Uulithilo wokOtamanzi tau nyangwanyangwa molwepeya

Omapeya ngoka ga yonagula po uulithilo mOshikandjohogololo shaTamanzi mOshitopolwa shaMusati oga dhima — ashike aanangombe ngashingeyi yaahoka oye li muupyakadhi molwuulithilo wa pya po.

Omunashipundi gwOmusati Regional Farmers Union, Elia Kapofi, okwa koleke koshikundaneki shoNamibian Sun kutya epeya, ndjoka lya ziilile mOkashana sigo lye ya miitopolwa Omusati nOshana, olya hanagula uulithilo owundji noshowo oondhalate odhindji.

“Ngashingeyi epeya olya dhima, ashike aanafaalama otaya mono iihuna kiizemo yepeya, oshoka uulithilo owundji owa pya po,” Kapofi a ti. “Aanafaalama oyendji oya thiminikwa opo ya fale oongombe dhawo meni moshilongo moka mu na omeya ihe omwiidhi ogwa pumba.”

Omikunda ndhoka dha dhengwa dha lila kepeya ongaashi Uuthima, Omathagangawa, Uuku, Onambiga, Okalelemwa, Iinyayishe, Onampugulu, Okakewa, Onkaankaa, Amarika, Ombambi noNepanda.

Kapofi okwi indile epangelo, okupitila muuministeli wuunamapya, omeya netendululo lyevi, opo li kwathele aanafaalama mbaka okuya pa omwiidhi nomakwatho galwe.

“Otatu pula woo ekwatho kaanafaalama yopaipindi, unene mboka inaya gumwa kepeya, opo ye tu kwathe naashoka ye na po — unene tuu omwiidhi gwiimuna,” okwa ti.

Kamunsela gwoshikandjohogololo shaTamanzi Johannes Iiyambo okwa ti epeya olya dhimwa pakwatho lyiilonga yaakalimo, aanafaalama naakuthimbinga yi ili noyi ili.

“Ondalu yaNelyanga oya dhima. Inatu kanithila omwenyo gwomuntu nomagumbo inaga pya po, ashike oondhalate odhindji odha mona iihuna,” okwa ti.

Omulilo ogwa dhimwa kAakwiita, kAapolisi, kaanambelewa yaanaatili, oondoolopa, kaanangeshefa, opamwe naakalimo naafaalama yaahoka. Uuministeli wuundjolowele owa tumu aaniilonga yopaunamati opo ya kwathele uuna pwa holoka sha shopaulumompumbwe.