Aanambelewa ya tulwa miipandeko molwa uulingilingi evi

Aanambelewa oya tulwa miipandeko taya tamanekelwa iipotha yuulingilingi konima sho yiipe ooplota dhomagumbo nokugandja woo kookume kawo pOshivelo no inaya landula omilandu ndhoka dhi na okulandulwa.

Oya li ya pewa omboloha yooN$10 000 kehe gumwe pethimbo ya li ya holoka mOmpangulilo lyOpashitopolwa mOshakati. Omadhina goonakutamanekwa mbaka oga tumbulwa kutya oyo, Rosalia Ndipwashimwe, Kornelia Amutenya, Julia Hauwanga, Elise Hango naMatatias Moses.

Oya holoka oshikando shotango komeho yomupanguli Leopold Hangolo ngoka uundulile oshipotha shawo komasiku gatatu gaApilili. Okakomisi kOkulwitha Uulingilingi oka ningi omakonaakono megandjo lyooplota ndhika, nokonima sho omakonaakono ga manithwa omupanguli-ndjai okwa tokola opo mbaka ya tamanekelwe iipotha ya thika po-16.

Mbaka yatano otaya tamanekelwa okuya pondje ontopolwa

35(3) no 43(1) yOmpango ontihetatu yoAnti-Corruption Act, yomo-2003, sho ya gandja nokwiikuthila ooplota dhevi pOshivelo. Mbaka okwa lopotwa yiikuthile nokugandja ooplota dhevi dha thika po-17 ku na owala omasiku omashona omanga inaku tulwa iilonga okomitiye yoSettlement Development Committee (SDC) moshikandjohogololo shaGuinas.

Okomitiye ndjika yoSDC oya hogololelwe momasiku 15 gaKotomba mo-2014 pethimbo lyomutumba gwoConstituency Development Committee (CDC) ihe omaindilo gooplota oga pewa elelo lyoshitopolwa shaShikoto momasiku 11 gaSepetemba.

Momasiku 15 gaKotomba pethimbo lyomutumba nguka, Ndipwashimwe okwa lombwele mboka ya kala poshigongi kutya ooplota ndhika odha gandjwa nale na oya tegelela owala ezimino.

Pethimbo ndyoka ombelewa yelelo lyaShivelo oya li owala nomaindilo 24 ngoka gali momusholondondo gwoonakutegelela ihe momusholondondo moka inamu kwatelwa omadhina 17 goonakuninga omaindilo ngaka, mwakwatelwa Hango ngoka a ningi eindilo momasiku 15 gaSeptemba mo-2014, omasiku gatatu konima sho kwa li kwa popiwa kutya okwa ninga nale eindilo.

Okwa hololwa kutya oonakumona ooplota ndhika yeli 17 oya ningi omaindilo sha landula sho omadhina gawo ga tumbulwa nale momutumba ngoka gwa li gwa ningwa momasiku 11 gaSepetemba kutya oya ninga nale omaindilo. Ooplota ndhoka odha li dha ziminwa kelelo lyoshitopolwa momasiku 14 gaNovemba mo-2014. Aatamanekwa Ndipwashimwe, Amutenya, Hauwanga, Hango na Moses oya mono ooplota dhuunene woosquare meta 600, 520, 600, 600 no 600 koshimaliwa shokuhiila shathika pooN$35. Ooplota ndhoka dha pewa aatamanekwa mbaka yatano oonene uunene okuyeleka naandhoka dha pewa yakwawo yalwe.

KENYA KAMBOWE