Aaniilonga oyendji ya ningi iihakanwa yokukuthwa miilonga

Namibia nuumvo otaka dhimbuluka esiku lyAaniilonga pethimbo mpoka onkalo yokwaahena iilonga ya londa pombanda noonkondo na otayi etithwa komakutho miilonga ngoka taga ningwa konyala kehe oshiwike , naaniilonga ya thika po-41 000 oyeli ya gumwa.

Sho a popi noshikundanekifo shoNamibian Sun, amushanga-ndjai gwoNational Union of Namibian Workers (NUNW) Job Muniaro okwa popi kutya aaniilonga oyendji oya ninga iihakanwa yonkalo yuupyakadhi wiimaliwa moshilongo. Omahangano ogendji gokutunga oga gwile moshiponga omolwa onkalo yompumbwe yomeya unene mOvenduka, na oga thiminikwa okukutha miilonga aaniilonga.

Kaye shi owala aaniilonga yomatungo mboka ya kanitha iilonga yawo, ihe iikundaneki moshilongo oya lopota kutya aaniilonga ya thika pe-1200 oya kanitha iilonga yawo moomwedhi ndatu dhopetameko mo-2016. “Uupyakadhi uunene. Aantu itaya kanitha owala iilonga ihe otaya kanitha oonkalamwenyo dhawo, omauwanawa gawo guunamiti, oondjambi dhawo, iihauto yawo nomagumbo gawo. Ofamili ayihe ohayi mono iihuna molwaashoka omakutho miilonga ngaka ohaga gumu woo aanegumbo. Aantu otaya ningi uupyakadhi wepangelo molwaashoka itaya vulu okwiipalutha yoyeye,” Muniaro ta ti

Okwa gwedha ko kutya onkalo otayi nayipalekwa woo komahangano ogendji gaaChina.

Muniaro okwa pula epangelo opo li tule miilonga oompango ndhoka tadhi gamenene uuwanawa waaniilonga. “Ito vulu owala okukala wuna omutungi gwopaumwene a za koshilongo shoka sha huma na okuna ontseyo yopombanda, ta kondjele otendela nomuntu ngoka a za moshilongo inahu huma natango. Onkalo ndjoka otayi dhipaga aaanangeshefa yetu aashona molwaashoka itaya mono ompito yokukoka.” Muniaro okwa tsikile kutya oshinima shimwe tashi nayipalaleke onkalo, aaniilonga kaye shi uuthemba wawo, na ohashi etitha omwaka gwaaniilonga ya ningwe nayi kaagandji yawo yiilonga.

“Oshidhigu okunkondopeka aaniilonga molwaashoka ethimbo limwe aagandji yawo yiilonga inaya hala ya tseye uuthemba wawo.”

Omukuluntu gwehangano lyaaniilonga okwa popi kutya okwaahenakonasha nako otaku etitha aaniilonga ya kanithe iilonga yawo omolwa omatokolo gokufaula kiilonga omolwa ongeyo nokuuva nayi molwaashoka kaye na ontseyo kutya opena omilandu tadhi vulu okulandulwa opo ya holole omaupyakadhi gawo.

JEMIMA BEUKES