Akwaluuteli naya gandje ombili

Ongundu yuuthemba womuntu tayi ithanwa Forum for the Future (FFF) oshowo NamRights oya hala omutumba gwoLutheran World Federation (LWF), ngoka tagu ningwa mOvenduka oshiwike shika, opo gu gandje ombili yopashigwana sho ya kala ya mwena kombinga yomamonitho giihuna uuthemba waantu ngoka ga ningwa kongundu yaSwapo, pethimbo lyekondjelomanguluko.

Omahangano ngoka oga hala woLWF a kwatele komeho oshowo okugandja iiyemo ya nuninwa okupulitha komeho onkalo yedhiminathanepo moNamibia.

Oya popi kutya oshili oshowo etulo miilonga lyonkalo yedhiminathanepo moshilongo otayi ka gandja ombili kwaamboka ya hupu momamonitho giihuna ngoka ga ningwa kuSwapo, oshowo kaakwiita nale yoSWATF noKoevoet nokuya pa ompito ya vule okumangulula omitima dhawo kwaashoka ya li musho pethimbo ndyoka, oshowo ya vule okugandja ombili omolwa iimbuluma mbyoka ya longo.

Swapo ota lundilwa kutya okwa longo omiyonena dhiita mwakwatewa omamonitho giihuna oshowo omadhipago ga ningilwa AaNamibia pokati komvula yo 1966 sigo 1989.



NamRights naFFF oya popi kutya ope na uumbangi mboka tawu holola kutya LWF oku na ontseyo na okwa tseyithilwa kutya Swapo okwa ningi omiyonenna dhiita unene moAngola naZambia.

Nakusa omusita Siegfried Groth oshowo omusita Salatiel Ailonga, oshowo okomitiye tayi ithanwa Committee of Parents and the Parents Committee of Namibia, okwa hololwa ya tseyithile ombelewa yongongahangano yoLWF moGeneva kombinga yiimbuluma mbyoka tayi longwa kuSwapo pethimbo ndyoka na oya pula opo yi katuke oonkatu.

“Nonando ongaaka LWF okwa ndopa okukatuka oonkatu,” ehangano lyuuthemba womuntu lya popi.

Omupresidende nale gwoSwapo, Sam Nujoma okwa lopotwa a talele po oombelewa dhoLWF moGeneva mo-1987 opo a ka konge omakwatho gopauntu. Pethimbo ndyoka okwa tindi omalundilo ngoka taga ningilwa Swapo kutya ota longo omiyonena dhiita mookamba dhe na okwa popi kutya okamba ndhoka tadhi popiwa odhepangelo lyokatongotongo lyaSouth Afrika.

Nujoma okwa hiya LWF opo a ye moAngola ya ka tale ngele otaya mono uukwashili womapopyo gomiyonena ngoka. LWF okwa tumu moAngola aantu yahamano ya tumbulwa kutya Dr Ishmael Noko, Reverend Ruth Blazer, Olle Eriksson, Hanne Sophie Greve, Reverend Helmut Jehle, naBodil Solling – muDesemba gwo-1987 opo ya talelepo ookamba dhoontauki dhaSwapo moAngola.

Osheendo shoka osha ningi olopota kwaashoka sha monopo, nolopota ndjoka oya tsu kumwe noohapu dhaNujoma .

Olopota ndjoka oya li ya pandulwa nale kuamushanga gwoLWF, Dr Gunnar Stålsett.

NamRights pamwe noFFF oya popi kutya osheendo shoka shoLWF osha tulwa iihwa komeho kelelo lyaSwapo, omanga ookwantwa dhaSwapo dha kala mokamba yaLubango muumbugantu waAngola.

“Oshili oshooka kutya omupresidende nale Nujoma okwa gandja uuyelele wa puka owina koLWF kombinga yomamonitho giihuna taga ningilwa aantu kuSwapo moAngola. Okwa ningi ehiyo nokugandja uuyelele wa puka kosheendo shoLWF shoka sha talele po Angola , naashoka osha etithwa opo osheendo shaanambelewa mboka ya ninge olopota yaana uukwashili,” FFF naNamRights ya popi.

Omahangano ngoka oga tsikile natango kutya konima yolopota yoLWF, ookwatwa dhiita ndhoka odha dhipagwa nenge dha kana pokati ko-1987 no-1989.

Omahangano ngoka otaga nyana woo embo lyoLWF ndyoka li na oshipalanyolo ‘ ‘The Lutheran Wold Federation and Namibia’ na inali kwatela mo omadhina gAakwaluteli mboka ya mono iihuna kohi yelelo lyaSwapo.

Omukomeho gwoNamRights Phil ya Nangoloh okwa popi kutya oshi li mondjila ngele LWF ta yamukula.

“Oya pumbwa okugandja ombili kAanamibia, inaku lata natango. Oya pumbwa okwiitedhulula ihe ngame itandi ya dhiminepo sigo ya pula edhiminepo. Aantu ayehe ohaya ningi omapuko ihe aantu aahwepo oomboka haya gandja ombili,” Ya Nangoloh ta ti.

Omahangano nookomitiye ngaashi ndjoka tayi ithanwa Committee of Parents and Truth and Justice Committee, oshowo oohandimwe oya shaina omukanda ngoka tagu pewa omutumba gwoLWF.

Okomitiye yaakondjelimanguluko yoPLAN nale oya popi kutya oya ningi eindilo koLWF oshowo koWorld Council of Churches (WCC) okutameka Malitsa gwomvula ya piti opo ya yambidhidhe mekandulepo lyuupyakadhi mboka ihe inaya mona eyamukulo lya sha.

Pahapu dhaErika Beukes gwo joint committee, oUnited Nations Committee Against Torture (UNCAT) muDesemba gwomvula ya piti oya pula eningo lyomapulaapulo omolwa omiyonena dhoka dhiita . Okomitiye ndjoka otayi ka tameka nomapulaapulo ngoka mbala.

CATHERINE SASMAN