Oonakuponokelwa oya tila sho aafekelwa ya mangululwa

Adam HartmanSwakopmund



Aahokanathani yomoSwakopmund mboka ya hupile moshiponokela megumbo lyawo muJuli 2021 otaya ti oya tila noinaya manguluka we konima yokuuva kutya aafekelwa yaali moshipotha shawo oya pewa ombooloha- oshikwawo thimba yi na ongodhi moshipotha shawo natango oku liwe mokashoko.Riaan Booysen (68) naElizabeth Rossouw (69) otaya ti oveta moNamibia itayi ya kwathele nawa, otaya ti “itashi uvikiwa ko nande” nokashi “na sha nande nokwiiyutha kuuyuuki”. Otaya ti oshipotha shika shoomvula ne osha kakekwa komakateko, omatameneko ga shuna pevi, nekwatathano lya nkundipala okuza kaayeti yiihokolola.



“Okumangulululwa kwaafekelwa ya nika oshiponga- taya pewa oombooloha, nonande ye na iipotha inayi pwa ya fa shawo, otashi ulike kutya oompangu dhetu itadhi longele kumwe niihakanwa,” Booysen a ti. “Otwa kanitha omukumo mudho.”



Aahokanathani mbaka oya ponokelwa megumbo lyawo momasiku 13 Juli 2021 pethimbo Rossouw a li ta dheulwa okupitila komalungula nosha li sha manguluka. Aalumentu yatatu oya mbandukile megumbo lyawo konima sho omweelo gwe egululwa opo ombwa yi ye pondje.



Booysen okwa hahalwa nekatana, okwa dhengwa noshiti sha teka koshitaafula, nokwa thigwa niilalo momutse, e ehama noonkondo nokwa zinda. Okwa kala moombete uule wiiwike iyali nokwa tandwa opo kaa kanithe eho lye lyokolulyo, oshoka oondohotola oya li ya tila kutya otashi vulika e li kanithe. Rossouw okwa li a kwatwa sho oombudhi dha li tadhi ya pula iimaliwa niipatululo yoseifa. Ombinga yimwe yoshiningwanima shika oya ningwa mo momeho gomudheuli gwe komalungula, ngoka a nothele ko mbala opolisi naashiinda mboka haya patrola momushiinda waw. Aafekelwa ayehe yatatu oya mangwa po muule wominute 15.Ongangala hayi iyaka aapolisi



Aahokanathani mbaka oye ke shi uva konale kutya thimba yi nongodhi moshingwanima shika, Andreas Victor Kaushi, oku na ondjokonona yokwiiyaka aapolisi.



Mo2017, Kaushi okwa kana pokati kopolisi yaMbaye nOmpangu yaMangestrata gwaMbaye konima sho a kwatelwe po molweyugo nondjembo yaa na olisensa. Okwa kana manga a li ta falwa kOmpangu mOvenduka molwoshipotha oshikwawo oshinene. Nonande a fadhukile po ngaaka, natango okwa pewa ombooloha mOmpangu yaMangestrata gwaKahandja – nonatango ishewe okwa fadhuka po. Sigo oompaka ina monika, oku liwe mokashoko.



Kokulilwa kwawo okwa gwedhelwa konima sho ya yile kOmpangu yaMangestrata gwaSwakopmund momasiku 19 Mai 2025, sho ya li yi indilwa ya holoke mompangu nokugandja uumbangi moshipotha shaafekelwa yaali mboka ya mangelwe - Gabriel Stephanus Emvula a Iiyambo – ashike oya kumwa sho ya adha mbaka yaali ya pewa ombooloha.



Oya kundana woo kutya omatamaneko gonale gonkambadhala yedhipago nogeteyo lyegumbo nelalakano lyokweehameka oga shonopekelwa komunyeka. Epulakeno lyiihokolola olya undulilwa komeho komasiku 9 Kotomba konima sho ahende a za kepangelo, ya kalela po aatamanekwa, a ndopa okuholoka mompangu, anuwa molwashoka ina tseyithilwa kombinga yesiku lyepulakeno lyiihokolola.



“Inatu lombwelwa sha kombinga yombooloha, iipotha ya shuna pevi, nenge omasiku gepulakeno lyiihokolola,” Rossouw a ti. “Konima yoomvula ne, otu uvite twe ethiwa koveta ndjoka oyo yi na okutu popila.”



Aahokanathani oya konga ahende yopaumwene noya tokola okutulila mo aafekelwa ayehe yatatu oshipotha oshikwawo shaa shi shoshimbuluma shampa shika sha pu.



Uupyakadhi uunene



Oshipotha shawo osha landula omapulo ogendji tagu pulwa kombinga yomulandu gwokugandja ombooloha moshilongo shetu. Oshiwike sha zi ko, Namibian Sun okwa kundanekele kombinga yankene opolisi ya lulilwa kaafekelwa ya longa iikulumuna oyindji ihe natango otaya mangululwa ashike.



Omupevi kakukutu komatanga gopolisi yaNamibia Elias Mutota okwa ti aafekelwa yamwe “oye na iipotha tayi adha nokomulongo” inayi pangulwa, ihe natango ohaya mangululwa inaku pulwa omagwedhele po gaakonakoni yiimbuluma.



Olopota oyu ulike nkene aafekelwa oyendji mboka mangwa po mOvenduka momwedhi gwa zi ko molwokambadhala yomunyeka gwa homata ya adhika ya za mondholongo molwiikulumuna ya longele, ngaashi omadhipago gopaali. Aafekelwa yamwe otaya kwatakanithwa nomadhipago ogendji, omunyeka kwa homatwa, okuyuga oohauto dhuusekuliti hadhi humbata iimaliwa.



Mutota okwa fekele kutya natango otashi vulika aafekelwa mbaka ya ka pewe ombooloha ishewe. “Otashi shololitha aakonakoni yiimbuluma,” okwa ti. “Ondu uvite uukwawo pamwe nayo muuwehame wawo, oshoka natse woo otwa lulilwa.”