Natu longeni- Omupresidente

Presidente Netumbo Nandi-Ndaitwah okwa londodha oshigwana kutya oshilongo shoka itashi vulu okwiipalutha itashi ka simanekwa nande, okwa gwedha po kutya uunamapya wopashinanena otau vulu okukwatha Namibia a ungaunge noshikumungu shiikulya itayi gwanene nonkalo yokwaa na iilonga yi li pombanda noonkondo. Omupresidente okwa popi oohapu ndhoka mOmaandaha pethimbo a li ta popi naanaafaalama koshikunino shEtunda moshitopolwa shaMusati, hoka oko a hugunine nolweendo lwe lwokutalela po iikunino yi ili noyi ili moshilongo ashihe.

Mokukolekulula kutya uunamapya nuuniimuna owo oshitsa shopokati tashi talika tango ngele tashi ya kehomokomeho lyaNamibia, okwa longitha nokweendulula omatumbulo ganakusa presidente Sam Nujoma.

“Omukokoli presidente okwa tile oshigwana shoka itashi vulu okwiipalutha itashi ka simanekwa nande. Inandi hala okulela oshilongo itashi simanekwa. Ondi na okweenda nda yelutha omupolo oshoka otandi lele oshilongo sha simanekwa,” Nandi-Ndaitwah a ti.

Okwa dhenge omuthindo kutya uunamapya nuuniimuna ngele owa longwa mo nawa, otau kala ekankameno nongudhi yi shi okweegamenwa okuyelekanitha niikondo yilwe ngaashi shoomina, shoka hashi ndjungwandjwa nuupu noshi ikolela konkalo yeliko lyuuyuni.

“Uunampya nuuniimuna owo oshinenenima. Epangelo otali ka longela kumwe nane. Otatu mu pula opo mu tu tsakaneke ondjilakati. Itashi ti itatu tala wee kiikondolonga yilwe; otwe yi tala. Ashike nguka ogwo omuthima to vulu okuteka mugo nuupu okuyelekanitha nomikwawo,” Nandi-Ndaitwah a ti.

Omupresidente okwa longitha woo ompito ndjoka mokwiindila aaleli yopamuthigululwakalo moshitopolwa shaMusati, opo ya gamenene po omaliko gepangelo opo kaa ga yonagulwe nokukakekwa, mokutotha mo oshikunino shEtunda.

“Iiyakulitho mbika oyi lile po oku tu kwatha. Okuyi teya po nokuyi yonagula po otaku kateke egandjo lyomayakulo, otaku eta aantu ya kanithe iilonga, nokuya moshipala omahupilo ge li nawa,” omupresidente a londodha oshigwana.



Omashongo

Meniindjela gwoshikunino shEtunda Sackey Shilyomunhu okwa ti kutya mEtunda omu na uupolota 31 hau hiilwa.

Mokati kawo, 28 owa hiilwa muApilili, omanga utatu kau na ooyene natango. Oshitopolwa shaanafaalama aashona mEtunda oshi na uupolota 97 kehe kamwe kuunene woohekta ndatu, 67 womwaambuka owu na ooyene. Aanafaalama 16 ohaya longo uuoplota uyali kehe gumwe, payambidhidho lyomakwatho ga za kepangelo sha ningwa moomvula ndatu twa zi.

Oshitopolwa shaanafaalama yopokati oshi na uuplota 12 wuunene woohekta 12 kehe kamwe, noinau longwa naanaa, okwa ti.

Uupolota owala utatu owo owa longwa ngashingeyi, omanga uupolota omugoyi omatseyitho gawo gopaipindi inaga pitithwa natango. Shilyomunhu okwa ti kutya enenepalo (tamununomo) lyoshikunino olya taalelwa komashongo ogendji, mwa kwatelwa iifutomwa ya londa noonkondo konyala N$700 000 kehe komwedhi, okweeta po sha kwa ninga ondilo molwondando lyiilongithwa yi li pombanda, noshowo omashina taga nyanyangwa shoka hashi kateke ekuno neteyo.



Aanafaalama yi ithikamena po

Nonande pe na omashongo ngoka, oshikunino shika osho oshitopolwa sha simana shopolohalama yepangelo yokugwedhela eteyo ewanawa nokushonopeka e etemo lyiilongowa yuunamapya nuuniimuna moshilongo.

Ngoloneya gwoshitopolwa shaMusati Immanuel Shikongo okwa ti aanafaalama yomEtunda oyi itula mo mokukwashilipaleka kutya “otaya li shoka ya longa notaya longo shoka taya ka lya”.

“Eitulomo lyawo mokulonga omapya nokupalula oshigwana osho esipa lyombunda lyoshigwana shetu sho tatu tsikile nokuhumitha komeho uunamapya nomokukondja opo aagundjuka ya kale ye na oofaalama dhawo,” Shikongo a ti.