Oshikakothimbo shiilonga yomukuluntuwiliki gwEpangelo monando a adha openzela

Konima yoomvula 18 ta longele ongeshefa yedhina Epangelo Mining,omukuluntuwiliki Eliphas Hawala okwa li a gwedhelwa ko oshikako shoomwedhi 12 nonande a adha okuya moshipundi shevululuko nokontalaka ye yiilonga ota yi hulu kuyele nuumvo.

Hawala, ngoka a lele ongeshefa ya yama kepangelo okuza omumvo 2008 moka ya totwa, okwa gwanitha omimvo omi-60 muSepetemba 2025, nomimvo dhokuya moshipundi shevululuko odha thamunwa nawa momilandu dhehangano. Okontalaka ye oya li ya hulu pambelewa momasiku omi-31 Januali 2026.

Omunashipundi gongunduleli kehangano Sencia Kaizemi-Rukata okwe shi koleke kutya nonando okontalaka yaHawala oya hula, ongunduwiliki oya tokola omo ye mu kaleke miilonga sigo opehulilo lyomumvo.

“Oshi li mondjila. Okwa adha omimvo dhokuya moshipundi she vululuko nokontalaka ye oya hula. Itatu ke mu pa okontalaka yimwe ompwe yuule womimvo ntano. Shoka twa tokola, onga aaleli yehangano, otwe mu pe owala omvula yimwe sigo opehulilo lyaDesemba 2026.” Kaizemi-Rukata ta lombwele Namibian Sun ngaaka.

Etaambathano lyiilonga

Kaizemi-Rukata okwa ti okugwedhela okontalaka yaHawala okwa ningwa opo u monike ethimbo lya gwana okuninga omalongekidho gekuto lyaangoka te mu pingene po.

Okwa ti ongunduleli yEpangelo nayo yoyene otayi longo kohi yoshikakothimbo shagwedhelwa. “Onga oshilyo shongunduleli, oshikakothimbo shetu otashi hulu mu Juni numvo, ihe otwa gwedhelwa ko woo oomwedhi hamano. Otatu longitha nduno ethimbo ndika tu tameke nokukuta. Shito, ohatu gwedhele ashike oshikakothimbo shomukuluntuwiliki gwehangano nuule woomwedhi hamano, ihe otwa mono kutya opuna iinima oyindji inaa yi pwa okulongwa. Opo shi ekuto li kale pauyuuki, otwa pumbwa ethimbo lya gwana,” ta ti ngaaka.

Omikanda dha monika koNamibian Sun odha ulike kutya okontalaka ompe ndjoka a pewululwa oya li ya shainwa momasiku omi- 26 Jamuali 2021- shika osha li sha ningwa opo omalongekidho gokumupingenapo ga kale ge li kolutenda omanga inaa ya mopenzela.

Okontalaka ye yiilonga yomumvo 2021 otayi ulike ha futwa oshimaliwa shithike N$1.4 million, komumvo, shoka shi thike pondjambi yoshimaliwa shithike po N$117 000 komwedhi.

Molwa egwedhele lyoshikakothimbo she, Hawala ota kala a longela ehangano ndika uule woomvula 19 e li omukuluntuwiliki sigo opehulilo lyomumvo 2026.

Omafekelo gokwiiningila po nawa

Oonzo dhimwe mepangelo otadhi fofodhola kuya Hawala anuwa okwa fa a kala nokuya moonkundathana opo ominista yiikwamina yi gwedhele oshikakothimbo she shivule puule womvula yimwe ndjoka a pewa molwa anuwa u uvite kutya kapuna omuntu gomehangano ngaashingeyi ta vulu okuya peha lye.

Omapulo ga tumwa kuHawala omanga enyanyangidho ndika inaa li ningwa ina ga yamukulwa.

Oshinima shika mehangano lyEpangelo Minnining shaakuluntuwiliki taya gwedhelwa iikakothimbo yiilonga nonando ya adha openzela nenge ookontalaka dha hula osha holoka momahangano ogendji ga yama kepangelo.

Omukuluntu goNampower Simson Haulofu okwa tsikile niilonga ye konima sho oshikakothimbo shiilonga she sha li ha gwedhelwa kominista okunkulu yiikwamina niikwamalusheno Natangwe Ithete sigo omuDesemba. Haulofu ota gwanitha omimvo 65 muMei.

Sha faathana ehangano lyokutunga omagumbo lyo National Housing Enterprise (NHE) okwa lopotwa wo nalyo omukuluntuwiliki gwa lyo ta ningi oonkambadhala opo oshikakothimbo she shi gwedhelwe nonando minista gweyambulepo lyiilando niitopolwa yokomikunda James Sankwasa a tindi eindilo lye.

Omaipulo kombinga yomalelo

Omutseyinawa kombinga yomilandu dhepangelo Ndumba Kamwanyah okwa ti okugwedhela iikakothimbo yiilonga yaakuluntuwiliki yomahangano gepangelo mboka ya adha oomvula dhopenzela otashi eta omaipulo omanene kombinga yokulela omahangano ngaka okakele ngele pu na uumbangi wa yela tau popile Oshinima shika.

“Okushitalela mokulela, okugwedhela iikakothinbo yiilonga yaakuluntuwiliko yomahangano gepangelo nonando ya adha okuya mopenzela osho wo konima iikakothimbo yawo ya adha pehulilo, otashi talika ko puna uunkundi momalelo okakele ngele pena omatompelo ga shewa nogeshi okuuvikiwako,” Kamwanyah tati, “Pamadhiladhilo gandje, shika otashi ulike uunkundi mokwiilongekidhila etaambathano lyomalelo, eidhopemo lyopapolitika nenge okukala ashike kwa inekelwa omuntu gumwe unene. Shika otashi shololitha, tashi kaninthitha einekelo moshiwana nokusitha uunye aapindiki na unene tuu sho mbika iiputudhilo yopapangelo ya pumbwa pkugandja oshiholelwa oshaanawa”.

Ta gwedha po ta ti oongunduleli dhomahangano otashi vulika dhi taalele omashongo ga nika oshiponga shi na sha nomilandu dhokuya mopenzela, ookontalaka nomatalululo ge na sha nokulonga ngele inadhi landulwa nuukeka”.

“Omukalo omwaanawa otagu pula opo ongunduwiliki ye yelithile oshigwana omatompelo getompelo lyawo, okweeta puuyelele nkene omuntu ta longi,okukwashilipaleka kutya okwa iyuthwa tuu kooveta dhi li po nomauthompango gomeni lyehanano, osho wo okukala kwa longekidhwa nawa nopethimbo omufango gwa nkene iilyo yayi pingenwa po”, ta ti ngaaka.

Okwa gwedha po ta ti: “ Oshinima sha simana andola okuulika omukuluntuwiliki ta kwathele,omanga ta ku ningwa ekuto li na uuyuuki,okukwashilipaleka kutya elelo ota li tsikile inaa ku yonagulwa omilandu nomalelo gomahangano”.

Ongeshefa yEpangelo Minning oya li totwa momumvo 2008 opo ku kwashilipalekwe ekuthombinga lyopashigwana mokuvukula, okokonga nokumona omauwanawa moonzo dhiikwamina moNamibia.