Ontengenekothaneko yaShiimi ya kankamekelwa koshikukuta

Ontengenekothaneko yopokati komumvo yaMinista yIimaliwa Ipumbu Shiimi oya kankamekelwa koshikukuta shoka tashi tyakaleka moNamibia, nosho she eta ontengenekothaneko yi gwedhelwe noobiliona N$2.6 dhiimaliwa ya tegelelwa yi ka longithwe. Iimaliwa ya tegelelwa yi ka longithwe oyo onkambadhala yokukwashilipaleka aanamagumbo 300 000 otaya ka topolelwa iikulya okupitilamopolohalama yepangelo yokukondjitha oshikukuta. “Otwa gwedha po oomiliona N$698.8 kopolohalama yokukondjitha oshikukuta ndjoka yi li kohi yOmbelewa yOmuprima, nelalakano okugwedhela iikulya tayi topolelwa oshigwana shoka shi na okupewa iikulya yoshikukuta. Okutopolelwa huka otaku kwatha opo opolohalama yoshikukuta yi kwathe aanamagumbo 308 750 sigo 30 Juni 2025,” Shiimi a ti. Okutopolelwa huka okwa gwedha kontengenokathaneko ayihe yokukondjitha oshikukuta momumvo gwoshimaliwa 2024/25 sigo ya kondo poobiliona N$1.4, okwa ti. “Iiniwe mbika yepangelo, otayi holola esimano lyokweeta po omilandu tadhi kondjitha elunduluko lyonkalo yombepo nokutula po oonkambadhala dhokushonopeka iiponga yomeshito nokuguma kwawo omahupilo goshilongo okuza mpaka.”Iilanduli iineneShi ikolela ku Shiimi, oshikukuta shika tu li musho oshi na iilanduli iinene keliko lyoshilongo noshowo koshigwana ashihe koonono, unenene kaakwanaluhepo moshilongo. “Okuhwepopaleka iilanduli iinene tayi vulu oku tu adha molwoshikukuta, otwa tula po oshimaliwa sha tegelelwa tashi ka longithwa okupitila metopolo lyiikulya yoshikukuta nonokuyambidhidha aanafaalama, pakugandja oshimaliwa kiikunino oshowo okunkondopeka ooskema dhokugamena oshilongo shaa kanithe uuhupilo washo,” minista a ti.OThe National Disaster Management Unit nOmbaanga yUunamapya (Agribank) otayi ka yambidhidha wo aanafaalama mboka iilonga yawo tayi yiwa moshipala koshikukuta.“OThe National Disaster Management Unit otayi tsikile nopolohalama yokutopola iikulya yoshikukuta kiitopolwa niitopolwa nokaantu ya gumwa koshikukuta shoka tashi kotha oomiliona N$129.8 kehe komwedhi. Oshikwawo, okupitila mOmbaanga yUunamapya, otwa gandja opolohalama yomakwatho yi yambidhidhe aanafaalama mboka iilonga yawo ya gumwa nayi koshikukuta nosha kotha omiliona N$126.3 momumvo nguka gwoshimaliwa,” Shiimi a ti. Iikondo ya simana ya pewa iimaliwaOkutala kiikondo ya simana ya pewa iimaliwa, Shiimi okwa ti uuministeli welongo owa li wa tegelelwa wu tunge oonguluskola 512 momumvo nguka gwoshimaliwa, mokati kaandhoka oonguluskola 296 odha tungwa dha pwa sigo omu Septemba.“Uuministeli wuunamapya, omeya netendululo lyevi owa fula oomboola 115 nokulafulula oondama 20 kiitopolwa yokuushayi,noomboola dhilwe 83 noondama 34 tadhi ka fulwa momomvo nguka gwoshimaliwa. Otwa nyanyukwa oshoka okumbestela okwa pwa nokutunga koRundu Water Treatment Plant okwa tameka noshowo omeya gokohi yevi omatiyali gOhangwena Aquifer Well Field,” okwa ti. “Oshikwawo, ehangano lyoEnvironmental Investment Fund of Namibia (EIF) olya fula oomboola dha konda po 70 nuumvo dhongushu yomomiliona N$40, payambidhidho lyoshimaliwa okuza kepangelo nokomahangano haga gandja ooshali, naantu konyala 35 000 oya mono uuwanawa mbuka nosho wo iimuna ya konda po30 000.”Uuministeli woomina niikwankondo owa endelele ke woo opolohalama yawo yokwaandjaganeka olusheno kiitopolwa yokuushayi, okwa holola.“Momumvo nguka gwoshimaliwa, iiputudhilo 18 yepangelo nomagumbo 88 ge li komikunda oga tulwa olusheno niiputudhilo yilwe yepangelo 39 nomagumbo konyala 1 000 otaga ka tulwa olusheno momumvo nguka gwoshimaliwa.”Omalunduluko mIifendelaOkupooya kombinga yomalunduluko miifendela, Shiimi okwa ti ondjele yiifendela yomahangano ihaga fulu iikwamina otayi ka shonopola okuya poopelesenda 31% mu Apilili, nomomumvo gwoshimaliwa 2026/27 otayi ka shonopala noopelesenda 28%Okwa tseyitha wo okwa gwedhela ko kopolohalama yefudho lyokufuta iifendela yepangelo, ndjoka ya li yi na okukwisha nena. “Kombinga yopolohalama yefudho lyokufuta iifendela, otwa dhengelwa oongodhi olundji kiikondo yi ili noyi ili opo tu gwedhele ko ethimbo natango. Mekwatathano neitulomo lyetu okukaleka po okugongela iiniwe nokuhwepopaleka onkalo ombwanawa yomapungulolongitho moshilongo, otatu gwedhele ngeyi opolohalama yefudho lyokufuta iifendela noomvula mbali sigo 31 Kotoba 2026,” okwa ti. Shi ikolela ku Shiimi, okugwedhelwa huka okwa tala koomvula mbali dhomukithi gwoCovid-19, ngoka gwa shunitha pevi oondjambi dhaaniilonga oyendji. “Omauwanawa ga tulwa po inaga lunduluka. Nogo: iihohela nomageelo itaga ka talwa nande ngele oongunga adhihe odha futwa manga esiku eti-31 Kotoba 2026 inali thika. Natango, onda hala okweendulula kutya egwedhelo ndika olyo lyahugunina lyopolohalama ndjika, notatu indile aaniilonga ayehe ya gumwa koshikumungu shika ya ninge shoka ya pulwa manga esiku lyahugunina inali adha.”Eliko lyoshilongoPokati mpoka, oongunga dhepangelo odha tegelelwa dhi kale oohwepo noopelesenda 3.2% momumvo gwoshimaliwa 2024/205, Shiimi a ti. “Otatu tengeneke natango kutya oongunga adhihe dhomomumvo gwoshimaliwa 2024/25 otadhi kala poopelesenda 3.2% dheliko lyoshigongi, nomalunduluko omahwepo miihupithila okuyeleka nomithika dha tengenekwa montengenekothaneko yoyene. Oshikwawo, patema dhakwalukehe, oongunga odha ya pevi kashona noomiliona N$277.3,” minista a ti. Okushuna pevi kwoongunga otaku eta epangelo li lundulule omikalo dhokuhehela ngaashi tashi vulika moomwedhi dha hupa dhomumvo gwoshimaliwa, Shiimi a ti. Omikuli adhihe kumwe tadhi vulu okuhehelwa okuya pehulilo lyaMaarsa odha li poobiliona N$153.7, nodho oopelesenda 65.1% dheliko lyoshilongo, elunduluko ewanawa okuza poopelesenda 67.6% dheliko lyoshilongo okutala komumvo gwoshimaliwa twa zi ko.

Ontengenekothaneko yaShiimi ya kankamekelwa koshikukuta

Comments

Namibian Sun 2025-06-17

Please login to leave a comment

Ontengenekothaneko yaShiimi ya kankamekelwa koshikukuta

Comments

Namibian Sun 2025-06-17

Please login to leave a comment

Login