Zhong Mei nomutungi omukwashilongo itaya tsu ya thithe omolwa euvathanotsokumwe shopashimaliwa

Oongeshefa dhi li ne dhaaNamibia tadhi longo kohi yoRoad Authority (RA) otadhi lundile ehangano lyo Zhong Mei Engineering Group (Pty) Ltd lyaaKiina kutya ota li lyatelele pevi oongeshefa dhawo osho wo okwaahiyutha komautho gepangelo ge na sha nenkondopaleko lyoongeshefa dhomeni lyoshilongo, sho anuwa ta li shunitha pevi omwaalu gwiipumbiwanima mbyoka ya ziminwa okulandwa.

Zhong Mei Engineering Group okwa li a pewa otendela opo a opaleke ondjila pokati koKaribib nuUSakos oshinano shookilometa omi-30,4, tayi kotha oshimaliwa shoomiliona N$343.5. Shimwe shomiipumbiwa yotendela osha li okugandja mo oopelesenda 25 kongeshefa dhaaNamibia miilonga tayi pewa konga ta gwini po otendela opo ando ya longele pamwe.

Oongeshefa dhAanamibia dhi li ne ndhoka dha li dha pewa ompito moprojeka ndjika odho- Ino Investment Holdings, Tangeni OM Trading, West Trading noAlugodhi Trading

Egandjo lyiilonga ndika olya li lya ningwa lya landula omilandu dhokulanda nokulanditha dhoRA, ontotwaveta yi na sha nelando nelanditho lyiinima yepangelo osho wo pamwe nomauthompango go KfW Development Bank.

Mombapila ya monika koshifo sho Namibian Sun, oongeshefa dhika odha nyolele RA oshiwike shika kutya oofuto dhiilonga mbyoka ya pewa epitikilo yi ye komeho” oya kalekwa nenge itayi futwa inaa ku talika omilandu dheuvathanotsokumwe”.

Omunangeshefa gumwe okwa lombwele Namibian Sun kutya aaniilonga ye li lwopethele otashi vulika ya gumwe nayi kokwaahauvathana huka.

Omutungi gondjila ota ti:” Oshinima oshina sha naaniilonga ye li ngaa lwopomilongo mbali lwaampo nenge ye vule po, nenge ndi tye aaniilonga taya ihilile lwopethele shaashi oongeshefa dhi li ne yo kehe ongeshefa oyi na aaniilonga ye li lwopomilonngombali”.

Okwa tsikile ko nokutya Zhong Mei “ota ningi ngaashi a hala” ta ti wo “aanambelewa ya kalela poo RA koprojeka otaya pangelwa ku yo”.

Gumwe twa yi naye moonkundathana monanguwi ota ti:”Ipula ashike oshinima shika otwa kala noku shi nyenya uule womvula, okuza ngaa petameko lyo2025 ihe ina pa ningwa sha. Otwa nyola oombapila, otwa ya moonkundathana nayo ihe kehe ethimbo tu na oshigongi ihaya ningi po sha”.

Okwa gwedha po ta ti:”Etitano ehulilo lyomwedhi ihe ina tu futwa natango kungoka tatu longo kohi ye. Atuhe otwa hala okukala hatu futwa koRA meukililo peha lyokufutwa ku Zhong Mei, shaashi ina tu mu inekela we”.

Epetokonono lyomukundu

Oongeshefa odha li dha nyolele komukuluntu goRA Hippy Tjivikua momasiku 27 Januali taya indile opo pu monike ekandulepo lyomukundu nguka meendelelo oshoka oye wete kutya oshinima shika oshasimana unene meuvathanotsokumwe sho ngeyi tashi eta omaipulo kombinga yoshimaliwa nelongitho lyasho kuZhong Mei, ngoka taya ti ota tsikile okudhengela oongeshefa dhawo konankondongolo osho wo okudhina omautho gopauyuuki geuvathanotsokumwe.

Lwanima oya ti Zhong Mei iikando oyindji okwa kala nokushunitha pevi owina uuwindji wiilonga ya longwa nonando iilonga mbika ya longa ya ndhindhilikwa noya pitikwa komutaleli yopolojeka osho wo omukuluntu gopolojeka.

Ombapila oya tsikile tayi ti nonando kwa gandjwa omaziminino ngaka” iifuta yiilonga ya longwa oya tulwa manga pevi nenge ya tindwa okufutwa inaa ku talika komautho geuvathanotsokumwe. Oshinima shika osho etaa guluko lyetulo miilonga lyomilandu nosha tula oongeshefa dhetu muupyakadhi woshimaliwa.”

Oongeshefa dhika otadhi ti wo Zhong Mei okwa longa po iilonga mbyoka ya li yi na okulongwa po koongeshefa dhomoshilongo tadhi longo kohi ye nokupula ko oshimaliwa shiilonga shaali papitikilo lyawo.

Ombapila otayi ti: “ Oshiholelwa shiilonga ya longo nando hayo awike ongaashi okutula po iitenda yegameno nomamanya momunkulo gopate. Iimaliwa ya futwa molwa iilonga mbika inatu yi tseya nonando shika oshitopolwa sheuvathano lyetu. Omaihumbato ngaka olyo eyonagulo lyuuthemba wetu okumona oshimaliwa nolyo etaaguluko enene lyoompango nomautho geuvathanotsokumwe.”

Oongeshefa dhika otadhi ti wo omupukululi goongeshefa ooshona nodhopokati okwa gama kombinga yaZhong Mei peha lyokukalekapo nokusila oshimpwiyu uuwanawa woongeshefa dhomoshilongo.

“Sho omakemo ngaka twe ga fala kuye, ina ninga po sha nenge nee a ninge onkambadhala. Ihe okwa fa won aye a gama kombinga yaZhong Mei, ngoka anuwa taku fofodholwa he mu futu oshimaliwa,” ombapila ya nyola ngaaka.

Omunangeshefa omukwawo okwa lombwele Namibian Sun mEtitatu kutya oongeshefa dhomadhina Tangeni Investiment noInno Investments “odho unene dha gumwa koshinima shika”.

“Oto eta ohenda unene kuyakwetu mbaka. Otwa kala tatu kondjitha oshinima shika pauhandimwe ihe ngaashingeyi otatu shi kondjitha onga ongundu yimwe pamwe taye tu pulakene ngaa.”

RA okwa kutha ko oshikumungu shika

Omukuluntu goRA Tjivikua okwa lombwele Namibian Sun mEtitatu kutya aalongi yondjila aanene naashona naya ilonge omikalo dhomondjila dhokugandja omakemo gawo taye shi ningi okupitila momilandu dhoka dha tulwa po dhokugandja omakemo.

Okwa ti: “ Roads Authority ota tala ekemo kehe lya etwa ihe nakukonekiwe kutya omauvathanotsokumwe ngaka oge na iiholekwanima na ha kehe shimwe sha pumbwa okuya momakutsi goshigwana. Kapuna ando sha, sha gwana okuya miifokundaneki moshinima muka”.

Okwa koleke wo kutya: “ Okuyamukula komapulo goye, RA okwa mona ombapila ya za kaanangeshefa aashona ohela omasiku 27 Januali 2026 notwi ipyakidhila okutala omakemo ga gandjwa shi ikwatelela komilandu dheuvathanotsokumwe”.

E li muudhu

Zhong Mei Engineering Group okwa lombwele Namibian Sun kutya ye ke shi sho tashi popiwa nomompito ndjika kombinga yeshunithopevi inaa li yela nenge iifuta yiilonga ya longwa inaa yi futwa mondjila tayi longwa nawa yoTR7/1 pokati kuUsakos noKaribib.

Ongeshefa ndjika ota yi ti: “ Iifuta ayihe yiillonga ya talululwa nokupewa eziminino okuya komeho komutaleli gopolojeka ohayi ningwa momukalo gwa dhindwa nawa ongaashi euvathanotsokumwe ta li utha osho wo kuuwindji wiilonga mboka wa kwashilipalekwa pehala lyiilonga”.

“ Uuna omalundululo, eshunithopevi nenge okwaahauvathana kwa holoka, iinima mbika oya pumbwa okukundathanwa nokupotokononwa pehala lyiilonga tashiningwa pamautho geuvathanotsokumwe pokati kaamboka taya longo, ano omutungipate omunene, mboka taya longo kohi ye osho wo omutaleli gwiilonga,” ndika eyamukulo lya tumwa pa email.

Zhong Mei okwa gwedha po ta ti: “ Sigo onena, omutaleli gwiilonga ina koleka eshunithopevi lyasha ta li popi momahokololo ngaka”.

Zhong Mei okwa koleke kutya okwa monathana nomutaleli gwiilonga ihe ine mu lopotela nando omakemo ga zi koongeshefa dhika ne tadhi longo kohi ye nenge ando okuza kembwinda lyoongeshefa ooshona nodhopokati.

Ongeshefa oya ti: “ Oshinima ashike shoka twa li twa mono pambelelwa, ombapila yimwe twe yi pewa omasiku gaali ga piti, ndjono twa yamukula nale nokuli notwiipyakidhila nokuninga oshigongi ongaashi omautho geuvathanotsokumwe taga pula”.

[email protected]