Amwele a pandula aagandjimayele ye

Mayola gwondolopa yaNdangw, Paavo Amwele okwa pandula noonkondo ongundu yaagandjimayele ye, ta popi kutya iinima otayi ende nawa mondoolopa ndjoka molwa ongundu ndjoka.

Mo2016 ondoolopa yaNdangwa oya ningi ondoolopa yotango okuulika ongundu tayi ithanwa A Team, konima sho Omupresidende Hage Geingob uulike ongundu yaagandjimayele ye moPaliamende yoshilongo, sha landula sho a yi oshipundi mo 2015. Amwele okwa popi kutya ongundu yaagandjimayele ye aaiyambi mboka ye na oshisho nondooopa yaNdangwa na oya hala okuyambulapo ondoolopa ndjoka.

Elelo lyondoolopa olya ulike aagandjimayele ye li 17 miikondo ngaashi uundjolowele, omaudhano, ongeshefa, elongo, aanyasha oshowo uukwambepo mwakwatelwa nomithigululwakalo.

Koshikondo shuundjolowele oku na Helaria Nautende naDr Akutu Munyika.

Omudhano oku na Fire Vatilifa oshowo Mirjam Naanda, omanga kongeshefa ku na John Akapandi Endjala, Andreas Ngula naRobby Amadhila. Kelongo oku naEnos Namupala naWalde Shapaka, omanga kaanyasha ku na Ester Sakaria oshowo Ngolo Nakale.

Hilma Negumbo naJulia Kapia oye li aatseyinawa miikumungu yuukashike kookantu.

Kuukwambepo Omusita Stefanus Shingwedha oshowo Omusita Lamek Nambahu. Eino ShondAili Amutenya naHilma Shipena Ngula taya kwathele miikumungu yopamuthigululwakalo.

Ongundu ndjoka okwa hololwa kutya ohayi tsakanene aluhe nokugandja omagwedhelelo kelelo lyondoolopa. Amwele okwa popi kutya omahwahwameko gokuwapaleka ngoka haga ningwa mondoolopa ndjoka kehe omvula ngashiingeyi, ogeli oshiyetwapo shongundu ndjoka.

Ongundu yaanawino mboka oya tseyithwa lwotango momasiku 14 gaJanuari mo 2016. Amwele okwa pula kehe ngoka e na omayele a hala oku ga gandja kelelo lyondoolopa a ninge ekwatathano noombelewa dhe.

ILENI NANDJATO