Sankwasa a pe ombedhi RedForce molwa uuyelele woondjo dhe dhaNamWater

Minista gomapendulepo giilando niitopolwa yokomikunda James Sankwasa ota lundile ehangano lyoRedForce Debt Management molwa uuyelele wa pitithwa shi na sha noondjo dhe dhaNamWater.

Oshifo shoThe Namibia oshiwike sha zi ko osha li sha nyola kutya minister ngoka a kala noku indila ookansela dhi fute omayalulo gawo, naye oku na oondjo dhaNamWater tadhi ihilile poo- N$174 000 okuza momasiku omi- 30 Novomba 2025.

Omaandaha sho ta popi pepatululo lyoshigongi shomapukululo nomadheulo gaaleli yiitopolwa niilando yomOshana, Oshikoto nOhangwena, Sankwasa okwa ti ye ota ka futa oondjo dhe.

Ta koleke ta ti:”Otandi ka futa oondjo dhandje”, ta gwedha po wo ta ti nonando NamWater a li e shi yelitha omathimbo ga piti kutya omauyelele gomayalulo gopaumwene ina ga popiwa moshigwana, uuyelele we owe ya anuwa puuyelele molwaashoka ta fekele wa pitithwa mo koRedForce.

“Omuntu kehe na fute shoka e na okufuta. Kutya oya nyole lwomathele kombinga yaSankwasa, itandi shi hulithapo okulombwela ookansela ya fute oondjo dhawo. Omayalulo naga futwe,” Sankwasa ta tsu omuthindo.

Minista okwa ti oondjo tadhi popiwa odhomayalulo gehala lya yina ngoka a hulitha ko no ya li ye na ofani yimwe.

Omapopyo ngaka Sankwasa okwe ga popi sha landula omananathano a kala e na noRedForce, ehangano ndyoka lya kutwa komalelo giilando gamwe okugongela ko oondjo dhawo maakwashigwana.

Omauvathano

Mu Aguste 2025, Sankwasa okwa li a gandja elombwelo komalelo giilando noondoolopa opo gaa ha ninge omauvathano omape nehangano lyoRedForce go gi iyageke okuninga omauvathanotsukumwe goludhi ndoka monahiya.

Oomvula dha piti olundji minista okwa kala nokupa uusama omikalo hadhi longithwa kehangano ndika tati ota li eta omaupyakadhi gopaliko nogopapolitika maakwashigwana nomaakalimo moka ha li longele.

Okwa tsikileko nomuthindo tati moompito dhimwe omauvathanotsokumwe ngaka ga ke li pauyuuki oshoka ohaga pe ompito omugongeli goondjo a gwedheleko oopelesenda odhindji kiifuta ya gongelwa shoka i itaala kutya otashi thenyene kongudhi aakalimo nomalelo giitopolwa.

Mushika, RedForce okwa kuthile Sankwasa onkatu yopaveta. Mu Kotoba 2025, RedForce okwa li a tula mo oshipotha mompangu yopombanda mOvenduka ta pula opo elombwelo ndyoka Sankwasa a gandja kiilando li talululwe lyo li ekelwehi, taa ti omapopyo gaminista osho wo omaihumbato ge oganathangwa osho wo elongithonayi lyoveta.

RedForce ota ti omapopya gaSankwasa gamwe ngaashi kutya omauvathano e na niilando ka ge li paveta notaga hepeke, ka ge na uushili notaga shundula uukwatya wehangano lyawo.

Oombapila dhokompangu otadhi ulike kutya omayalulo ge li kedhina lyaSankwasa ogo gamwe ngoka RedFore a li ipyakidhila nokukonga ko oondjo, mwa kwatelwa omayalulo gaali gomoshilando shaKatima Mulilo ngoka nokuli omayakulo ga li ga tetwa ko iikando oyindji molwa omauvathano gokufuta ga kala inaa ga gwanithwa po.

Ehangano olya ti omananathano ngaka otashi vulika ogo ga eta omaipumomumwe ngaka.

Sankwasa okwa kala a nkankamena ketokolo lye ndika onga oonkambadhala dhokweeta omalunduluko megongelo lyoshimaliwa osho wo eitulomo miilonga momalelo giitopolwa.

Iilonga

Okwa tsu omuthindo kutya omalelo giilando naga itule mo mokugongelako gogene iifuta yawo, nuuna taga longitha omahangano gokugongela oondjo ngaashi RedForce, nashi ningwe kwa landulwa oompango dhoshilongo.

Sankwasa mOmaandaha pethimbo lyoshigongiilonga okwa ti:” Oya dhimbwa iilonga mboyka ye yi ya hoogololitha ya tidha owala iimaliwa peha lyokugandja omayakulo kaakwashigwana.”

“Inanndi tila, nondi ilongekidha okufalwa kompangu molwa omauvathano noondjuvanene dha ningwa komalelo giilando noRedForce go oge li ompinge nontotwaveta ndjoka tayi popi shi na sha nokulandula oondjo,” ta ti ngaaka.

Minister okwa gwedha po ta ti:”Inashi puka ando elelo lyoshilando ta li ningi euvathano noRedForce nenge ehangano lilwe lyokugongela oondjo, ashike shoka sha puka osho shoka shoku uvathana koopelesenda ntano nenge omulongi dhiimaliwa ayihe ya gongelwa kehangano ndika lyokukogongela oondjo. Euvathano ndika oli li pokati komugongeli goondjo nelelo lyondoolopa ndele ha nomukwashigwana.”

Sankwasa okwa ti wo omalelo giilando naga kale noshimpwiyu, na uuministeli kehe, iiputudhilo yepangelo noongeshefa oonene mokufuta omayalulo gawo gomeya.

Ta tsu omuthindo ta ti:” Oshinima shomalelo goondolopa haga matuka okukateta ko omeya nogomukulupe molwa oondjo dhoo- N$500, go taga thigi po aanangeshefa ye na oondjo N$50 000 nenge N$100 000 kashi li nawa”.

Okwa ti wo omahangano omanene naga landulwe opo ga vule okukala taga gwanithapo oshinakugwanithwa shawo shokuyambidhidha oshigwana, ga kwashilipaleke kutya oga gandja omakwatho ngaashi okulonga oopate nokukaleka oondoolopa dha yela.