Oomiliona N$60 dhaNamcor moondjato dhoohandimwe

Omakonakono ga ningwa kehangano lyoFinancial Intelligence Centre (FIC) oge eta puuyelele kutya iimaliwa oyindji- mwa kwatelwa oshimaliwa sha konda poomiliona N$60 osha futwa kehangano lyomahooli lyaNamcor medhina lyokulanda iikwatelwa yomahooli – oya yi moondjato dhayamwe yomaafekelwa ya tulwa miipandeko oshiwike shika.Okakomisi kOkukondjitha Uulingilingi oka kwata po ohela aamwayinathana Peter naMalakia Elindi – mboka oyo ooyene yongeshefa yedhina Enercon Namibia (Pty) Ltd – mekwatathano noshikumungu shomahooli shoka sha thiga ehangano lyomahooli li moondjo dhoomiliona N$380.Oya mangwa po konima sho Ompangu yoPombanda yaVenduka ya tokola opo oongeshefa ndhika mbali Enercon Namibia neErongo Petroleum CC omaliko gawo ga landithwe po, opo oshimaliwa shi fute oondjo dhaantu. Omululuntuwiliki gwOkakomisi kOkukondjitha Uulingilingi Paulus Noa okwa koleke okumangwa po kwawo, moka mwa kwatelwa nagumwe gwomaakulukadhi yaMalakia Elindi, nonande inashi yela kutya omukulukadhi guni a mangwa.Aanambelewa yalwe aakuluntu moNamcor nayo oya mangwa po mekwatathano noshipotha shika shokulunga nokwiitapula. Oyo nee ngoka a li nale omukuluntuwiliki gwehangano lyoNamcor Immanuel “Imms” Mulunga, ngoka a dhana onkandangala onene mokuinga omatokolo pethimbo euvathano lyokulanda omahooli lya ningwa. Cornelius “Cedric” Willemse okwa mangwa po woo, oye a li omukuluntu gwoshikondo sheandjaganeko lyomahooli moNamcor, oshikondo hashi mbestele nokupungula omahooli. Iilonga ye mbika oyo ye mu etele a ninge omudhaninkandangala moshikumungu shuulingilingi womahooli.Jennifer Hamukwaya, ngoka a li nale omukuluntu gwoshikondo shiimaliwa moNamcor pethimbo ndjoka, okwa tulwa miipandeko wo. Okwa mangwa po pamwe nomusamane gwe, ngoka edhina lye itali tumbulwa manga. Okakomisi oki itaali kutya oshikondo shaHamukwaya osho sha longekidha nokugandja iimaliwa mbika oyindji mbyoka tayi finyafinywa.Hugunina, Olivia Dunaiski, ngoka a li omukuluntu gwomahooli woo moNamcor, okwa mangwa po molwekuthombinga lye mokulanditha omahooli nokugwedhela ko aanangunga ethimbo. Iinima mbyoka tayi konakonwa.Ehangano lyoNamcor olya yelitha kutya aafekelwa ayehe ya mangwa po ihaya longele we ehangano lyawo. “Otwa tegelela okumanga po yalwe natango,” omupopiliko gwOkakomisi Josefina Nghituwamata a ti.Oshinenenima tashi konakonwa kOkakomisi osho omahokololo kutya mo2022, Namcor okwa gandja oomiliona N$60 a landelwe iikwatelwa yomahooli kongeshefa yedhina Enercon – ehangano ndjoka lya pewa oshinakugwanithwa shokwaandjaganeka omahooli kEtanga lyegameno. Euvathano ndika olya li lya ningwa nelalakano okukutha po omutitatu (omupokati) Enercon, opo Namcor a kale ta landitha omahooli meukililo kuuministeli wegameno.Kakele kaashono, lwanima osha ka monika mo kutya iikwatelwa mbyoka yomahooli oya li omaliko gEtanga lyegameno, nonande taku tiwa yehangano lyoEnercon. Uuyelele mbuka waa shi woshili owa thiminike Namcor a tsikile nokufuta oshimaliwa, shoka ngashingeyi kwi itaala kutya osha yi moondjato dhoohandimwe mboka ya mangwa po oshiwike shika – shoka sha tukulutha omadhiladhilo kutya pwa longithwa uukengeleledhi. Aapopepi naakonakoni otaya ti ehangano lyoFinancial Intelligence Centre (FIC) olya mono kutya iimaliwa yaNamcor oya yi moondjato dhaafekelwa yamwe mboka ya mangwa po. Omukuluntuwiliki gwehangano lyoFIC Bryan Eiseb okwa tindi ohela okutya ko sha. Aafekelwa mbaka otaya tamanekelwa iipotha ngaashi uulingilingi, uukengeleledhi, uumbudhi, elongitho nayi lyombelewa molwokwiihola mwene nokwaa ha futa iifendela yepangelo. Iipotha mbika oye etwa komikalo dhokumbestela itadhi ukile ko, okugwedhela ko ethimbo aanangunga inaashi talika nawa, niimaliwa ya futwa kuNamcor komahangano ngaka, ihe otashi limbilike.Ehangano lyoNamcor oshiwike shika olya ti itali ti ko sha manga kokumangwa huka – oshoka aafekelwa mbaka yomuyo kaye shi we aaniilonga yehangano lyawo.Omahooli ga landwa koondjoAakonakoni otaya konakona woo nkene Namcor a gandja oshimaliwa sha konda poomiliona N$380 mokulanda omahooli koongunga komahangano Enercon nErongo Petroleum – inaapu gandjwa sha naanaa noinapu futwa sha nandenande. Oongeshefa ndhika mbali odha kwatathana nohadhi wilikwa kaamwayinathana AakwaElindi.Shi ikolela kolopota yokomwedhi (Juli 2024) yehangano lyoIJG, oongunga dhaNamcor odha li dha konda po N$380, Enercon e na oongunga dha konda poomiliona N$114 omanga Erongo Petroleum e na oongunga dhaantu dhoomiliona N$266.OfandithaOmikanda dhompangu otadhi ulike kutya okuza mo2022 sigo 2023, Enercon okwa landa omahooli koongunga nokwa ndopa okufuta oshimaliwa shaantu ngaashi shu uvathanwa. Momasiku 10 Juni 2025, Ompangu yoPombanda yaVenduka oya gandja elombwelo kutya omaliko gehangano lyoEnercon no lyoErongo Petroleum CC naga landithwe po, notaya ka galukila kompangu momasiku 22 Juli ya tokole etokolo lyahugunina kombinga yonakuyiwa yoongeshefa ndhika mbali.Aakwaelindi oye na oopelesenda 75% dhiipambuliko mehangano lyoEnercon, omanga oopelesenda oonkwawo 25% odhehangano lyoAugust 26 Holdings – ndjoka lyuuministeli wegameno. Omauyelele gehangano otaga ulike kutya ehangano lyoAugust 26 olya landa iipambuliko mbika koomiliona N$15.Nonando ehangano August 26 inali kwatelwa mo miikumungu yewiliko lyehangano lyoEnercon, ekwatathano lyawo ongomunashipambuliko a yama kepangelo olye etitha omaipulo mokati kiilyo yOmutumba gwoPashigwana. Oshilyo nale mOmutumba gwoPashigwana MP Nico Smit okwa pula kutya omolwashike uuministeli wegameno wa ningi omunashipambuliko mehangano lyopaumwene lyokwaandjaganeka omahooli ihe inau shi popya noinau ninga omakonakono gomuule.Smit okwa ti kutya omauvathano goludhi nduka otaga vulu okukalitha mo nayi aagandji yiifendela ngele omahangano ga yama kepangelo otaga ndopa okuungaunga nawa noongeshefa dhawo. Sigo okonena, euvathano lyiipambuliko mbika pokati kehangano lyoAugust 26 noEnercon inali tseyika, nuuministeli wegameno inau fatulula kutya owa katuka oonkatu dhini, opo ku ungaungiwe noongunga odhindji dhaantu dhaNamcor.Aafekelwa, oye edhililwa mondjedhililo yOpolisi koSeeis popepi nOvenduka, noya tegelelwa ya holoke mOmpangu yoPombanda yaVenduka nena.

Oomiliona N$60 dhaNamcor moondjato dhoohandimwe

Comments

Namibian Sun 2025-10-14

Please login to leave a comment

Oomiliona N$60 dhaNamcor moondjato dhoohandimwe

Comments

Namibian Sun 2025-10-14

Please login to leave a comment

Login