1.Okuhole ndje tuu?

Ondi na omumati gwandje twa kala naye ethimbo ihe ota limbililikendje. Ihatu popi naye iinima yi na oshilonga, ye iha talelendjepo ngele ndemutumine osms opo owala ha vulu okugalula. Nandi ninge ngiini? Ngoka ke shi omulumentu gwoye onkene ino manapo ethimbo lyoye nokukala to ti oye omulumentu gwoye. Aluhe ngele omuntu okukuhole nena itashi vulika wu kale momalimbililo molwaashoka omaihumbato ge otage ku hololele nale kutya omuntu ngoka oku ku hole. Ngele omuntu oku ku hole nena oku na okukala a ninga oonkambadhala kehe dhoka ta vulu nonando okwiipyakidhila opo a kale a popya nomuholike gwe na ita tegelele owala omuholike gwe oye a ye kuye, nenge e mu dhengele ongodhi. Ngoka omuntu ine ku hala ihe okwa nyengwa oku ku lombwela kutya ineku hala wee! 2.Onda hala okanona Meme Nangy onda tameka okulongitha owenda muFebruali gwomvula tu li ihe paife onda hala okanona, mbela owenda ohayi kutha ethimbo li thike peni okukala molutu. Ino popya nee ngele owa hulitha po tuu okulongitha owenda ndjoka konima nkene weikuthile muFebruali, na owali wa kutha owenda yoomweedhi ngapi. Owenda nenge oDepo ngaashi hatu yi ithana ohayi longo sha yooloka momalutu gaakiintu nokuninga etegelelo uuna wa li holongitha iiingambekithi yoluvalo ohashi ikwatelele woo kutya owa longitha iingambekidhi mbyoka ethimbo li thike peni. Ohashi kutha aakiintu yamwe uule womvula yimwe nenge mbali opo a ninge etegelelo ngele okwali ha longitha iingambekidhi yoluvalo, ihe natango aakiintu yamwe ohaya vulu okuninga etegelelo mule owala woomwedhi ngele a hulitha po elongitho lyiingambekidhi mbyoka, onkene oshidhigu noonkondo okufekela kutya ngiika otashi kukutha ethimbo li thike peni. 3.Onda limbililwa Meme Nangy onda ya momilalo inadhi gamenwa nomukadhona gwandje ihe nani oku na etegelelo kaali shi lyandje ihe ngashiingeyi otwa topoka. Okwa yile koshipangelo ihe okwa monika omukithi gwohoni ihe ngame sho ndayi ko inandi monika sha. Omukuthi gwohoni guni gwa monika omukadhona ngoka? molwaashoka omikithi dhohoni odha yooloka. Onawa sho wa yile koshipangelo wu ka konaakonwe ihe natango onawa ngaa wu shuneko konima yethimbo molwaashoka omikithi dhimwe ohadhi kutha ethimbo opo dhi ulike momalutu getu, ngoye dhidhilika woo opo wu kale to longitha ongumi ethimbo alihe to yi momilalo. 4.Onda lulilwa komuholike gwandje Meme Nangy ondi na omusamane gwandje twa kala naye mondjokana ethimbo ele ihe onda lulilwa konkalo ye. Oha ulandje pamwe nofamili yandje omalaka omawinayi, iha longo sha megumbo ye iha e tamo sha, oha nyenyeta kehe ethimbo iinima yaana oshilonga. Onda loloka noonkondo na ohandi kwatwa kombepo yokwiikutha omwenyo, otwa yile naye kehungomwenyo ihe inashi kwatha sha. Okwiimangeleka nenge okwiikutha omwenyo kashi shi ekandulepo lyomukundu, na okwa tiwa mombiibeli kutya ‘omwiidhipagi ke na omwenyo gwaaluhe megulu’ . omaupyakadhi nomikundu odhili oshitopolwa shonkalamwenyo yetu onkene inatu etha omikundu dhoka dhi tu sinde dho dhi tu ningithe iinima iiwinayi. Ondi shi shi kutya owu na okukala ho popi nomusamane gwoye kehe ethimbo kombinga yuupyakadhi mboka. Omwa pumbwa woo okuya paakuluntu yeni nenge komusita gweni opo yemu pe woo omayele. Ngele nani onkalo itayi lunduluka nena ka pe na we ompito yimwe kakele koku hulitha po ondjokana ndjoka.