AMTA a ninguluka kombinga yokondalaka yaFysal

Ehangano lyoAgro-Marketing Trading Agency (AMTA) olya gandja ishewe okondalaka yomweedhi ndatu koFysal Fresh Produce opo a longele mendiki lye lyomalandithilo mOngwediva, ihe AMTA ina vula okuhupitha etsokumwe lye nehangano lyoNamsov.

Metitano lya piti, Fysal Fresh okwa li a pyakudhukwa okuhulitha po elongelo lye mendiki ndyoka ihe ngashiingeyi kondalaka yawo oya lelepekwa noomwedhi ndatu.

MuFebruali gwomvula ya piti, Namsov oshowo Fysal oya yi metsokumwe naAMTA opo ya kale taya longele mendiki ndyoka.

Fysal Fresh okwa Shaina etsokumwe lyuule womvula yimwe omanga Namsov a shaina etsokumwe lyuule woomwedhi hamano, ndyoka lya li tali pumbwa okulelepekwa kwiikwatelelwa kompumbwe nelanditho lyiilandithomwa yawo.

Namsov okwa tula po endiki lye lyomalandithilo goohi ihe konima sho etsokumwe lye ya thiki pehulilo inaya vula we okulelepeka etsokumwe ndoka.

Onzo yimwe oya popi kutya AMTA okwa kala ta piyaganeke iilonga yaNamsov mendiki lye.

“Iilonga oya li tayi ende nawa uule woomwedhi hamano dhopetameko. Konima okwa lombwelwa opo tu pate omanga omahangano ngoka gaali taga talulula okondalaka yawo. Osha kutha oomwedhi ndatu omanga inatu lombwelwa kutya natu tameke ishewe iilonga. Onkalo oya kala tayi piyaganeke molwaashoka esiku limwe otamu longo, esiku tali landula otamu lombwelwa kutya inamu longa,” onzo ya holola.

Namsov okwa tokola okuthiga po endiki ndyoka mEtitatu lyoshiwike sha piti.

Omunambelewa omukomeho gwoAMTA, Lungameni Lucas okwa shangele Namsov omukanda ta gandja ombili nokupula ehangano ndyoka li tsikile nokulongela mendiki molwaashoka eyakulo lyawo oli na oshilonga unene kuAMTA.

Okwa pula Namsov opo a tsikile okulongela mendiki ndyoka uule woomwedhi ndatu omanga taya manitha okondalaka yawo.

Nonando ongaaka Namsov okwa tembukala mo mendiki ndyoka.

Omunambelewa gwoNamsov, Herman Smidt okwa koleke etembu lyawo, ta popi kutya oya kala ye na opoloyeka moAMTA mOngwediva ihe oya tokola okukonga ehala limwe mondoolopa.

Omupopiliko gwoAMTA, Meke Namindo ina vula okugandja uuyelele wa sha ta popi kutya ina lombwelwa natango kombinga yoshikumungu shoka.

Omunambelewa Omukuluntuwiliko gwoFysal Group, Ismael David Fysal okwa lombwele oNamibian Sun kutya oyali pyakudhukwa okukutha miilonga aaniilonga ye li po 60 mboka taya ongele mendiki lyaAMTA.

“Osha Ii sha piyagana mEtitano sho aantu yaAMTA ye tu pula ngele otatu vulu okulongela mendiki lyawo oomwedhi ndatu ishewe. Otwali twiipyakidhila nokutembuka oshowo okutuma komagumbo aaniilonga yamwe po,” Fysal a popi.

“Okuyanda okulongela mehala shaaheli paveta, otwa pula ye shi tule pambaapila na oyeshi ningi mOmaandaha. Oya popi kutya muule womwedhi otaye tu lombwele kutya oshike tashi kaholoka po konima yomwedhi ndatu.”

Fysal oye owala a hugunine okulongela mendiki ndyoka okutameka Februali na ota kala ta longelemo oye awike sigo omwedhi Aguste. Aalanithi yamwe oya thigi po endiki sha landula elombwelo lyokabinete.

Omvula ya piti, AMTA okwa shaina etsokumwe naFysal opo a kala ta longele mendiki ndyoka nokuwayimina aalandithi yalwe yane mboka yali taya longele nale mendiki ndyoka. Etsokumwe ndyoka olya li lyuule womvula yimwe.

Nonando etsokumwe ndyoka olya li owala lyomvula yimwe, olya li lya nyanwa koyendji. Omuprima Saara Kuugongelwa-Amadhila okwa talelepo endiki ndyoka muSepetemba gwomvula ya piti, konima sho kwa nyenyetwa kutya ehangano ndyoka otali landitha mendiki ndyoka iilandithomwa tayi kuthwa moshishiindalongo South Afrika.