safari Club Foundation oshowo Conservation Force, oga landitha po omukanda ngoka gwedhipago lyompanda koshimaliwa shoo$275,000 muDesemba gwo 2016.

Omunamimvo 81 Harber okwa lopotwa a dhipaga ompanda ndjoka momasiku 27 gaFebruali moVeronica Game Lodge, ndjoka yi li kohi yekondololo lyoARU Game Lodges moNamibia.

Omunambelewa omutseyinanwa mooprograma dhiiyamakuti muuyuni, Iris Ho, okwa popi kutya omahangano goludhi ndoka inaga pumbwa okugandja omikanda dhepitiko lyedhipago lyiiyamakuti kaakengeli oohandimwe.

E yo pombanda lyuukongo woompanda moNamibia olya yi moshipala omapopyo kutya uukongo mboka ohawu gandja uuwanawa komahala ga gamenwa giiyamakuti.

Tanya Sanerib, ngoka e li omukomeho gwiikumungu yiikwaveta yopauyuni moCentre for Biological Diversity, okwa popi kutya kashi li mondjila okupupula komapepe nokutumbaleka aantu mboka taya dhipaga po iiyamakuti mbyoka ya pumba noonkondo na kayi li momwaalu omunene kombanda yevi.

Kuyele nuumvo, Harber okwa popi kutya ye ependafule kuNamibia molwaashoka okwa dhipaga ompanda ndjoka.

Okwa popi kutya ye ependafule kuNamibia na okwa pewa olupandu kepangelo lyaNamibia sho a yambidhidha mokuhupitha ompanda onduudhe. Namibia oha gandja ookota dhokudhipaga oompanda ntano kehe omvula koCites.

Omakonaakono gopaunongonono ohaga longithwa mokutala oompanda ndhoka dha nika oshiponga unene oondumentu nokudhi gandja po onga oshitopola shuukongo mboka, niimaliwa ohayi gandjwa koshiketha shoGame Trust Fund na ohayi longithwa miinyangadhalwa yomahala giiyamakuti ga gamenwa moshilongo, nenge moonkambadhala dhokukondjitha uukongo wiiyamakuti inawu pitikwa.

Nuumvo oompanda dhi li 20 odha dhipagwa moNamibia moka hetatu dhompampanda ndhoka dha dhipagwa dhili oompanda oontokele. Oompanda hamano odha dhipagwa momahala gopaumwene omanga mbali oontokele dha dhipagwa moshikunino shiinamwenyo shEtosha.

Omvula ya piti, oompanda 35 odha dhipagwa omanga oompanda 60 dha dhipagwa mo 2016 nomo 2014 omwa dhipagwa oompanda 56.

Shika kashi shi oshikando shotango onkalo yedhipago lyoompanda oonduudhe moshilongo tali nyanwa muuyuni.

Omukongo gwaTexas, Corey Knowlton momvula yo 2014 okwa landa epitiko lyokuyaha ompanda onduudhe moNamibia koshimaliwa shoo$350,000 okuza koDallas Safari Club naashoka osha li sha nyanwa muuyuni.