NAMPOL yiikaleke kokule nehololo lyomusholondondo gwomauyelele giihakanwa yomakwatonkonga

Opolisi yaNamibia (NAMPOL) oya ikaleke kokule noolopota dhiimbuluma ndhoka dhi li mepeko muna edhina lyoshihakanwa shekwatonkonga, taya popi kutya ombapila ndjoka inayi za momilandu dhawo dhopambelewa dhokugandja omauyelele noya andjaganekwa pwaana epitikilo. 

Eyamukulo ndika olya zi ko konima yomaipulo moshigwana sho olopota yiimbuluma yi na sha nekwatopo lyondohotola gwomoshipangelo shaNandjokwe, Dennis Noa, ngoka ta fekelelwa ekwatonkonga lyomulumentu gwoomvula omi-26, ya li yi na edhina lyanukunyenyeta lyuudha nomauyelele gopaumwene.

Mokuyamukula omapulo okuza ko-Network Media Hub (NMH), omupopiliko gwOpolisi yaNamibia, Omupevikomfala Kauna Shikwambi, okwa popi kutya ehololo lyomadhina giihakanwa miipotha yiimbuluma yomilalo kali li metsokumwe nomilandu dhaNAMPOL. 

Okwa gwedha ko kutya odokumende ndjoka tayi andjaganekwa yi na sha noshipotha shomOnandjokwe inayi za kombelewa wuupopiliko (PR) yopolisi noinayi kwatelwa molopota yopambelewa yiimbuluma niiningwanima yiiponga yokehuliloshiwike, ndjoka hayi andjakanekwa kehe Osoondaha.

PaShikwambi, oshikondo shopolisi onkene nasho tashi ipula kombinga yeandjaganeko lyodokumende ndjoka tayi monika ya fa yomeni shaali pa pitikilo, ta londodha kutya ehololo lyuuyelele otali vulu okudhinitha omakonakono ngoka ge li metifa, okutula uuyelele wopaumwene giihakanwa moshiponga, nokugwitha po einekelo lyoshigwana mopolisi. 

Okwa gwedha ko kutya opolisi itayi vulu okukwashilipaleka ngele olopota ndjoka tayi andjaganekwa moshigwana oyoshili tuu nenge oyoludhi lwa lundululwa mokati komaandjaganeko.

Shikwambi okwa zimine kutya ehololo lyedhina lyoshihakanwa shoshimbuluma shomilalo otashi vulu okutula omuntu moshiponga shokulundilwa no kuyuulwa moshigwana, eehameko lyopamaiyuvo lya gwedhwa ko, nomeho ogendji moshigwana inaaga halika. 

“Omolwomatompelo ngaka, oshikondo shopolisi oshiitulamo nokutsikila okugamena uuyelele wopaumwene nesimaneko giihakanwa ayihe, unene tuu iihakanwa yiimbuluma yomilalo,” osho a popi.

Okwa popi kutya NAMPOL oya pameka omilandu dhegameno lyuuyelele konima yiiningwanima ya pita ya kwatelamo ehololo lyaana epitikilo lyodokumende dhomeni, noya dhimbulukitha iilyo ayihe kutya uuyelele awuhe wa nuninwa okutseyithilwa oshigwana owu na okutseyithwa ashike okupitila mombelewa yuupopiliko. 

Shikwambi okwa gwedha ko kutya oshikondo shopolisi osho tashi konakona nokutala aluhe omilandu dhasho dhokulopota opo shi kwashilipaleke kutya omadhina nomauyelele galwe taga dhimbulukitha iihakanwa yiimbuluma yomilalo ohaga kuthwa mo manga uuyelele inawu pitithilwa iikundaneki.

Okwa indile wo aatoolinkundana ya kwashilipaleke uuyelele okupitila mombelewa yuupopiliko manga inaya nyanyangidha, unene tuu mboka yeli konyala tayi itopolathananene omaueyelele gaa li pambelewa, omanga a koleke ishewe eitulemo lyopolisi okugamena omauyelele gopaumwene nokugeela iilyo mbyoka tayi adhika ya teya omilandu dhawo. 

Noa okwa holoka mOmpangu yAatokolihapu mOndangwa mOmandaha. Okwa tindilwa omboloha noshipotha she osha undulilwa keti 27 Juli 2026 omolwomakonakono gopolisi ga gwedhwa po neindilo lyomboloha lyopambelewa.