Okakadhona (14) ka kwatwa onkonga kuhe nokomumwayinagona gwako

Konima sho he (44) a kwatwa po molwoshipotha shekwatonkonga moshiwike sha zi ko, okakadhona koomvula 14 komomukunda Iino moshikandjohogololo shaNyaanya, oka lombwele aapolisi naakwanezimo kutya oka kwatelwe onkonga komumwayinagona kuyele nuumvo.

Shi ikolela kuyina yokakadhona haka ka longelwa omuyonena, Selma (halyo edhina lye lyoshili), ngoka a hokololele Namibian Sun oshiningwanima shoka sha ningilwa okamwanakadhona. Oshihakanwa, okanona okashona, nedhina lyako itali tumbulwa opo ka kale megameno.

Shi ikolela kopolisi yaShikoto, oshiningwanima shekwatonkonga osha ningwa mEtiyali lyoshiwike sha zi ko lwopotundi 20:00, sho taku hokololwa anuwa he yokakadhona haka e ki ithana kaye kondundu ye nokwe ka longele omuyonena.

Omufekelwa anuwa okwa adhikilila ta longo iilonga iikulumuna mbika naakwanezimo ye oya tokola ya lopotele opolisi oshiningwanima shika.

Lwanima okwa mangwa po nokwa holoka mOmpangu yaMangestrata gwaNdangwa mEtitano, nokwa li a tindilwa ombooloha.

Oshipotha oshu undulilwa komasiku 18 Septemba nomakonakono gopolisi otaga tsikile.

'Na kulupile mondholongo'

Selma mOsondaaha okwa ti okwa tonda iilonga yomuvali nguka nokwi indile epangelo li kwashilipaleke kutya "ota kulupile mondholongo".

Okwa ti kutya ye nomulumentu nguka oye na aanona yatatu: okanona okakuluntu oke na oomvula 17, taku landula nakulongelwa omuyonena nokankelo kawo oke na oomvula 11.

Uunona wawo uukwawo uyali otau tekulwa kaapambele ya yooloka.

"Hela ndu uvile onkundana ndjika, itandi vulu we okulya. Shampa tandi endaenda, ohandi tameke tandi kakama nomadhiladhilo otaga nangitha ndje. Ihandi kotha we naanaa. Onda tonda nayi iilonga mbyoka a longo," Selma a ti.

"Ota lombwele uuyuni kutya moshilongo kamu na aakiintu? Omolwashike a kwatele okanona ketu koonkondo nda ti? Onde ya inekelele okutekula okamwandje noku ka gamena wo, ashike peha lyaashoka, okwa tokola okulongela okamwandje iilonga yomilema," okwa ti.

"Na kulupile mondholongo, ina za mo nande mondholongo oshoka ngele okamwana ka ke li megameno sho ke li naye, ngele okombinga yuunona wulwe uukadhona?"

Selma, omukalimo gwomukunda gu li popepi nIino, nomolwonkalo, okwa li a zimine opo he yokanona ke haka, a ka putudhe ko kokanona kawo okuza sho ka li okashuushuuka ke na oomvula mbali.

"Onda li ndi wete shi li hwepo, opo e ka putudhe; nomolwashoka a kala nokanona oomvula adhihe ndhoka. Hasho oshinima nda li nda tegelela nande," okwa ti.

Selma okwa hokolola wo kutya kuyele nuumvo, okamwanakadhona oka li ka lombwele yinakulu (yina yahe) kutya omumwayinagona gwako, ngoka haya zi megumbo limwe, anuwa okwe ka kwata koonkondo, ashike aakwanezimo oye shi mwenene inaya lopotela opolisi oshiningwanima shika.

"Shoka tashi luluma ndje oshaashi yinakulu tuu ngu a lopota oshiningwanima shika oshitalalatala kopolisi shomwana a longo iilonga mbika yuudhudhu oye tuu natango a mwenene sho okamwandje ke mu lombwelele kombinga yokukwatwa onkonga kokatekulu," Selma a ti nokuyemata.

A hala a kale nokamwana

Selma okwa ti wo kutya konima yoshiningwanima shika, okwi indile opo a ka putudhe ko kokamwanakadhona, ashike aakwanezimo yahe yokanona oye mu tindile okanona ke.

"Uupyakadhi mboka ndi na ngashingeyi owo kuya kutha okanona kandje. Onde ya lombwele kutya onda hala oku ka kala nokamwandje oshoka oke li momashongo sho ke li puyo, ashike oya tindila ndje okanona kandje," Selma a ti.

"Nonande ndi kale omukwanaluhepo noihandi longo, ondi ilongekidha okunyangadhala opo tu lye nokamwandje. Inandi hala okanona kandje ka kale nayo nande alikana. Oyu uvitha ndje nayi noonkondo adhihe, nonda hala owala okukala pamwe nokanona kandje," okwa gwedha po kutya, "Ota galikana okamwana ka taambe ko onkalo ndjika nokutsikila nonkalamwenyo."

Selma oti indile epangelo li mu kwathe mokugalulilwa okamwana.

[email protected]