Babi a kutha mo eindilo lyompangu lyomeendelelo

ELLANIE SMIT

OVENDUKA



Eindilo lyomendelelo mOmpangu yoPombanda ndyoka lya li lyatulwa mo kOmuprofeti Jackson Babi, opo etulo lye miipandeko omolwa iipotha yuukongo waaheli paveta mbyoka ta tamanekelwa yeekelwehi, olya kuthwamo mOmaandaha.

Eindilo ndyoka olya ningwa komukalelipo gwe gwopaveta, Kadhila Amoomo, momasiku gane gaJuni.

Mangestrata Linus Samunzala oshiwike sha piti, okwa gandja elombwelo opo Babi a tumwe koGobabis opo a ka holoke mompangu moshipotha shuukongo wiiyamakuti ya gamenwa. Okwa holoka mompangu na ota kala mondjeedhililo manga. Shoka osha ningwa konima sho a holoka momopangulilo yaVenduka oshiwike sha piti omolwa iipotha yokukala nooniga dhoompanda, ondjembo yuukongo yaahena ombaapila oshowo iikuti. Iipotha mbyoka iyali otayi kwatakanithwa.

Babi okwa tulwa miipandeko konima sho ooniga mbali dhoompanda dha adhika megumbo lye moKleine Kuppe, netulo lye miipandeko olya kwatakanithwa noompanda mbali dhoka dha adhika dha dhipagwa mofaalama tayi adhika popepi noGobabis momasiku 26 gaMei.

Otaku fekelwa kutya oompanda dhoka odha dhipagwa nondjembo yuukongo, nooniga ne odha kuthwako.

Babi oku li oshitopolwa shaafekelwa yahetatu mboka ya tulwa miipandeko omolwa oshipotha shoka.

Meindilo ndyoka a ningi, Amoomo okwa popi kutya ehadho lyegumbo lyaBabi ndyoka lya ningwa momasiku 28 gaMei kali li paaveta onkene etulo miipandeko lye ndyoka lya ningwa momasiku gaali ga Juni nali kuthwe oonkondo molwaashoka aniwa etulo lye miipandeko kali li nalyo paveta. Babi natango okwa hala ekwashilipaleko lyetulo mondjeedhililo ndyoka lya gandjwa kuSamunzala liikalekelwe.

Meindilo lye Babi okwa popi kutya okwa tulwa mipandeko momasiku 28 gaMei, kiilyo yoshikondo shoonzo dha gamenwa mOvenduka. Okwa popi kutya okwa tulwa owala miipandeko komafekelo naanambelewa mboka oya yi egumbo lye koonkondo nokuli hadha pwaahena omukanda okuza kompangu.

Okwa tindi kutya megumbo lye omwa adhika ooniga dhoompanda,ta popi kutya natango momasiku gaali gaJuni omanga a li mondjeedhililo okwa tulwa miipandeko natango, moshipotha shuukongo woompanda dha gamenwa.

Payamukuo lyomunambelewa omukonaakoni, John Hoaseb, oshikondo shawo osha gongele omauyelele kutya aantu yontumba oyali ye na ooniga dhoompanda na otaya kongo aalandi.

Okwa popi kutya iilyo yetanga lyawo yomeholamo oya tula miipandeko aafekelwa mOtjiwarongo, Onesmus Haufiku, Elias Nashivela, Uutoni Enos oshowo Mushitua Vaaruka.

Ooniga dhoka odha kwatwako nokonima yomapulaaapulo, osha etitha etulo miipandeko lyaafekelwa ya gwedhwa po mOvenduka.

Hoaseb, okwa popi kutya uuyelele owe ya falitha megumbo lyaNashivela, moka ya adha Alberto Mbwale oshowo Joseph Matheus.

Shoka natango osha falitha aanambelewa yomakonaakono megumbo li li moGolgota moKatutura, moka mwa li muna Frizans Dumeni Naululu.

Ethano lyondjembo yuukongo olya adhika kohi yetalashe lye.

Dumeni okwe ya fala megumbo li li moKleine Kuppe, lyaBabi, hoka kwa adhika okapakete kooniga dhoompanda.

Sha landula ekutho mo lyeindilo ndyoka, ompangu oya pula Babi a fute iifuta ayihe.

Iipotha iyali yaBabi otashi vulika yi ka tulwe mumwe, naahoka tayi ka pulakenenwa, otashi ka kala etokolo lyomupanguli-ndjai.