Oopate odhindji dhomoRundu kadhi na oteya

Phillipus Josef

Omuprima Elijah Ngurare okwi indile Elelo lyOndoolopa yaRundu li tale tango kokukwehopaleka oondjila dhomondoolopa, ta ti oondjila ndhoka dhi li mo ngashingeyi itadhi gwanene okutala komwaalu gwaakalimo yomondoolopa ngoka tagu kokelele.

Okwa ndhindhilike kutya ondoolopa yaRundu, oyo ondoolopa ontiyali muunene muNambia yi na aakalimo ya konda po100 000, oshikwawo ondoolopa ndjika oopate dhawo ndhoka dhi na oteya odhi li poopelesenda dhi li meni lyo10% okuyelakanitha noopate dhoteya mOvenduka.

Ngurare okwa popi ndhoka pethimbo lyetalelepo lye koshitopolwa shaKavango Uuzilo moshiwike sha zi ko.

“Ondoolopa yaRundu oya pumbwa oopate dholela dhoshinano shookilometa 500 opo ku kwashilipalekwe kutya aantu otaya ende ya manguluka nonuupu,” Ngurare a ti mEtitano.

Okwa ti kutya elelo lyondoolopa olya pewa iiwike iyali opo li ete po omathaneko galyo moka lya totha mo iitopolwa yasimana mokutunga oondjila.

Okwa gandja elombwelo kutya omathaneko noodokumende ndhika inadhi tumwa owala kombelewa ye ashike nashi tumwe woo kuuministeli womapendulopo giilando nomikunda.



Onkalo

Omunambelewa gwopashitopolwa koshikondo shoendjineeringa moRoads Authority (RA) Kennedy Chigumira okwa kwandjangele kombinga yuudhigu mbuka, ta ti ondoolopa yaRundu “kayi na netata lyoopate dhoteya dhoopelesenda 10&% ndhoka dhi li moKatutura mOvenduka”, nonande ondoolopa yaRundu onene noya simana.

Okwa dhenge omuthindo kutya okwaathikepamwe huka ihaku yi moshipala owala okweenda kwaakalimo ashike ohaku yi moshipala okumona omayakulo ga simana ngaashi okuya koskola nokopolisi.

Chigumira okwa fatulula kutya, sigo okonena, oopate owala dhoshinano shookilometa 22.4 moRundu odho dha longululwa nokutulwa oteya.

Oopate ndhika ongaashi: opate yookilometa 2.8 yaDr Sam Nujoma Oshiluku 1 oya longululwa, opate yoshinano shookilometa 2.4 yaDr Sam Nujoma Oshiluku 2 oya longululwa nokutamununwa mo, noshowo opate yookilometa 2 yaDr Sam Nujoma Oshiluku 3 oya longululwa woo.

Oshikwawo, opate yomamanya yokilometa 1.6 yaJohn Mutorwa, ndjoka ya li ya kwatathana nale noAMTA, oya longululwa, noshowo okaselekela koondjila mbali kokilometa 1 kondjila yoTR08-04.

Ehangano lyoRA olya longululitha opate yomamanya yookilometa 2.5 yaUnam- Dr Samuel Kavetu Mbambo ndjoka ya tulwa oteya ngashingeyi noshowo okapate komamanya kookilometa 10.1 ka za petsakaneno lyoondjila lyaUnam noskola yaMaria Mwengere nako oka tulwa oteya.

Chigumira okwa dhenge omuthindo kutya okutunga oopate dhoteya dhoshinano shookilometa 200 otashi ka lundulula onkalo moRundu nokutsakanitha oondjodhi dhaakalimo nodhaakuthimbinga woo.

Mayola gwondoolopa yaRundu Gabriel Kanyanga okwa koleke kutya oopate odha pumbiwa shili meendelelo, ta ti elelo lyoondoolopa otali ka longa mo eindilo lyaNgurare mbala.

Kanyanga okwa gwedha po kutya elelo lyondoolopa otali kaya moonkundathana naakuthimbinga naaniimpwiyu noshowo naanawino opo ya kwashilipaleke kutya omathaneko ngoka taye ke eta po oge na uuningilo, itaga pula ondilo notaga endele pamwe nomathaneko gondoolopa gokukoka.

[email protected]