Dis feestyd op Ongwediva!

Catherine Sasman – Die Ongwediva Handelskou (OATF) sal weer ’n druk program oplewer met die jaarlikse geleentheid wat vanaf 21 tot 29 Augustus plaasvind en na verwagting meer as 100 000 besoekers sal lok.Teen Junie was alle stalletjies bespreek met ’n lang waglys van gretige uitstallers wat ook hoop om aan die groter wordende noordelike skou deel te neem. Die munisipaliteit van Ongwediva se skakelbeampte, mnr. Andreas Uutoni, het gesê alle uitstallers wat plek in die sale (die Queen-, King Kaulume- en die Headman-saal) bekom het, het ook reeds daarvoor betaal.Altesame 450 uitstallers neem vanjaar aan die OATF deel.“Enige besoeker kan in minder as twee ure al die uitstallers besoek. Daarom moedig ons almal om te kom en om die betowering saam te beleef,” het Uutoni gesê. Soos gebruiklik sal die meeste – indien nie alle – regeringsinstansies, insluitende semi-staatsinstellings, aan die skou deelneem.Uutoni het gesê hoe graag hulle ook sou wou, kan die aantal uitstallers nie meer word nie omdat die uitstalruimte dieselfde bly. “Sou ons meer uitstallers wou akkommodeer, sou ons van die parkeerterrein moet gebruik maak.” Die OATF lok elke jaar talle plaaslike en internasionale uitstallers. Een van die nuwe uitstallers is Golz Maschinenbau van Okahandja wat plaasimplemente verkoop. Uutoni het gesê aangesien die skou gedurende die skoolvakansie plaasvind, kan leerlinge wat verder wil studeer gerus die skou besoek om by ministeries en ander maatskappye aan te klop om oor studiebeurse navraag te doen. Daar word nie ’n groot opkoms vir die landbouskou verwag nie, weens bek-en-klouseer wat vroeër vanjaar in die noordelike streke uitgebreek het. “Daar bestaan selfs die moontlikheid dat ons geen lewende hawe sal uitstal nie,” het Uutoni gesê. “Die munisipaliteit van Ongwediva bied elke jaar die skou aan om ’n platform aan plaaslike ondernemings te bied waar hulle hul dienste en produkte aan die publiek kan bekend stel. Dit is ons nederige bydrae tot die plaaslike ekonomie,” het Uutoni gesê. Die rimpeleffek van die skou is plaaslike hotelle en ander verblyfgeriewe, vulstasies, winkels en opemarkte wat voordeel daaruit put. Hy het plaaslike besighede egter gemaan om gedurende die skou “redelike pryse” vir hul dienste te vra.“Die sukses van die skou en die verantwoordelikheid om professionele dienste aan besoekers te bied, berus in die hand van plaaslike besighede. Die OATF doen sy deel, maar die res hang van die plaaslike gemeenskap af.” Uutoni het gesê die hele Oshanastreek baat ook by die skou.In ’n poging om koste vir die aanbieding van die skou te besnoei, sal die OATF sekere dienste soos spyseniering, skoonmaak en sekuriteitsdienste aan plaaslike besighede kontrakteer. “Ons sal egter nie die gehalte en doeltreffendheid van hierdie dienste inkort nie,” het Uutoni onderneem. Sekuriteitsdienste sal 24 uur per dag oral op die terrein wees. “Ons uitstallers en besoekers kan gerus wees dat hul lewe en eiendom in goeie hande is,” het Uutoni gesê, en bygevoeg dat uitstallers reeds vanaf 20 Augustus hul produkte na die perseel kan bring. “Dit vrywaar hulle egter nie van die verantwoordelikheid om na hul eiendom om te sien nie. Hulle moet ook met die sekuriteitswagte saamwerk,” het Uutoni gemaan. Herstelwerk is die afgelope paar maande aan die sale onderneem. In die eerste fase is die dak van die Queen-saal vervang wat in 1990 gebou is. Die nuwe dak het N$610 000 gekos en is deur die plaaslike kontrakteur Dowie Construction CC gebou. In die tweede fase sal ventilasie in die sale verbeter word. Die OATF het egter nie vanjaar geld daarvoor beskikbaar gehad nie.

Dis feestyd op Ongwediva!

Comments

Namibian Sun 2025-05-02

Please login to leave a comment

Dis feestyd op Ongwediva!

Comments

Namibian Sun 2025-05-02

Please login to leave a comment

Login