Netumbo ta ti natu vudhii mo uulingilingi moshilongo shetu

Omupresidente Netumbo Nandi-Ndaitwah okwa gandja elombwelo lya yaga kegonga kOkakomisi kOkukondjitha Uulingilingili nokOmbelewa yOmutamaneki ndjai, okwe shi ningi nelalakano opo aanambelewa mbaka ya tule ombunda moshihwa, opo uulingilingi wu vudhwe moshilongo shetu noya kwashilipaleke kutya aaniilonga ayehe otaya longo nawa iilonga yawo. Moshipopiwa she mOmutumba gwoPashigwana shoka sha leshwa peha lye kOmuprima Elijah Ngurare, Nandi-Ndaitwah okwa tumbula ngeyi: “Otandi indile Okakomisi kOkukondjitha Uulingilingi noshowo Ombelewa yOmutameneki ndjai dhi kondjithe nokuvudha mo uulingilingili moshilongo shetu.”Oshipopiwa she osha landula omaipulo ogendji ge li moshigwana kombinga yokukweenda kashona kwomakonakono nepangulo lyaanenentu mboka ya dhengela ondhi peho—ngaashi moshipotha shoFishrot shokupewa oombumbo, aafekelwa moshipotha shika oya tulwa miipandeko nale mo2019 ashike sigo onena inaya pangulwa natango.“Natu longeleni kumwe opo kehe Omunamibia a kale a tala ko okulunga nokwiitapula kutya okwa faathana nokunwa po oshilongo ondjumbu. Nomadhiladhilo ngono, epangelo itali ki idhidhimikila uulingilingi, omaipopilo niilonga tayi yiwa moshipala, oshoka onkalo kayi li ngaashi shito,” okwe shi yelitha nawa.Omupresidente okwa dhenge omuthindo woo nkene sha simana opo tu ulume nokweendelela mokugandja omayakulo koshigwana, okwe tu londodha kutya okutinda okutaamba ko omadhiladhilo gayalwe itaku ki idhidhimikilwa.“Katu na ethimbo lyokuhepekela muudhigu wokwiihola mwene. Kehe ngoka ta kala einda nendangalati tali imbi egandjo lyomayakulo ewanawa ota ka faalelwa kekuthikuthi ndjoka tali lalakanene okuthikitha omayakulo koshigwana shaNamibia.”Metumwalaka lye lya yela lyaaniilonga haya longele epangelo noshowo mboka haya longo momahangano ga yama kepangelo, Nandi-Ndaitwah ina nyanyukilwa nande omukalo gokushunitha iimaliwa moshiketha shepangelo moka ya zile omanga oopoloyeka dha simana hadhi kala inaadhi pwa.“Etokolo lyetweni, iimaliwa inayi shunwa we moshiketha shepangelo omanga pe na oopoloyeka inaadhi manithwa. Moshilongo ashihe koonono (miitopolwa ayihe 14 nomiikandjohogololo ayihe 121), ngaashi oshitumbula hashi tumbulwa ‘ontsi nayi tsime’,” okwa ti.Okwa kolekulula kutya epangelo lye otali tala kokulonga iikulya ya gwanenena okupitilila mokuyumudha po iikunino yepangelo nuunamapya nuuniimuna.“Okuza sho nde ya koshipundi momasiku 21 Maarsa 2025, otwa katuka mokutula miilonga oopolohalama ndhoka tadhi kwatha okuhwepopaleka onkalo nomahupilo gAanamibia aakwetu, oshiholelwa elongo lyoshali kiiputudhilo yopombanda tali ka tameka mo2026; nuumvo, iikunino yetu ayihe yepangelo otayi ka longwa ya pwa ko, opo tu vule okulonga iikulya tayi tu gwaneneni atuheni.”

Netumbo ta ti natu vudhii mo uulingilingi moshilongo shetu

Comments

Namibian Sun 2025-07-07

Please login to leave a comment

Netumbo ta ti natu vudhii mo uulingilingi moshilongo shetu

Comments

Namibian Sun 2025-07-07

Please login to leave a comment

Login