Oshakati shatoto po oshikondo shoshipolisi yomoondjila shi koleke egameno moopate

Elelo lyOshilando shaShakati otali tseyitha pambelewa etotopo lyOshikondo shOpolisi yOmoondjila monkatu yokunkondopeka egameno moondjila, okunkondopaleka ekondololo lyooveta dhiihauto nokuhumitha komeho elandulathano mondoolopa.Sho a popi poshituthitameko moshiwike shika, Omukuluntu gwOpolisi moshitopolwa Oshana, Komufala Andreas Shilelo okwa popi kutya etotopo lyoshikondo shika endhidhiliko enene nolya simana momalunduluko gondoolopa mooonkambadhala dhokushonopaleka iiponga yomoondjila nokuhwepopaleka evuliko lyoompango dhomoondjila.Shilelo okwa popi kutya oshikondo shika osha totwa po kohi yoompango dhOveta yOmoondjila nIiyenditho yo-1999, Oveta yOmalelo gOondoolopa yo-1992 nooveta dhilwe dha guma oshinima shika, ndhoka dha pa omalelo gopaitopolwa oonkondo dhokukondolola omainyengo gomoondjila, ekalekopo lyooveta dhelelo lyondoolopa nokuhumitha komeho egameno moondjila. Okwa tsu omuthindo kutya iilonga yoshikondo shika oyi na uuthemba wu li kombanda okugandja egeelo lyiifuta nokukwatela po evuliko. “Elalakaneno enene lyoshikondo shika kali shi ashike lyokukwatela po evuliko lyooveta, ihe okugamena oomwenyo dhaakwashigwana, okugamena iitungomwa yoshigwana, okushonopaleka iiponga yomoondjila nokuundula eihumbato lyomondjila maalongithi ayehe yoondjila,” osho a popi. Shilelo okwa yelitha kutya egameno moondjila oshinakugwanithwa sha kwatela mo iiputudhitolo yEpangelo, iikondo yekalekopo lyooveta, omalelo goondoolopa, aahingi yiihauto, aayendi yokoompadhi, aahingi yoombasikela noshigwana ashihe momidhongonoko. Okwa popi kutya opolisi otayi tsikile nokukala yi itula mo mekwatathano lyopepi nOshikondo shOpolisi yOomondjila mElelo lyOndoolopa yaShakati okupitila miikonga yakwatathana, etaandelitho lyuuyelele nekwatho lyopambelewa opo ku kondjithwe omiyonena dhomondjila nokuhwepopaleka evuliko lyooveta dhomoondjila.Sho a li ta popi naaniilonga yoshikondo shika opo sha totwa po, Shilelo okwa indile ya gwanithe po iilonga yawo neitulomo lyopambelewa, uuyuki, nevuliko, ta popi kutya iilonga yawo otayi kwatha lela monkalonawa yoshigwana. Okwa indile wo aakalimo naalongithi ayehe yoondjila opo ya longele kumwe naanambelewa yekalekopo lyoveta nokuvulika kooveta dhomoomdjila, ta yelitha kutya evuliko kooveta olyo okugamena oomwenyo, okukeelela iiponga nokutota po oondjila dhi na egameno kukehe omuntu.Shilelo okwa tanga elelo lyondoolopa yaShakati mokutota po oshikondo shika, ta ulike einekelo lya kola kutya otashi ka nkondopaleka egameno moondjila, okuhumitha evuliko kooveta dhomoondjila komeho nokukwathela momapendulopo gopalandulathano gomondoolopa. Ngoloneya gwOshitopolwa Oshana, Hofni Iipinge, okwa popi kutya etotopo lyoshikondo shika ota li ulike onkatu ya simana mooonkambadhala dhokuhumitha komeho egameno moondjila, okunkondopaleka ekalekopo lyoveta yelelo lyondoolopa nokutota po onkalo ya gamenwa noyi li pamalandulathano mondoolopa.Iipinge okwa popi kutya iinakugwanithwa yoshikondo shika otayi ka pitilila ekondololo lyomainyengo moondjila, notayi ka kwatela mo etulomiilonga lyooveta dhelelo lyondoolopa lyomathikamo giihauto kage li paveta, omalandithilo gomomapandaanda, uuyogoki, omapiyaganeko goshigwana, uuyogoki womundhingonoko nelongitho lyopandunge lyomahala gomoshigwana. Ya tolokwa ku: Gottrieb Nambahu (gottrieb@nma.com.na)

Oshakati shatoto po oshikondo shoshipolisi yomoondjila shi koleke egameno moopate

Comments

Namibian Sun 2026-07-31

Please login to leave a comment

Oshakati shatoto po oshikondo shoshipolisi yomoondjila shi koleke egameno moopate

Comments

Namibian Sun 2026-07-31

Please login to leave a comment

Subscription Required to Access Content ×

Login

Subscription Required to Access Content