Oshigwana sha kwathele okamatyona ka ala ethimbo ele

Okamatyona koomvula 15 komomukunda Okatope moshikandjohogololo shaNgwediva, hoka hangele ka tetwa okugulu koondohotola molwuuwehame uunene, ota ka ti hwepo ngashingeyi konima sho oshigwana she ka kwatha sha landula eindilo lya ningilwe kuyinakulu.

Okamatyona, haka ihaka uvu ko omakutsi, oka kala ta ka ehama okugulu uule womvula noomwedhi hamano, okugulu kwa zinda nayi nombakiteli oya adhika ya taandela nayi shoka she dhiladhilitha oondohotola dhomOshipangelo shEpangelo shaShakati ando dhi tete ko okugulu kokamatyona.

Kakele, onkalo yako oye ya kuuwanawa, nayinakulu, Maria Timotheus (66), ota ti okatekulu inaka pumbwa we okutetwa okugulu.

Shika oshe ya konima sho oshikundaneki shoNamibian Sun sha kundanekele ehokololo lyaTimotheus ta pula ekwatho moshigwana momwedhi gwa zi ko.

Ehokololo olye enditha omwenyo gwongeleka yoHeart of God Ministries nongeleka oya futu oombete dhaSakaria, nongashingeyi ota mono epango moshipangelo shopaumwene shaMedipark.

Omukalimo gwomOvenduka, Phillipus Tobias, okwa gandja woo oshimaliwa sholefa opo okamatyona ka falwe koshipangelo.



Ehokololo lya kwathele okamatyona

Sho omutoolinkundana e ya talele po lwotango, okwa adhele okamatyona ka lala pelapi itaa ka vulu okwiinyenga. Ihe mehuliloshiwike twa zi, oka li ka nyanyukwa nokali ka ka kwata oohi lwopepi negumbo lyawo – pwe ya elunduluko enene.

Timotheus okwa pandula kehe gumwe ngoka e ya kwathwa muuwehame wokatekulu.

“Tangi unene Namibian Sun sho wa kundaneke ehokololo lyetu. Otatu pandula woo aantu mboka ye tu ulikile ohole noye tu yambidhidha. Kalunga na yambeke mpo mwa kutha,” okwa ti.

Timotheus okwa pulile ekwatho kAasamaria aanamutimahenda sho a li ta nyengwa okusila oshimpwiyu okatekulu ke kokathigwa.

Pethimbo ndiyaka, okwa li he ka fala ka ka mangululwe koKaklinika kaNgwediva, nokwa li ha ka landa iilugu nomalapi koapteka yopaumwene, oshoka mokaklinika kamu na iilugu nomalapi.

Oya li haya ka mangululwa lutatu moshiwike mOmaandaha, mEtitatu nomEtitano.



Kake na onzapo yevalo

Okatekulu ke ka ke na uuthemba woshilongo, onkene itaka vulu okushangithwa openzela yanuulema.

Mongashingeyi, okamatyona otaka mono epango moshipangelo shopaumwene shaMedipark mOngwediva, nepango lyako alihe olya futwa nale.

Okutala kepango lyonale lyaSakaria, okwa li a kala moombete moshipangelo shEpangelo shaShakati uule woomwedhi hamano nokwa lalekwa mo.

Omapulo ngoka ga tuminwa omukuluntu gwOshipangelo shEpangelo shaShakati Dr Ruben Kanime opo a yelitha nawa kombinga yonkalo yokamatyona netokolo lyopetameko kutya okamatyona otaka ka tetwa okugulu.

Namibian Sun okwi indile oshipangelo shi tye ko sha kombinga yokulunduluka huka nokutya po hwepo kokamatyona pomathimbo ngaaka, ihe oshipangelo inashi ka tya ko sha sigo opethimbo oshifo tashi yi komanyanyangidho.

Omupopiliko gwuuministeli wiikwameni Margaret Kalo okwa lombwele oshikundaneki shoNamibian Sun kutya uuministeli owa kwatathana naTimotheus nowa mona uuyelele kutya okanona otashi vulika ka valelwa mOshipangelo shEpangelo shaNgela, nonande kape na uumbangi tau shi koleke manga.

Kalo okwa ti uuministeli owu li mekwatathano naTimotheus opo ya konge omukulupe nakuvala yina yokanona, Selestina Shimhanda, omukalimo gwomOmongwa moAngola, opo a gandja uuyelele kutya okatekulu ke oka valelwa peni.

Uuministeli wuukashikekookantu owa kwatathana naTimotheus opo wu mu hunge omwenyo noku mu pa omayambidhidho te ga pumbwa. - [email protected]