Auntie Nangy Oshi

Okwa hala ndi kuthe mo etegelelo Omumati gwandje ngoka a pendje etegelelo ota kondjitha ndje opo ndi li kuthemo. Onda lulilwa noonkondo meme, nandi ninge ngiini? Okukutha mo etegelelo moNamibia oshili oshimbuluma oshinene na oto vulu okutamanekelwa oshipotha shedhipago na owa pumba okulombwela omumati gwoye uuyelele mboka. MoNamibia omwa pitikwa owala okukuthwamo omategelelo uuna ku wetike kutya otali vulu okutula yina yokanona muupyakadhi naashika otashi ningwa koondohotola na ka shi shi owala etokolo lyayina yokanona mwene. Lombwela omulumentu gwoye kutya okuna oshinakugwanithwa shokukusila oshipwiyu pamwe nokanona keni hoka inaka valwa natango sigo uuna wa pulumutha oshinakugwanithwa shoka otashi tsikile. Ino pumbwa okulimbililwa molwaashoka moshilongo omuna iiputudhilo oyindji mbyoka hayi gandja omakwatho kaakiintu mboka yiiyadha yeli monkalo yafa yoye na oto vulu woo okumona ekwatho okuza kaahungimwenyo miipangelo yEpangelo. Okanona omagano omawanawa haga gandjwa kuKalunga onkene inatu pumbwa okulimbililwa nenge okukambadhala okudhipagapo omagano getu ngoka. Oha ningilendje omatilitho Ondi na omulumentu gwandje twa kala naye oomvula ndatu, ihe paife ota ningilendje omatilitho molwaashoka anuwa kandi mu hole we. Nandi ninge ngiini? Aluhe ohandi popi kutya ka pe na omuntu e na uuthemba wu vule wamukwawo, na ka pe na ngoka e na uuthemba okuningila mukwawo omatilitho kutya omu li mekwatathano lyopahole. Ngele omulumentu gwoye oteku ningile omatilitho nena ouna uuthemba okuya kopolisi opo wu ka tule mo oshipotha molwashoka okuningila omuntu omatilitho oshi li e yo pondje lyoompango dhoshilongo. Kombinga yohole yeni otashi vulika mukweni e na omalimbililo sheetithwa nando okomaihumbato goye pamwe iho ihumbata we ngaashi wali ho ihumbata ihe shoka itashi mu pe uuthemba e ku ningile omatilitho. Onawa wu kale omutumba nomulumentu ngoka e to mu hololele omaivo goye kombinga yohole yeni ngele ou wete shi li kutya ku mu hole we nena onawa wu mu lombwele oshili opo ku kale to manapo ethimbo lyamukweni omanga ku mu hole we ihe ngele ou wete kutya iteshi taamba ko nawa, konga omuntu wemwiinekela opo e kukwathele molwaashoka ondi wete shanika oshiponga okuya wuke mulombwele ongoye awike ngele nani oheku ningile nale omatilitho. Omathimbo gandje oga lunduluka Onda li handi yi komathimbo momasiku 19 omweedhi kehe ihe omweedhi nguka oga tameke momasiku 9, pamwe ondi na etegelelo. Ngele ouna etegelel itashi vulika wu ye komathgimbo ashike uuna owala pamwe pena epuko lya sha. Omolwa onkalamwenyo ya kehe esiku omathimbo getu otaga vulu okulunduka nokukala ito ga mono momasiku moka omo wiigilila okugamona. Iinima ngaashi ostress, elongitho lyomiti dhontumba nenge pamwe iingambekithi yoluvalo okutumbulapo owala yimwe po otayi vulu okweeta omalunduluko gomasiku moka ha tu mono omathimbo getu. Okuya miihuli inayi gamenwa oshimwe shomwaamboka hayi etitha omategelelwa inaga longekidhwa ngele owa yile miihulo inayi gamenwa na owa limbililwa onawa wu ye koshipangelo opo wu ka ningilwe omakonaakono ku talike ngele ouna etegelelo. Ina hala tuye momilalo Ondi na omukadhona gwandje ihe ngele tandi pula tu ye momilao ina hala nandi ninge ngiini? Kuna shoka to vulu okuninga mumati gwandje ngele mukweni ina pyakudhukwa natango okuya momilalo. Ohole ka yi shi owala okuya momilalo ihe okuuvako woo omaiuvo gayakwetu nokuga simaneka. Haantu atuhe hatu kala twa pwakudhukwa okuya momilalo mbala naaholike yetu naashika otashi uthwa komahalo getu nenge komaitaalo getu molwaashoka oshi li eyono koshipala shaKalunga okuya miihulo omanga aantu ka ye li mondjokana.