Uuministeli wuundjolowele tau popile embestelo lyopaulumompumbwe lyomiti dhomalaria

Uuministeli wuundjolowele otau ti owa tameka nembestelo lyopaulumompumbwe lyomiti dhomalaria omolwuuvu wamalaria tau geye.

Omupopiliko gwuuministeli wuundjolowele Walters Kamaya okwa ti sigo ometi- 20 Mai, aavu 76 195 okwa kolekwa taya ehama omalaria noonakusa 132 oya mana oondjenda dhawo komukithi nguka okuza sho omalaria ga tamekele muDesemba 2024.

Kamaya okwe ekelehi omapopyo gwoshilyo shomOmutumba gwoPashigwana Job Amupanda sho a ti uuministeli wuundjolowele owa futu omunangeshefa N$450 000 molwomiti ndhoka dhi na owala N$175 000.

Amupanda okwa nyola komalungula kutya omakonakono ngoka ya ningi oshiwike sha zi ko otaga ulike kutya epangelo otali landa omiti dhokapakete kamwe mu na omiti ethele koN$1 500.

Okwa ti woo kutya uuministeli wuundjolowele owa landa omiti dhuupakete 300 koN$450 000.

Shi ikolela kuAmupanda, aanangeshefa oya landa owala okapakete kamwe komiti koN$580 nokuzimbuka noN$275 000.



Iizemo yomakonakono gomuule inayi gandjwa natango



Kamaya okwa ti aambesteli yomiti oyendji ya pulwa, omunangeshefa gumwe okwa li ta pula N$2 672.80 moshiwike kehe nomiti otadhi ke ya konima yiiwike ine. Omunangeshefa omutiyali okwa ti ote shi ningi koN$3 882.42 nota ka gandja omiti konima yiiwike ine, omanga ehangano lyoWest Pharmaceuticals olya pula N$1 500 nota li ka gandja omiti konima yoshiwike shimwe.

Omunangeshefa omutine okwa li ta pula N$1 318.91 nota ka gandja omiti konima yiiwike 4. Okwa gwedha po kutya ehangano lyoWest Pharmaceuticals olyo lya hogololwa molwashoka otali vulu okugandja omiti ndhoka dha pumbiwa konima yoshiwike shimwe. Kamaya okwa ti eindilo lyomeendelelo lyuuministeli li pewe uupakete 300 womiti oli li pevi unene nongamba ya tulwa po yokulonga omiti dhuupakete 60 000, shoka tashi ningitha okumbestela meukililo itaa ku vulika.

Omupopiliko gwuuministeli okwa ti uuministeli inau futa natango niizemo yomakonakono gomuule inayi gandjwa natango. Okwa ti woo kutya ombesteelinga ndjika oyi ikalekelwa manga manga uuministeli noshowo ehangano lyoNamRA tali tala nawa omikanda dhokweeta iilongwamo moshilongo.



Omuti gwoQuinine ogwo omutiyali hagu vulu okupangitha Malaria

Amupanda okwa ti woo kutya omuti gwoKiina (Quinine yo300mg) inagu uthwa we gu longithwe omolwiilanduli yago iiwinayi kaavu ishewe epangelo lyaNamibia olya tsikila ashike oku yi mbestela natango. Kamaya okwa ti embestelo lyomiti dhi sinde omalaria otali ningwa oshoka moshilongo mwa tukuka malaria ga geya noonkondo.

“Iitopolwa ayihe 10 hayi kala nomalaria kiitopolwa yokonooli nokuumbangalantuzilo, unene koZambezi, koKavango Uuzilo, Kavango Uuninginino, kOhangwena, kOmusati, nokOshikoto oya taalelwa komukithi nguka, naavu ye li poopelesenda 81% oya taandelekathana omukithi nguka omudhipagi,” Kamaya a ti.

Okwa ti woo kutya nonando omuti gwoArtemether-Lumefantrine ogwo hagu pangitha monomola yotango omalaria gakwalukehe, Okiina (Quinine) yo300mg oyo tayi ya monomola ontiyali.

“Omiti ndhika odha simana unene kaavu mboka haya ningwa nayi nenge haya ehama shampa ya longitha omiti ndhoka odho dhu uthwa nenge mboka ye li mongundu yaamboka ye li moshiponga shokukwatwa komikithi ngaashi oomeme ye li momategelelo.

"Edhiladhilo kehe kutya omiti gwoQuinine inagu pumbiwa we itali pukitha owala oshigwana ihe otali vulu okukanithila oshigwana omukumo mepango lyomalaria moNamibia,” Kamaya a ti. [email protected]