N$220 000 gaHengari okwa li te ke ga ‘longitha kofaalama ye’

Ominista onkulu yuunamapya Mac Hengari (59) mEtitatu okwa lombwele ompangu kutya iimaliwa mbyoka a adhika nayo muApilili, noyo ye mu mangitha noku mu tamanekitha miipotha oyindji, okwe yi nana kombaanga nelalakano lyoku ke yi longitha kofaalama ye, mwa kwatelwa okufuta oondjambi dhaaniilonga.

“Esiku ndjoka, manga inaandi kwata po, onda yile kofaalama nomukulukadhi gwandje, Zelna Hengari, nonda galuka ko esiku ndjoka. Onda li nda ninga oshilage nomutamanekwa pamwe nangame, oshihakanwa noshowo omukalelipo gwawo gwopaveta, Elia Shikongo, opo tu ikunde nkene taya ka ungaunga nokutya omalundilo gekwatonkonga kage shi goshili .” Hengari a ti ohela.

“Onda li ndi na N$220 000 kolutu pethimbo ndjoka, iimaliwa mbika onda li tandi ke yi longitha kofaalama – mwa kwatelwa okufuta oondjambi dhaaniilonga noshowo iimpwiyu yilwe,” okwa fatulula.

Ominista yuunamapya osho ya hokolola ngaaka pethimbo lyepulakeno lyombooloha ye mOmpangu yaMangestrata gwaVenduka kombinga yiiningwanima mbyoka ta holola kutya okukwatwa po kwe “miineya” momasiku 26 Apilili 2025.

Epulakeno lyombooloha olya tameke mOmaandaha koshipala shomupanguli mangestrata Monica Andjaba.



E shi uvile miikundaneki

Shi ikolela ku Hengari, ngoka a kalelwa po paveta kuahende gwopaumwene Mekumbu Tjitere, ota ti okwe shi uvu owala kutya okwa patulilwa oshipotha konima sho a ulikwa a ninge ominista yuunamapya muMaarsa nuumvo, nonande omuyonenwa okwa patululile oshipotha shoka muNovemba 2023 mOshakati.

“Konima sho nda langekwa ndi ninge ominista yuunamapya, opo ndu uvite omahokololo gekwatonkonga, okuziilila miikundaneki nomiifo,” Hengari a lombwele ompangu.

Minista omukulu guunamapya okwa lombwele ompangu kutya esiku ndjoka a kwata po, okwa yile kombelewa yaShikongo ngaashi yu uvathana nokwa kala a tegelela yakwawo ye ye.

“Onda kala nde ya tegelela uule woominute 30 sigo 40, ashike inaye ya,”okwa ti.

Okwa lombwele ompangu kutya omukiintu ngoka te mu lundile ekwatonkonga “okwe mu pula ya tsakanene koFrancesco Restaurant mondoolopa, nokonima yo inda mo ndi ye mo oyindjiyindji, onda zimine.”

Sho a thiki, oshihakanwa nomumwayinamati, ngoka e li omutamanekwa pamwe naye ngashingeyi, oya adhika ye mu tegelela nale.



Etsakaneno

Hengari okwe ekelehi omapopyo kutya oya tsakanene noshihakanwa mo2019, omumvo ogo tuu ngoka aniwa omo a kwatwa koonkondo.

“Inandi tsakanena nande naye mo2019. Pethimbo ndjoka, onda li koUK ndi ipyakidhila neilongo lyandje lyuundohotola. Onda tsakanene naye lwopehulilo lyomumvo 2021. Onda tseyithila opolisi kutya nayi indile ompangu opo ya pewe epitikilo ya tale mboka nda dhengela nuunake, opo ya koleke oohapu dhandje,” Hengari a ti.

Okwa fatulula woo kutya sho omumwayinamati gwoshihakanwa a kambadhala opo a potokonone omukundu nguka, oshoka kasha li tashi vulika sho oshihakanwa sha adhika sha gana nale.

“Okutya hasho owala ngeyaka kasha li tashi vulika, oshoka otashi vulika a pogole nokumangwa shaashi okwa gana ihe okwa gandja uuyelele wiifundja. Oshikwawo, shaashi oshipotha oshekwatonkonga lyokanona, osha talika ko shi li momake gEpangelo ngele otali tamaneke nenge itali tamaneke aafekelwa,” okwa lombwele ompangu.

Omutamanekwa pamwe naye, ngoka a holoka mompangu mOmaandaha kee na omukalelipo gwopaveta, ihelmEtitatu okwa li a kalelwa po paveta ku ahende Nafimane Halweendo.

Halweendo okwi indile a pewe okathimbo opo a talulule nawa uumbangi wa gandjwa koombangi. Nomolwashoka, oshipotha oshu undulilwa kOmaandaha, 21 Juli, opo Epangelo naahende Halweendo ya ka pule nawa okanaku.

Aafekelwa mbaka yaali otaya tamanekelwa iipotha ngaashi okuya oveta moshipala, okugandja sha nelalakano lyokuheka oshihakanwa nokutsatsamidha okupogola. Shika osha landula omahokololo kutya Hengari okwa li ta kambadhala okupa omukiintu nguka ombumbo yoN$220 000 muApilili nelalakano a tye omahokololo gekwatonkonga kage na uushili.