Aaleli yoAPP ya sitha ohoni pefumbiko lyaShixwameni

KENYA KAMBOWE

RUNDU

Omupeha omupresidende gwongundu yoAll People’s Party (APP), Erastus Shuumbwa oshowo amushanga gwongundu ndjoka, Vincent Kanyetu oya kala ya thikama momutenya pethimbo lyefumbiko lyomuleli gwongundu yawo, ndyoka lya ningilwa moRundu mOlyomakaya.

Okwa hololwa kutya aalongekidhi yefumbiko ndyoka oya longitha ompito okuninga oshituthi shoka onga oshituthi shongundu yoSwapo, ongundu ndjoka Shixwameni a thigi po oomvula 22 dha piti.

Kanyetu okwa lombwele oNamibian Sun kutya yo naShuumbwa oya kala ya thikama konima yotenda ndjoka ya li Omupresidende Hage Geingob, ofamili yaShixwameni oshowo aalilisa yamwe mboka kwa talikako kutya oya simana.

“Lombwelandje kutya ethano li li ngiini tali gandjwa uuna aantu mboka tatu lele ya mono omupeha omupresidende oshowo amushanga gwongundu ndjoka yali tayi lelwa kunakusa Shixwameni ya thikama momutenya omanga aantu ngaashi mayola gwaRundu, omukwatakanithi gwongundu Swapo moKavango East nayakwawo yalwe mboka kaya li yeli popepi naShixwameni ya pewa esimaneko,” Kanyetu a popi.

Kanyetu okwa popi kutya oya thiki ya lata pomawendo molwaashoka oya yi opo ya ka kale andola oshitopolwa sholweendo ndoka lwa ka tala omudhimba kokila ihe oya lombwelwa kutya itaya vulu okukala oshitopolwa sholweendo ndoka.

Kanyetu oku wete kutya nonando oya li ya lata aalongekidhi oya Ii ye na oshinakugwanithwa okukwashilipaleka kutya ope na iipundi yiikalekelwa yelelo lyongundu.

Kanyetu okwa gwedhapo kutya onkalo moka yiihumbatelwa yo naShuumbwa otayi ulike kutya epangelo oli na elalakano okusitha ohoni ongundu yoAPP.

“Opo wa li pokapale sho twa ka tala olutu lwanakusa. Oya kwashilipaleke kutya onda kala kokule na inandi pitikwa okuya podhila. Ashihe shoka osha ningilwa owina. Oya tegelele Shixwameni a hulithe opo ya sithe ohoni ongundu,” Kanyetu a popi a geya.

Kanyetu okwa pula natango kutya elalakano lyokugandja efumbiko lyopapangelo olya shike ngele ongundu yoAPP oyo ya futile omalongekidho gefumbiko nokulongekidha iikulya kegumbo lyofamili.

Okwa tsikile kutya kape na shoka epangelo lya futu APP ita vulu okufutila ta popi kutya ongundu oyo ya longitha iimaliwa oyindji moshituthi shoka shi vulithe epangelo.

Omuleli okuza kongundu yopapolotika yimwe po, McHenry Venaani, okwa holola okuuva nayi kwe kaanambelewa yelongekidho mboka ye mu tindile ompito opo a popye poshituthi shedhimbuluko lyaShixwameni mEtitano.

Venaani okwa popi kutya elombwelo opo ka ape we ompito olya gandjwa kuPresidende Geingob omolwa omahogololo ngoka taga ningwa moshikandjohogololo shaNcamagoro momasiku 17 Desemba.

Okwa popi kutya okwa koleke kaalongekidhi kutya ota ka kala pefumbiko sho a li a pulwa ihe oshe mu halutha kutya keli momusholondondo gwaapopi.

Okwa pula kutya omolwashike ina tulwa momusholondondo ihe kape na ngoka e mu yamukula.

Venaani okwa popi kutya otashi limbililike molwaashoka aaleli yongundu dhompilameno ohaya pewa ompito okupopya pomafumbiko gaanapaliamende.

Kombinga yankene aaleli yoAPP ya ihumbatelwa pefumbiko ndyoka, Venaani okwa popi kutya okwa li a haluka okumona aaleli yongundu ndjoka ya thikama momutenya.