Natu hanganeni - Ngoloneya omupe gwaShana

Ngoloneya omupe gwoshitopolwa shaShana Hofni Iipinge okwi indile aakuthimbinga naaniimpwiyu ayehe ya longele kumwe opo ehumokomeho li endelele noya kwashilipaleke kutya kape na omukalimo gwomoShana ta thigala monima. Pethimbo ta popitha lwotango aakuthimbinga naaniimpwiyu moshitopolwa shaShana. Shika osha ningilwa poombelewa dhElelo lyOshitopolwa shaShana mEtitatu, Iipinge okwa dhenge omuthindo ku nkene sha simana okukala twa hangana, tatu longo nawa nokukala nelelo ewanawa petameko lyelelo lye. Oshigongi shika osha gongalwa kaakwanepangelo, aaleli yopamuthigululwakalo, ookamunsela yomalelo gondoolopa, aanangeshefa naampwiyu yalwe ya yooloka.“Onda thikama mpaka ndi uvite etumba sho ndi li ngoloneya omupe gwoshitopolwa shika,” Iipinge okwa ti.Okwa holola olupandu lwe kOmupresidente Netumbo Nandi-Ndaitwah sho e mu inekelele oshinakugwanithwa shokulela oshitopolwa shaShana. Okwa pandula woo ngoloneya omukulu Elia Irimari, sho a wilike oshitopolwa shaShana pomathimbo omadhigu, mwa kwatelwa oshivu shoCovid-19.Iipinge okwa ti elelo lye otali ka kambadhala okuukitha oopolohalama dhehumokomeho moshitopolwa naandhoka dhehumokomeho lyoshilongo, unene ngaashi omukandauvaneko gwoSwapo gwomo2024 noshowo Omathaneko goPashigwana Omatihamano ngoka ge li pokutulwa miilonga.Oshipalanyolo shomukandauvaneko, ‘Uukumwe momayooloko, okumona uuwanawa moonzo dhetu dhopaushitwe nenkondopeke lyaagundjuka molwehumokomeho tali tsikile', otagu ka kwatha mokukala oshiwilikitho miilonga ye, okwa ti. “Aakalimo yomOshana oya pumbwa omayakulo omawanawa ngoka taga longo noshili, taga yamukula meendelelo koompumbwe dhawo noga kwatela mo ayehe,” ngoloneya a ti, okwa dhenge omuthindo kesimano lyokulongela kumwe nekwatathano ewanawa niikondolonga ayiheyihe.Epandja epeIipinge okwi indile aakuthimbinga naaniimpwiyu ya yooloka ya dhane onkandangala onene mokweeta omalunduluko moshitopolwa okupitila mokukwatha oshigwana, okutunga nokwoopaleka omatungo, okweeta po oompito dhiilonga, okukokeka eliko lyoshitopolwa nokugamena aakwashigwana mboka ye li moluhepo nenge momaudhigu galwe.Okwa gwedha po kutya ombelewa ye oye egulukila kehe gumwe, okweeta po ombepo yoonkundathana, elongelokumwe nesimanekathano.“Iilongapondoli tayi longwa koshitopolwa shetu itayi ka vihilwa koopoloyeka ndhoka twa manitha ihe okeinekelathano ndjoka tatu tungu po noshowo kuukumwe mboka tatu kaleke po,” okwa ti.Okwi indile aaleli ayehe, aalelwa nomahangano ga longele kumwe naye mokutunga po shoka hi ithana kutya oshitopolwa shaShana sha yambapala, shi na ombili noshe edhilila ayehe, okwa gwedha po eyokomeho otali ka adhika uuna owala tatu longele kumwe, tatu longo nawa noneitulo mo.“Onda tegamena okulongela kumwe nane amuhe sho twa pandjuleni epandja ndika epe lyeyokomeho lyashili lyoshitopolwa shaShana,” Iipinge said.

Natu hanganeni - Ngoloneya omupe gwaShana

Comments

Namibian Sun 2025-07-15

Please login to leave a comment

Natu hanganeni - Ngoloneya omupe gwaShana

Comments

Namibian Sun 2025-07-15

Please login to leave a comment

Login