Aandonga ya pulwa ya ngungumane

Oshilyo shelelo lyaNdonga na okuli ta longo pehala lyakansela gwoshikandjo sha Onethika, Selma Gwanandjokwe Shejavali, okwa pula aakwashigwana yaNdonga opo ya kale ya ngungumana omanga ofamili yelelo lyoshilongo shoka tayi kwatele komeho oonkundathana dhoku e ta ombili melelo lyaNdonga.

Shejavali oye omunashipundi gwoonkundathana dhopambili pamwe nOmukwaniilwa gwaNdonga, Immanuel Kauluma Elifas oshowo omulanduli gwElifas, Fillemon Shuumbwa Nangolo.

“Oshili kutya iilyo yombala yaNdonga okupitila moonkundathana ndhoka tadhi kwatelwa komeho kungame oshowo Nangolo otatu kundathana eeto lyombili mokati kelelo lyoshilongo shetu. Oonkundathana otadhi pula komeho, nuuyelele owundji kombinga yoonkundathana ndhoka otawu kala wa holelwa nowopaumwene.”

Okwa tsikile kutya omanga elelo ndyoka tali kundathana oshikumungu shetidho miilonga lyaaleli nale mboka ya tidhwa omvula ya piti, okwa popi kutya etokolo lya hugunina moshikumungu shoonkundathana ndhoka, otali uthwa kontopolwa onti 9 oshowo onti 10 yOmpango yOmalelo goPamuthigululwakalo onti 25 yomo 2000.

Shejavali okwa popi kutya uuna onkundatha ndhoka dha manithwa nena otaka tseyithilwa oshigwana shaNdonga, oshizemo shoonkundathana dhawo, pamushangwa. MuJuli gwomvula ya piti, omukwaniilwa Immanuel Kauluma Elifas okwa tidha ookansela yaheyali yomookansela 8 mboka yali ya kuthwa iilonga muApilili omumvo ngoka.

Mwaamboka ya tidhwa omwa kwatelwa omunashipundi nale gwelelo ndyoka Peter Kauluma oshowo ngoka a li omupopiliko gwelelo ndyoka Joseph Asino.

Yamwe po mbyoka ya tidhwa omwa kwatela omalenga omanene nale ngashi John Walenga, Ngoloneya nale gwaShikoto, Vilho Kamanya, Kashona kaMalulu, Tonata Ngulu naFillemon Nambili.

Omunangeshefa Erastus Mvula oshowo Paavo Amweele oya pingenepo Walenga onga elenga enene lyoshikandjo shaNdangwa, omanga Rainhold Nepolo pingenepo Asino moshikandjo Oniiwe.

Naeman Kambala okwa pingenepo Kamanya moAmuteya omanga Nepando Amupanda a pingenepo Peter Kauluma mOngula yaNetanga.

Nepando natango ota longo onga amushanga gwelelo lyaNdonga.

ILENI NANDJATO