Opolisi ya lulilwa kokumangululwa kwaakolokoshi

Aakonakoni yiimbuluma mopolisi oya holola euvonayi lyawo sho ompangu olundji hayi gandja ombooloha kaafekelwa mboka ya longa iikulumuna ngaashi okudhipaga nomunyeka kwa homatwa.Shika osha landula sho aalumentu yatano ya mangwa po komudhingoloko gwaMonte Cristo mOvenduka mEtiyali konima sho ya kwatwa pethimbo ya li taya kambadhala okuyuga ehala lyontumba. Oyendji yomaafekelwa mbaka oya adhika ya pewa ombooloha molwiikoya yawo yonale yi ngulutila.Nonande opolisi oye shi pondola mokuya moshipala iilonga yawo mbika yokuyaka, aakonakoni yiimbuluma oya holola elimbililo lyawo kunkene oohandimwe aalongi yiikulumuna olundji haya tsikile nokupewa ompito yokwiifutila mo mondholongo.“Oto gandja ngiini ombooloha komuntu a dhipaga ashike konima yomasiku okwa dhipaga nale ishewe?” omukonakoni gumwe a pula. “Aantu yangapi ye na okusa opo aakolokoshi mbaka ya kale mondhologo sigo taya pangulwa nokupewa egeelo lyawo?”Omukonakoni gumwe ishewe okwa ti: “Otatu kambadhala notwi itula mo mokugamena nokupopila Aanamibia notatu tsikile okushi ninga twaa na oluthuwo. Ashike oshiyemateka. Aafekelwa ohaya pewa ombooloha inaku ithanwa aakonakoni yiimbuluma ya gandje shoka ya mono po. Ooahende ya kalela po aatamanekwa ohaya yi ikundu naayeti yiihokolola, nokuza mpoka aafekelwa ohaya mangululwa.”Ombepo yuukolokoshi Mokati kaalumentu mboka ya mangwa po oshiwike shika omu na omufekelwa e li kondje yondholongo konima yokupewa ombooloha miipotha yomadhipago gopaali, edhipago lyanakusa Patrick Hawala Hamupunda – lya tseyika nawa 'Waka' – ngoka a yahwa nokuhahalwa sigo omeso moKatutura mu Auguste 2023.Konima hanga yomvula noomwedhi mbali sho ya mangelwe po molwedhipago li nyanyaleka yaHamupunda, aafekelwa oonaku mu dhipaga Lukas ‘Big Show’ Nghishekwa, Festus Vulika Nehemia, Lukas Ndapanda Andreas, Kleopas Nghishikushitya Amutenya, Felix Armani Imfusi naModestus Mwawedange Wilhelm ayehe oya li ya pewa ompito yokwiifutila mondholongo.Oshipotha shika otashi pulakenwa ngashingeyi mOmpangu yoPombanda, moka aatamanekwa ya holokele lwoshikando shotango koshipala shomupevi panguli omukuluntu Hannelie Prinsloo omasiku sho ga li 16 Juli.Shi ikolela koonzo okuziilila mopolisi, Nghishekwa natango ota popilwa ishewe iimbuluma yokuyuga oyindji mbyoka ya ningilwa mOvenduka. Natango oku na m osha medhipago lyomugameni gwomaliko sho ya yugile ohauto ndjoka hayi humbata iimaliwa sha ningilwe kOkalongo mo2021.Emangululo lya nika oshipongaAafekelwa yatatu mboka ya mangwa po oshiwike shika oya adhika ye liwe mokashoko nale molwiikoya yawo oyindji, mwa kwatelwa oshiningwanima shomunyeka kwa homatwa momasiku 8 Juli poshitaasi shomahooli shaLafrenz Total Service Station, shoka sha yugwa N$560 000. Aafekelwa otya tamanekelwa woo oshipotha shonkambadhala yedhipgo, eyonagulo lyomaliko niipotha yilwe. Omufekelwa gumwe ngoka a mangwa po mEtiyali momunyeka nguka gwa ponyo – Elias Haifete, lya tseyika nawa ‘Small Boy’ – ota fekelelwa eso lyomunangeshefa gwomoVenduka Fiina Nghifikwa (39), ngoka a yahwa nokudhipagwa oshiwike sha zi ko moWanaheda.Nghifikwa nakuume ke oya hekelwa kehala lyontumba medhina lyokutala ehala ndjoka yah ala okuhiila omo ya kale haya zi.Aafekelwa oye ya yugu oongodhi dhawo komulungu gwondjembo, noya yaha Nghifikwa moshiponekela shika.Konima yoshiwike shimwe, Haifete okwa mangwa po nfekelwa ooyakwawo ngaashi Nghishekwa, Lotto Haindongo, Pinias Haiduwa naAmon Haikali.Omunyeka gwa ponyo koLafrenzOonzo mopolisi odha lombwele oshikundaneki shoNamibian Sun kutya omunyeka gwomEtiyali ogwa li gwo odheka mo ohauto hayi humbata iimaliwa yehangano lyuusekuliti woSouthern Cross Security ndjoka ya li tayi fala iimaliwa poshitaasi shoka shomahooli.“Aafekelwa oya li ya tokola okuponokela okaloli koSouthern Cross poKatutura Shoprite ashike inaye shi ninga we. Okuza mpoka oya landulile okaloli koLafrenz, omanga ongundu onkwawo oy aka yi li pendiki lyoostola lyoKhomasdal Hyper Mall,” omupolisi a hokolola.“Nonande ongawo, aapolisi oya adhike ya tseya omainyengo gawo okutala kiikulumuna mbyoka ya longa nale. Opolisi osho ye ya ngaaka nokuya mangela koLafrenz.”Oshi shololitha noshilulilaMoonkundathana noshikundaneki shoNamibian Sun mEtitatu, omupevi kakukutu komatanga gwopolisi yaNamibia Elias Mutota okwa holola euvonayi lye momulandu hagu longithwa, ta ti: “Aantu yamwe oye na iipotha ya adha komulongo. Ashike ohaya pewa ombooloha nohaya galukile moshigwana nokushi piyaganeka. Out ninge shike?”Okwa holola kutya ekwatathano lyopolisi nohofa eshona oshoka ohali endele mokulonga naayeti yiihokolola oshikwawo aapolisi kaye na enwethe mo lyasha komatokolo gaapanguli.Mutota okwa dhenge omuthindo kutya oompangu ohadhi tala ko aafekelwa ayehe yaa na ondjo sigo taya tokolwa komupanguli, naashika ohashi shi ningitha oshidhigu opo aafekelwa ya kale mokakuma manga ya tegelela okupangulwa.Okwa ti kutya itashi kala oshikumithi ngele aafekelwa yamwe mboka ya mangwa po Metiyali molwomunyeka gwokoMonte, otaya pewa ishewe ombooloha, nonande oya longa iikulumuna.“Tegelela owala wu tale. Otaya ka pewa ombooloha. Ngoka ogo omashongo twa taalela esiku nesiku oshoka oompangu odhi ithikamena po,” okwa ti.Mutota okwa koleke kutya onkalo ndjika ohayi hepeke nayi omadhiladhilo gaakonakoni yiimbuluma. “Onkalo ndjika ohayi shololitha aakonakoni yiimbuluma. Ondu uvite uudhigu wawo oshoka natse woo otwa lulilwa nayi. Oyi lulila nayi,” okwa gwedha po.FORGOTTEN CRIME: Patrick Hawala Hamupunda okwa dhipagwa muAuguste 2023. Aafekelwa oonakumudhipaga oya pewa ombooloha mo2024 gumwe gomuyo okwa mangwa po ishewe oshiwike shika mOvenduka konima sho ya li taya kambadhala okuyuga yuusekuliti ndjoka hayi humbata iimaliwa. ETHANO: EKULUNATANGO ISHEWE: Lukas ‘Big Show’ Nghishekwa, ta fekelelwa edhipago lyaHamupunda, okwa mangwa po konima yomunyeka gwa homata ngoka gwa ponyo oshiwike shika. ETHANO: Eliot Ipinge

Opolisi ya lulilwa kokumangululwa kwaakolokoshi

Comments

Namibian Sun 2025-08-12

Please login to leave a comment

Opolisi ya lulilwa kokumangululwa kwaakolokoshi

Comments

Namibian Sun 2025-08-12

Please login to leave a comment

Login