'Aapolisi oya longitha omumwandje'

Johanna Nekwiyu-Amateta okwa popi ngaaka pethimbo lyoshituthidhimbuluko shanakusa, shoka sha ningwa mehuliloshiwike lya piti.Amateta okwa fumbikwa pomukunda gwaandjawo pEngoyi popepi nOnyaanya moshitopolwa shaShikoto.Opwa holoka iikolokosha pefumbiko lye, sho ongundu yookume ke kuniwe einekelo kutya oya zilila mOvenduka, ya tameke tayi umbu oondjembo nokuhinga nayi iihauto pomawendo.Nekwiyu-Amateta okwa popi kutya kuuvite ko kutya omolwashike opolisi yi na okudhipaga omona, molwaashoka oya kala ookume ke na oya longele kumwe. Okwa tsikile kutya olundji okwa kala nokupenduka moomposi omolwa omainyengo taga limbilike na okwa mono iilyo yetanga lyopolisi tayi konkola pekende lyanakusa nokumu kutha mo megumbo opo ya ka longe iimbuluma.Okwa popi kutya okwa li he ya tidha po nokuya lombwela kutya:“Ohamu ya mu ile omumwandje nokumulongitha iimbuluma, ihe ngele iinima yeni oya ende nayi ohamu ya mu mutule miipandeko omanga ne mwa yela koonyala dheni kiilonga nokutsikila tamu longele oofamili dheni. Sho a dhipagwa onda uvi nayi noonkondo kutya omolwashike aapolisi ye na okumudhipaga, ngele ohaya longele pamwe. Omumwandje okwa kanithile omwenyo gwe miilonga yiimbuluma na osha uvitha ndje nayi noonkondo.”Kablou okwa yahwa kopolisi lwopotundi 18:30 pondunda yomanwino tayi adhika moWanaheda mOsoondaha yoshiwike sha piti, omanga a li ta kambadhala okutsa omupolisi nombele. Aanambelewa yaali yopolisi otaya konaakonwa omolwa eso lye, sha landula aatalelipo mboka ya yekwa iinima yawo esiku olyo tuu ndyoka, moKlein Windhoek. Omakonaakono geso otaga ningwa opo ku monike kutya Kablou okwa yahwa iikando ingapi.Omukomeho gwopolisi, Sebastian Ndeitunga okwa popi kutya okwa uva oohapu dhayina yaKablou ndhoka a popi mehuliloshiwike na otaka konaakona oohapu ndhoka.“Onda uvu oohapu dhe dhoka a popi pefumbiko, ihe itandi dhimbuluka a lopota kutya ope na aapolisi mboka ya longele kumwe nomona mokulonga iimbuluma. Otatu ke shi landula nokukonga uushili musho,” Ndeitunga a popi.Ndeitunga okwa popi kutya otaya ka ninga omakonaakoo opo ya vule okumona mboka ya kala nokulongela kumwe naye, molwaashoka otashi vulika pe na aapolisi yamwe po mboka ye li miikutu yiilonga ihe otaya longo iimbuluma naamboka inaya pumbiwa metanga lyopolisi.Opolisi otayi konaakona wo ekuthomo lyoondjembo mokati koshigwana pethimbo lyefumbiko. Okuniwe einekelo kutya efumbiko ndyoka noshituthidhimbuluko osha kaliwa kookume yanakusa oyendji nofamili okuza mOvenduka. Nakusa okwa tseyika kutya okwa kala omukwateli komeho gwoongundu dhaalongi yiimbuluma mOvenduka oshowo pomidhingoloko dhopopepi.Komanda gwopolisi yaShikoto, Armas Shivute, okwa lombwele oNamibian Sun kutya opolisi oya li pomawendo gopEngoyi sha landula oolopota dheumbo lyoondjembo na oya ningi omainda gopolisi pomahala ga yooloka. Okwa tsikile kutya oya li ya tumu iilyo yawo pehala ndyoka sha landula olopota, ihe oya a dha aantu ya mana nale, na otaku popiwa kutya eumbo lyoondjembo ndyoka olya ningwa kookume yanakusa, aniwa onga omukalo gwokuthindikila omukomeho gawo.Oshiwike sha piti opolisi oya pititha omukanda sha landula omatilitho gokuningila oshigwana nopolisi omiyonena ga ningwa kookuume yaKablou onga iikonene medhipago lye. Opolisi oya li ya kunkilile kutya otayi ka ungaunga nakehe ngoka ta kambadhala okuya ombili moshipala.Kablou okwa kokele pamwe naakuluntu ye moFreedomland mOvenduka sigo osho a hulitha okwa kala ha zi megumbo lyaakuluntu ye. He Thomas Amateta okwa hulitha omvula ya piti kuKotomba.Okwa tameke oskola ye yaanona po Moses van der Byl Primary School na okwa tsikile koImmanuel Shifidi Senior Secondary School, hoka a hulile mondondo onti 9. Pahapu dha meme gwe okwa tameke ta yaka omanga a li e na oomvula 12, ihe oonkambadhala dhokumu kwathela a hulithepo iilonga yiimbuluma odha hulile muunyengwi.Okwa dhiga ko yina, aamwayina yatano oshowo omonamati.ILENI NANDJATO

'Aapolisi oya longitha omumwandje'

Comments

Namibian Sun 2025-06-18

Please login to leave a comment

'Aapolisi oya longitha omumwandje'

Comments

Namibian Sun 2025-06-18

Please login to leave a comment

Login