Omuleli gwongundu yoBody of Christ Party anuwa a landa oVolvo yondilo niimaliwa yongundu

Omupresidente gwongundu yoBody of Christ Party (BCP) Festus Thomas okwa taalela omanyenyeto taga zi miilyo iinene yongundu sho tayi okwa longitha iimaliwa yongundu okulanda ohauto yondilo yoVolvo ye yopaumwene, omanga ashike ongundu yi na ombelewa yekondeina ndyoka li li pegumbo lye mOndangwa. Omapopyo ngaka oga eta unene ekuyunguto meni lyongundu, moka yamwe yomaaleli taya lundile Thomas kutya ota wilike ongundu a fa ta wilike “okandingosho” nongundu ote yi ningi po oprojeka yezimo konima ashike epangelo lya tameke okupa ongundu ndjika oshimaliwa. BCP okwa mono oshimaliwa sha konda oo-N$300 000 moshikakothimbo shotango shomafutilo sha landula omahoogololo gomomumvo-2024 moka BCP a mono oshipundi shimwe momutumba gopashigwana moka Thomas ha kuutumba. Omipopyo dha landula Thomas okuza kongunduAmushanga-ndjayi Beata Hosea otati ewilikongundu lyopombanda oli na etsokumwe lyoompangela dhankene iimaliwa yi na okulongithwa opo ku humithwekomeho ongundu shoka sha kwatela mo okutota ombelewa yopamuthika gu li nawa. Ihe okwa ti Thomas iimaliwa yimwe okwe yi longitha po miinima yopaumwene. Moonkundathana noNamibian Sun, Hosea okwa ti: “ Otwa li twa ningi omathaneko ga nkene tu na okulongitha oshimaliwa ihe konima ashike iimaliwa ya futwa moshiketha shongundu, okwa (Thomas) tameke ashike ta eta omaipumomumwe mokati kongundu opo a mone uupitilo wokulya oshimaliwa." Okwa gwedha po wo ta ti: “Nguka omuntu ha mono ondjambi kehe omwedhi molwa e li oshilyo shomutumba gopashigwana ihe natango ota longitha ashike iimaliwa yongundu okufuta iinima ye yopaumwene." Hosea okwa ti Thomas ina landa ashike osheenditho shoVolvo pwaa na ezimino okuza kewiliko lyopombanda lyongundu ndele okwa tsikile wo nokutaamba iimaliwa yongundu yomauwanawa gomalweendo nonando ha mono nale omauwanawa ngaka okuza koparliamente. Elelo lyopombanda lyongundu ota li thiminike Thomas a ze ko koshipundi Hosea opamwe naaleli yalwe yongundu oya nyola omukandakemo gwawo opo Thomas i ikuthe koshipundi, molwa ta ye mu lundilile etaaguluko lyooveta dhoBCP osho wo omauthompango kontotwaveta yi na sha nomahoogololo ndjoka ya indika iimaliwa yoongundu dhopashigwana yaa ha longithwe muuwanawa woshilyo shomutumba gopashigwana meukililo nenge shaa li meukililo. Omukandakemo ogwa ti: “Owa dhini ooveta no wa yi komeho nokwiilandela osheenditho niimaliwa yongundu pwaa na ezimino lyazi kongundumutima”. Onukandakemo ogwa ulike wo kutya Thomas Okwa kutha oshimaliwa shoo-N$20 000 moshiketha shongundu shono sha nuninwa omauwanawa gomalweendo gokomvula. Kuuyelele wumwe wa ziilile meni lyongundu, otaku fekelwa kutya omukulukadhi gwaThomas oku li gumwe gomwaamboka ye na uuthemba okunana oshimaliwa kokambo kombaanga kongundu shoka sha eta omaipulo omanene kutya etonatelo nesiloshimpwiyu lyiiniwe yongundu oye li tula ashike megumbo lyawo. Omukandakemo ogwa tsikile nokuninga omalundilo kutya Thomas ota ningile omatilitho iilyo mbyoka tayi nikaanika omatokolo ge osho wo okukutha pathimbo miilonga ookomitiye dhimwe dhomongundu ngaashi okomitiye yi na sha nomahwahwameko gopashigwana gongundu osho wo ewawa lyaagundjuka. Ayihe mbika oya ningwa inaa ku landulwa omilandu. Omukandakemo okwa tsikile ta gu ti: “Uukomitiye mongundu tayu uthwa kekotampango lyongundu owa fa ashike wu li mo okugoga aantu omihoka komilungu ashike paushili wowene ihayu longo sha." Thomas oohapu dhika okwe dhi ikala ta ti odho omalundilo ashike giifundja yoyeneyene. Sho a popiwa naye kombinga yaa shika, Thomas okwa ti: “Inda komeho nokunyola shoka wa hala. Ngame ondi ipyakidhila nomahwahwameko gongundu”. Nongodhi okwe yi tula po. - kenya@nmh-hub.com.na

Omuleli gwongundu yoBody of Christ Party anuwa a landa oVolvo yondilo niimaliwa yongundu

Comments

Namibian Sun 2026-01-16

Please login to leave a comment

Omuleli gwongundu yoBody of Christ Party anuwa a landa oVolvo yondilo niimaliwa yongundu

Comments

Namibian Sun 2026-01-16

Please login to leave a comment

Subscription Required to Access Content ×

Login

Subscription Required to Access Content