Omagumbo ga konda po30 ga pewa ooyene kOmuthiya

Ehangano lyoNHE olya gandja pambelewa iipatululo yomagumbo omape ga konda po30 kooyene yago mOmuthiya mEtitatu, mokukolekulula eitulomo lyehangano okweendeleleka etungo lyomagumbo taga vulika kukehe gumwe moNamibia.Omagumbo ngaka ga konda po30 oga tungwa koshimaliwa shoomiliona N$5.7 kehangano lyedhina Gongaleni Investment. Omagumbo ngaka inaga kala po okutungwa —naatungi yomatungo 70 ya za mOshikoto oyo ye ga tungu.Egandjo ndika lyongashingeyi lyomagumbo olye etitha mOmuthiya mu kale mu na omagumbo goNHE 80 sha ningwa owala muule womvula yimwe. Ehangano lyoNHE olyu uvaneke kutya otali ka tula ombunda moshihwa natango opo li vule okutungila Aanambia oyendji omagumbo. Otwi ilongekidha okutunga omagumboPethimbo ta popi moshituthi shika, omunashipundi gwewilikongundu lyoNHE Toska Sem okwa tseyitha kutya ehangano lyawo otali lalakanene okutunga omagumbo 2 000 momumvo nguka gwoshimaliwa 2025/26 nomomumvo kehe.“Oshilalakanenwa shetu osha yela, ehangano lyoNHE oli ilongekidha okutunga omagumbo, unene tuu okupitila mopoloyeka yokutula omalukanda giinyakwi pamuthika gwoshinanena,” Sem a ti. Opoloyeka ndjika, otayi kwatelwa komeho kUuministeli wOmapendulopo gIilando nOmikunda notayi kwatha aantu mboka ye na iiyemo iishona opo ya vule okutungilwa omagumbo goshinanena pakukala taya futu oshimaliwa shokuza poN$400 kehe komwedhi uuna ya tungilwa egumbo li na ondundu yimwe yokulala.Okukwatha opo oshilalakanenwa shika shi tsakanithwe, okwa tumbula kutya ehangano lyoNHE olya talele po ondoolopa adhihe moNamibia li tale evi ndjoka li li po, nolya li lya mono oopolota 2 500 mondoolopa dha yooloka, ngaashi moSwakopmund, Eenhana, Nkurenkuru, Rundu, Keetmanshoop, Mariental naKatima Mulilo. Omagumbo taga vulika kukehe gumwe Sem okwa pandula omalelo gondoolopa nomikunda omolwelongelokumwe lyawo, okwi indile ya tsikile nokulongelakumwe nonande opoloyeka yokutula pamuthika omalukanda giinyakwi oyi ka hule.Okwa dhenge omuthindo kutya ehangano lyoNHE natango oli itula mo mokutungila Aanamibia omagumbo omawanawa ga kola ngoka taga vulika kukehe gumwe. “Ondungethaneko yehangano lyetu yomo2025/26 - 2028/29 otayi ke tu kwathela miinyangadhalwa yetu yesiku nesiku, okutala kokukoka kwehangano lyetu, okulonga nawa noneitulomo noshowo eyakulo ewanawa lyaayakulwa yetu,” Sem a ti. Okwi indile aanelago mboka ya pewa omagumbo ngaka ye ga kwate nawa noya kale taya futupethimbo oshimaliwa shawo shokomwedhi, opo ehangano lyoNHE li vule okutungila yalwe omagumbo moshilongo ashihe.“Oshinakugwanithwa shetu haku tunga owala omagumbo ihe okuyambula po oshigwana okupitila mokutota po oompito dhiilonga nokunkondopeka oshigwana okupitila mokukala shi na aatungamagumbo,” Sem a ti.

Omagumbo ga konda po30 ga pewa ooyene kOmuthiya

Comments

Namibian Sun 2026-07-07

Please login to leave a comment

Omagumbo ga konda po30 ga pewa ooyene kOmuthiya

Comments

Namibian Sun 2026-07-07

Please login to leave a comment

Subscription Required to Access Content ×

Login

Subscription Required to Access Content