Schlettwein a ndjika oonyala mevi kombinga yomapopyo ge kombinga yoFishrot

Minista omukulu gwuunamapya Calle Schlettwein ota ti natango okwa ndjika oonyala mevi kombinga yaashoka a tile mo2019 kombinga yoshipotha shuulingilingi shoFishrot, omapopyo ge ngoka ge mu gandithile komupresidente pethimbo ndjoka Hage Geingob nosha ale shi mu kanithithe oshipundi she mOkabinete.

Schlettwein, opamwe nominista onkulu yoomina niinkwankondo Tom Alweendo noshowo ominista onkulu yomahangano ga yama kepangelo Leon Jooste, oya li ya kondema shi iwetikile oshikumungu shika mbalambala sho ye shi uvu, nomoshiwike sha zi ko natango okwa ti sho ya tile mo2019 inashi puka.

Schlettwein oye ominista yotango ya nyola kepandja lyoTwitter ( X monena) mesiku 1 Desemba 2019: “Okavideo kaAl Jazeera otaka ulike oshiholelwa sheyako lyoonzo dhopaushitwe dhoshilongo opo tashi putuka (Namibia) dha ya kwa po kehangano lyopaigwana palongelokumwe noohashikeshalye yamwe yomoshilongo shetu. Mbuka uufuthi. Ayehe ye li melyenge ndika naya pangulwe. Oshinima osha tameka nonashi adhe ehulilo woo.”

Konima yomasiku, Alweendo okwa nyola woo koTwitter kombinga yuulingilingi woFishrot kutya owo “uuwinayi nowa pumbwa okukondemwa kutseni atuhenituheni,” omanga Jooste okwa tile okwa “ehamekwa noonkondo” komahokololo guulingilingi mbuka.

“Uulingilingi wumwe nuufuthi, kutya nee omuntu okwa yaka N$1 nenge omiliona N$1, ashihe shimwe, nosha pukilila,” Alweendo okwa tile ngaaka woo pethimbo ndiyaka. “Ondi uvite nawa sho Aanamibia taya holola okwaauva ombili neyemato lyawo kombinga yuulingilingi mbuka, nondiitaala kutya otatu vulu okulundulula onkalo ndjika ombwinayi yi tu etele ekandulopo lyomukundu ewanawa.” Okwi indile woo oshigwana shi gandje omathaneko gasho kombinga ya nkene uulingilingi tau vudhwa mo moshilongo shetu.

Oshikwawo, Jooste okwa tile: “Uulingilingi ohau tamekwa kuyaali, gumwe ta gandja gumwe ta pewa (taamba), naayehe mbaka yaali oye na ondjo. Olundji ohandi uvu aantu taya ti aanambelewa yamwe ohaya dhengele ondhi peho unene. Ngele omahokololo ngono oge na uushili, nena otashi ti aantu yomwaalu gu thike pugwaanambelewa mboka nayo oha lungu nokwiitapula.”

'Ini ipa nande ombedhi'

Lwanima omahokololo oge ke ya kutya Geingob okwa gandele mbaka yatatu moshigongi shahugunina shoKabinete mo2019, okwe ya lombwele ya thige po iilonga ngele oyi iwete ye li pombanda ye vule yakwawo mboka ya mangwa po moshipotha shika. Ominista yuuyuuki pethimbo ndiyaka Sacky Shanghala noshowo ominista yoohi Bernhardt Esau oya mangelwe po mo2019 noye li natango mokakuma ya tegelela okupangulwa.

Schlettwein okwa ti ini ipa nande ombedhi, pethimbo ta popi kopolohalama yoThe Agenda, ndjoka tayi ka pita mbala koNetwork TV.

“Natango, otandi tumbula ngaashi nda tumbulile nale. Uulingilingi woFishrot shimwe shomiiholelwa ya nkene omahangano gopaigwana haga longitha nayi oonzo dhomiilongo opo tayi putuka palongelokumwe naanapolitika ya adha po mboka taya iyambapaleke owala. Naamboka owo uulingilingi. Nosho oshinima oshiwinayi. Onkalo ndjoka ohayi yono po oshilongo ashihe. Kape na nande oongoka te shi popile. Ondi itaala eitaalo ndjoka inali puka.”

Omahokololo gokwiimonikitha

Okavideo kaAl Jazeera kopethimbo ndjoka oka holola kutya oobiliona N$2.5 odha yakwa moshikondo shoohi moNamibia. Omapopyo gaSchlettwein, gaAlweendo nogaJooste oga li anuwa ga yemateke Geingob, ngoka e ya ula kutya otaya iyulike nokwiimonikitha.

“Otamu ihumbata mwa fa mwa yela mu vule yakweni. Otamu nyenyeta kombinga ya nkene oshipotha sho[Fishrot] tashi ungaungiwa nasho,” Geingob okwa li a lombwele oominista ngaaka. “Ngele inamu nyanyukilwa nkene oshipotha shika tashi ungaungiwa nasho, omolwashike itaamu thigi po iilonga?”

Nonande a gandwa, Schlettwein ota ti ita mwena.

“Oshili kutya sho ne twa kala mo nayi molwomaiuvo getu ga yooloka otashi vulu okufatululwa nokukuthwa ko sha yooloka kukehe gumwe,” okwa ti. “Omolwashike etokolo lyomondjila lya talika ko ongetilitho nenge ongoshinima shoka inaashi pumbiwa okupopiwa? Onda li ndu uva nayi shili koshinima shoka. Onda li ndi shi ngele otwa tokoleni atuheni kutya otu uvite ngeyi kombinga yuulingilingi, nena eitaalo ndjoka, ngaashi twe li holola naTom, ando olya taambiwa ko, ihe ando inali tu etela tu ye moshipyu.”

‘Swapo haye omupresidente’

Schlettwein, ngoka a li ulikwa kuGeingob opo a kale oshilyo shnOgundumutima yoSwapo, okwa dhenge omuthindo kutya ongundu tayi pangele inayi ningwa yokwiitaala momuleli paposi.

“Ongundu onene yi vule omupresidente. Ohatu imbi tatu ti ‘Swapo oye aantu, naantu oyo Swapo’. Ihatu imbi nande tatu ti ‘Swapo oye omupresidente, nomupresidente oye Swapo’. Aawe, hasho hatu imbi ngaaka. Onkene, osha simana okuholola omaiuvo goye noku ga hololela oshigwana shi ga tseye, nonande itaga opalele ayehe,” okwa ti.

Okwa gwedha po kutya Okabinete lwanima oke ki indika oominista dhaa holole omaiuvo gadho ongele shila ya pewa uuthemba ye shi ninge sho sha tokolwa kwaayehe.

“Osho naanaa, muukumwe otwa pumbwa oku shi simaneka, notwa kambadhala okwiiyutha kusho. Ashike oshili oondjika, ka twa li twa puka nande. Itandi vulu okushuna omutse miipeta molwoshinima shoka. Ondi itaala kutya kanda li nda puka. Omathimbo gamwe osha simana okupopya iinima mbyoka itaya opalele ayehe, oshoka hasho ashike oshinakugwanithwa shetu ongaaleli okukala tatu landula shoka aakomeho yetu ya hala nenge taya ti osho nashi ningwe.”

— [email protected]