Aakomeho yehangano lyoonakulwa aakulu yiipe oondjambi dhoomiliyona 1.7

MATHIAS HAUFIKU NAJEMIMA BEUKES



OVENDUKA

Oonakulwa aakulu yaali oyiiyadha momeya omapyu konima sho ya mono oondjambi dhoshimaliwa sha thika poomiliyona 1.7 pokati komvula yo 2017 no 2020, shaaheli mondjila.

Ben Shikovelo Shikongo oshowo Ruusa Malulu oyali taya mono ondjambi onga omupresidende nomupevi presidende gwoNamibia National Liberation Veterans Association pokati komwedhi Novemba 2017 sigo Juni 2020, ehangano ndyoka olya li lya mono oshimaliwa shomiliyona yimwe okuza kepangelo opo li vule okuungaunga niikumungu yalwo, nehangano ngashiingeyi olya hala iimaliwa mbyoka yi shunithwe molwaashoka kaya li ya nuninwa oondjambi.

Omupeha amushanga-ndjai gwehangano ndyoka, Elfriede Katjatako momasiku 28 gaSepetemba 2020 okwa shangele mboka yaaali omukanda ta popi kutya ehangano otali hulithapo okufuta oondjambi dhawo.

Shikongo okwa tameke nondjambi yooN$10 000 komwedhi ndjoka ya londo okuya pooN$27 562 momvula yo 2018 na okwa mono ondjambi yooN$936 898 muule wethimbo ndyoka.

Malulu okwali a mono ondjambi yoN$25 402, nondjambi ndjoka oyooN$812 955 muule woshikako shoka.

Oya pewa sigo omwedhi Kotomba gwomvula yo 2020 opo ya kale ya shunitha iimaliwa mbyoka ihe shoka inashi ningwa naatango.

Ekotampango yehangano otali utha kutya oomboka owala ya kutwa kehangano haya longo omasiku agehe oyo taya pewa oondjambi.

Etokolo okuhulithapo efuto lyoondjambi dhoka odha hwahwamekwa sha landula omakonaakono gomambo giiniwe yehangano ndyoka ga ningwa kombelelwa yo Office of the Auditor General (AG). Olopota ya landula omakonaakono ngoka momasiku 23 gaJuni mo 2020 oya holola kutya omupresidende gwehangano nomupeha omupresidende itaya vulu okukala ye na oondjambi negandjo lyoondjambi kwaamboka yaali oshi li ey o pondje lyekotampango lyehangano ndyoka.

Ombelewa yoAG oya kunkilile kutya egandjo lyoondjambi dhili ngaaka otali ka etitha embangoloto lyehangano.

Ombelewa yoAG oya pula opo ku yelithwe kutya omolwashike oondjambi dhomupresidende nomupeha gwe dha futwa omanga shi li pondje yekotampago lyehangano.

Shikongo otaku popiwa a tokola okukuthako iinakugwanithwa ayihe yehangano ndyoka, konima nkene kwa ningwa etokolo opo kaya futwe we.

Namibian Sun okwa nongele kutya okwa tula iinakugwanithwa ayihe yehangano mombelelwa ye. Onzo yimwe oya holola kutya Shikongo oye ta kondolola omayalu goombaanga dhehangano na oye ta ningi omatokolo agehe.

“Okwa tameke woo okwiifuta ondjambi nonando okwa gandjwa omaiyuvo gombelelwa yoAG. Okwa kutha woo ohauto yehangano nokukala te yi longitha onga ye yopaumwene.”

Shikongo okwa tindi omapopyo ngoka ta popi kutya iha mono we ondjambi omolwa omagwedhelepo ga ningwa koNational Executive Committee (NEC) omolwa ompumbwe yiiyemo.

“Ngoka omukiintu a ngwangwana. Okwe tu fala kombelewa yaaniilonga na otatu ka kala nomutumba momasiku 10 gaJuni. Ota popile shike niikundaneki. Oku na ondjala yelelo molwaashoka ombelewa yamushanga-ndjai kayi na omuntu na okwa hala ompito ndjoka. Itatu vulu okuninga ngaaka nategelele sigo twa ningi omutumba gwomahogololo gelelo.”

Okwa popi kutya ayehe oyuuthwa okupewa oondjambi na otaya ka mona oondjambi uuna oshimaliwa sha monika.