Omuniilonga omukolokoshi nokwa kolwa oha faula

Meniindjela gwongeshefa yOmuchiina yedhina Lictech Investment, Peter Lin, okwa ti omuniilonga Omunamibia ngoka ta monika e na ombele mokavidio ka andjagana noonkondo komalungula, okwa faula kiilonga omasiku gatatu nokwe ke ya ko a kolwa mOmaandaha omutenya konima yokupula a pewe ko kondjambi ye yokomwedhi.Andreas Shikomba, omuniilonga nguka, okwa longela ehangano ndika uule woomwedhi hamano adhike. Shi ikolela ku Lin, Shikomba anuwa okwa geye konima yokutindilwa okupewa ko ethele kondjambi ye, molwashoka oha hehela olundji a pewe ko kondjambi ye ye oha faula noonkondo.“Oha hehela (pula) iimaliwa olundji. Sho nde mu tindile moshikando shika, okwa geye nokwa kambadhala a kondjithe ndje,” Lin okwa lombwele oshifo shoNamibian Sun. Eipumomumwe olya tameke sho Shikomba a ponokele Xin, omwanamati gwameniindjela noshowo meeniindjele twa kwathele, nolya ka hululila molugodhi.Shikomba okwa kutha ombele ye nokwa dhenge Peter Lin moshipala, eponokelo ndika olya kwatwa mokavideo hoka ka andjagana noonkondo. Lin okwa ti Shikomba okwa tsu omuniilonga pamwe naye nombele. Mwaashoka Lin ta ti eipopilo, aaniilonga yatatu Aachiina oya nuka ko ye na iilwitho inayi tumbulwa, hugunina oye mu sindi nokudhenga noonkondo Shikomba.“Okwa kala ta tumbula ta ti, ‘Piindje iimaliwa yandje, piindje iimaliwa yandje.’ Sho twa tindi, okwe tu ponokele. Ka li a hala okupulakena. Omuntu owa li wete kutya okwa li a hala okweehameka shaangoka,” Lin okwa ti.Onkalo oya nayipala, naaniilonga pamwe naye yamwe oya kambadhala okukutha Shikomba ombele. Omuniilonga gumwe Omuchiina otaku hokololwa e ehama peke nomoshipala.Konima yokugodhipukwa, Shikomba anuwa okwa yi koshitaashi shomaahooli shi li lwopopepi, hoka opolisi ya nothelwa ko.Okwa falwa koshipangelo shepangelo shaKatutura nokonima okwa lundululilwa koshipangelo shaWindhoek Central Hospital. Kakele, anuwa okwiiyaka moombete. Ina galukila kiilonga okuza kesiku ndjoka.“Kandi shi mpo e li ngashingeyi. Okwa li e na okugalukila kiilonga, ashike ine ya ko,” Lin a ti.Omafano ga monika komutoolinkundana otaga ulike Lin e ehama moshipala nokiikaha. Lin okwa koleke kutya okwa patulula oshipotha nomakonakono gopolisi oge li metifa. Nonande etokolo inali ningwa ngele Shikomba omuniilonga gwawo natango nene aawe, Lin okwa ti kutya ehangano li ipyakidhila nokupotokonona omukundu nguka pakulongitha omilandu tadhi opalele.Oombangi otadhi tiOmuniilonga pamwe naShikomba ngoka a li po poshiningwanima okwa ti kutya Shikomba okwa li a lulilwa nokwa li a kolwa noonkondo. “Kandi shi shi kutya oshike she mu thiminike opo a pule oshimaliwa a lulilwa. Pamwe okwa li a hala a ka nwe ishewe. Okwa li a kolwa lela. Okwa kala ta ti, ‘Ando naya pendje nee ethele ndi vule okushuna.’ Otwa li tatu li omboloto sho a shendje ombaadhilila,” ombangi ya lombwele omutoolinkundana.Okwa gwedha po kutya nonande Shikomba oha nyenyeta naantu omalupita, uukolokoshi mbuka keu shiwikile. “Olundji, ngele owa pumbwa ekwatho lyoshimaliwa, oho pula aahona sho tashi nanwa kondjambi yoye. Ashike oshikando shika, okwe ya te yi thiminike. Okwe ya kuthile omwele? Aawe. Ondi wete okwa nwa sha pitilila, okwa kolwa.”‘Uuyelele wiifundja wa ha’Momukanda gwa pitithwa mOmaandaha, Peter Lin okwe ekelehi omapopyo gomunandjungu Michael Amushelelo sho ta ti oshiningwanima oshe etwa kondjambi inayi futwa. “Shikomba okwa kala omuniilonga gwehangano lyoLictech Investment CC uule woomwedhi dhontumba, ha kwata N$3 500 kehe komwedhi, nondjambi yoomwedhi adhihe ndhoka okwe yi futwa pethimbo. Ano, okwa kala nokupewa ko olundji okamaliwa kondjambi ye manga oshiningwanima shika inashi ningwa,” Lin a hokolola.“Otashi yemateke okumona uuyelele wiifundja wa ha mboka wu li ompinge nAachina moNamibia. Otatu indile oshigwana shaa tondokole kokupangula uuna shu uva ehokololo kombinga yimwe ayike. Osha simana okulonga nuuyuuki, noshili nesimaneko lyaantu ayehe, inaaku talwa kuukwashigwana womuntu,” okwa gwedha po. “Okutaandeeleka iifundja otau ku yono po ombili ndjoka tatu longo nuudhigu tu ete po.”Lin okwa kolekulula eitulomo lyehangano lyoLictech Investment CC mokukaleka omahala giilonga ga gamenwa nomawanawa kaaniilonga ayehe.Oonkambadhala dhokukwatathana naShikomba opo a tye ko sha, odha ponyo, oshoka ongodhi ye kaya li mombepo.– nikanor@nmh-hub.com.na

Omuniilonga omukolokoshi nokwa kolwa oha faula

Comments

Namibian Sun 2025-12-26

Please login to leave a comment

Omuniilonga omukolokoshi nokwa kolwa oha faula

Comments

Namibian Sun 2025-12-26

Please login to leave a comment

Subscription Required to Access Content ×

Login

Subscription Required to Access Content