Aanafaalama ya taalela oshiponga

Onkalo ndjoka oya etitha aanafaalama yamwe, ya tameke okupalutha iimuna yawo noshimongwa oshowo olusiyana.Uuyelele mboka owa pitithwa molopota tayi ithanwa Crop Prospects and Food Security Situation Report nonkalo ndjoka oya dhidhilikwa unene miitopolwa yomuumbugantu nuuninginino woshilongo.Onkalo yuulithilo moshitopolwa sha//Karas okwa lopotwa yankundipala noonkondo unene momudhingoloko gwaBondelswarts oshowo Warmbad townlands.Momudhingoloko gwaAroab onkalo yuulithilo oya li nga yi li hwepo ihe hayo lela tayi nuwa omeya, pauyelele mboka wa pitithwa molopota.Okwa lopotwa kutya onkalo yuulithilo momudhingoloko gwaBerseba oya yambukapo omolwa omuloka ngoka gwa dhidhilikwa momudhingoloko ngoka. Omolwa onkalo ndjoka ya nkundipala, aanafaalama momudhilongoko ndhoka otaya palutha iimuna yawo noshimongwa oshowo olusiyana. Shoka oshi li uupyakadhi kaanafaalama mboka itaya vulu okulikola iipalutha mbyoka, opo ya vule okupaliutha iimuna yawo, omolwa ompumbwe yiiyemo.Oshitopolwa sha tumbulwa osha lopota woo omwaalu gwiimuna ya si omolwa oshikukuta, unene momudhingoloko gwaKarasburg.Olopota natango oya tsikile kutya ompumbwe yomeya natango omukundu omunene gwa taalela aanafaalama yomomudhingoloko ngoka, iimuna yomomudhingoloko ngoka hayi pewa omeya gomoomboola ihe ondjele yomeya moomboola ndhoka hadhi longithwa oya shuna pevi.Olopota oya tsikile kutya moshitopolwa shaHardap, onkalo oyili ya dhigupala momudhingoloko dhimwe poo manga mu dhimwe onkalo yi li hwepo. Omudhingoloko ngoka gwa dhidhilikwa gu li moshiponga, omudhingoloko gwaMaltahöhe. Momudhingoloko ngoka omwa lopotwa omwaalu ogundji gwiimuna gwa si omolwa ompumbwe yuulithilo nomeya.Omidhingoloko ngaashi Aranos, Maltahöhe, Hoachanas oshowo Gochas odho unene dha gumwa noonkondo konkalo yoshikukuta nenota, omanga Amperbo, Vlakplaas noKalkplato mwa dhidhilikwa unene oshikukuta. Onga omukalo gwokuyanda ekanitho enene lyiimuna, aanafaalama unene momudhingoloko gwaMaltahöhe oya longitha omukalo gwokushunitha pevi omwaalu gwawo gwiimuna muule woomvula dha piti.Oombola dhimwe momudhingoloko odhi na ondjele yomeya yi li nawa, kakele ope na aanafaalama mboka taya ende iinano iile taya kongele iimuna yawo omeya, nonando iimuna oya nkundipala nale.Moshitopolwa shErongo, aanafaalama oye li momalimbililo omolwa uulithilo wankundipala nompumbwe yomeya, na otaya popi kutya ngele inaya mona omuloka nena iimuna yawo oyi li moshiponga oshinene, na otaya ka kanitha iimuna oyindji. Uulithilo wankundipala owa dhidhilikwa woo moshitopolwa shaMaheke, niimuma oyindji okwa lopotwa ya taalela ondjala onene nuumvo. Moshitopolwa shaKunene, onkalo oya dhigupala noonkondo konyala moshitopolwa ashihe, kakele momudhingoloko gwa Outjo, moka mwa dhidhilikwa omuloka, ngoka gwa hupitha iimuna.Moshitopolwa sha Otjozondjupa onkalo yuulithilo oya yambukapo kashona, sho oshitopolwa sha dhengwa komata gomvula muJanuari, kakele moshikandjohogololo shaKakarara oshowo Gam, moka mwa lopotwa onkalo yuulithilo yadhigupala.Miikandjohogololo mbyoka ya tothwamo, okwa lopotwa mu na omeya omashona ngoka itaga vulu okuhupitha iimuna, ngele inaku lokwa.Okwa lopotwa onkalo yoshikukuta natango oya dhigupala mOvitoto.Oshitopolwa shaKunene nOmaheke oyo ya lopota kutya oya taalela onkalo yadhigupala noonkondo na okwa lopotwa omwaalu omunene gwiimuna ya si koshikukuta, nomwaalu omunene gwiimuna natango otaku tengenekwa tagu si mOmaheke ngele omvula inayi loka.Olopota ya tsikile kutya iimuna miitopolwa yomonooli nuuzilo oyi li monkalo yi li nawa. Uulithilo nomeya miitopowa mbyoka inawu gumwa konkalo yoshikukuta ndjoka tayi dhenge iitopolwa yimwe po moshilongo.Onkalo ombwaanawa yuulithilo oya lopotwa miitopolwa ngaashi Oshikoto, Ohangwena nOmusati. ELLANIE SMIT

Aanafaalama ya taalela oshiponga

Comments

Namibian Sun 2025-06-18

Please login to leave a comment

Aanafaalama ya taalela oshiponga

Comments

Namibian Sun 2025-06-18

Please login to leave a comment

Login