Muhongi na lande evi – Elelo lyoondoolopa yaNkurenkuru

Omunambelewa omukuluntupitithi gwelelo lyondoolopa yaNkurenkuru Petrus Sindimba okwa yelitha kutya ondoolopa itayi vulu okugandja ehala lyomangeshefelo komusita Reverend Helena Kudumo omanga inaa ninga eindilo pambelewa pakulandula omilandu ndhoka dhi li po – mwa kwatelwa okulanda po ehala ndjoka - nonande omuprima Elijah Ngurare a indile ondoolopa yi shi ninge.

Shi ikolela kuNBC, Ngurare okwi indile ondoolopa yi tale komikalo dhilwe nkene tayi vulu okukwatha Kudumo, ngoka ha landitha iikulya yopamuthigululwakalo ashike ke na ehala lyokulandithila. Omuprima okwa ti elelo lyondoolopa nali kale lye mu pa uuyelele sigo omEtiyali kombinga yegandjo lyevi ndika ngele otashi vulika.

Ngurare okwa ti kutya aanangeshefa taya gandja omayakulo ga simana, ngaashi gokulanditha iikulya, oya pumbwa okukwathwa kaanambelewa. Nonande ongawo, eindilo lye olya taambiwa ko nomaiuvo ga yooloka, naasheki otaya pula ngele oshi li paveta, opo evi li gandjwe pakwiiyutha kelombwelo lyomunapolitika – unenenene sho mondoolopa mu na aanangeshefa oyendji aashona noyopokati ye li monkalo ndjoka.

Moonkundathana noshifo shoNamibian Sun ohela, Sindimba okwa koleke kutya elelo lyondoolopa oli ipyakidhila nokuyamukula keindilo lyomuprima ashike okwa dhenge omuthindo kutya oonakuninga omaindilo ayehe oya pumbwa okulandula oompango nomalandulathano ga tulwa po.

“Oveta oya yela. Omuntu kehe a pumbwa evi okwa tegelelwa a ninge eindilo okupitila melelo lyondoolopa, neindilo lye olya pumbwa okupewa eziminino kuminista gwomapendulopo giilando nomikunda,” Sindimba a ti.

Okwa holola kutya omusita Reverend Kudumo okwa ningile nale eindilo lyolukalwa – ndoka a pelwe konima yoomvula mbali ndatu ngashingeyi, ina ninga eindilo lyehala lyokulandithila.

“Ina ninga nale eindilo lyehala lyokungeshefela. Okwa ningile owala eindilo lyolukalwa. Nolyo twa li twa zimine noku li mu pa,” okwa ti.

Kombinga yefekelo kutya omusita otashi vulika a pewe evi oshali molwomapopyo gomuprima, Sindimba okwa ti: “Evi kali shi lyoshali. Ihatu gandja evi nenge tu hiilithe oshali. Naasho omuprima a ningi eindilo ndoka ina tya ita pu futwa sha – eindilo lyowala okutala ngele otashi vulika.”

Sindimba okwa popi wo kombinga yankene oshigwana ihashi uva ko nawa olundji omilandu dha pamba egandjo lyevi nolyomahala.

“Ope na omulandu hagu landulwa. Oto gandja ofooloma yeindilo, tayi longwa mo kaanambelewa, nopo ihe tatu pula eziminino kuminista. Otatu indile kehe ngoka e na ehalo lyokulanda evi li na omayakulo gamuni agehe – ngaashi kolukanda lwoExtension 6 – opo e ye kombelewa yetu. Omayakulo ngaashi omeya, oopate, omayakulo gominino dhomeya gohanya nomalusheno oko ge li nale kolukanda hoka.”

Okwa gwedha po kutya nonande omahala ge na omayakulo gamuni agehe otaga monika, aakalimo yamwe inaya hala nawa okulanda evi, ashike oya hala owala oku li pewa oshali.

“Yamwe oya hala evi ihe inaa ninga omaindilo gevi nande esiku limwe. Otatu ku pe evi ngiini ngele ino ninga eindilo?” okwa pula. “Aantu yamwe inaya hala komahala ngaashi koKahenge, anuwa oya hala owala moNkurenkuru, moka ngaashingeyi omahala ngoka ge na omayakulo agehe gamuni ga pa pwa po.”

Moonkundathana nehangano lyoNBC mOsoondaha, Reverend Kudumo okwa holola uudhigu e na, ta ti oha longo iilonga oyindji - omusita, omwiilongi, omulongi nomunangeshefa – nokwiitula mo natango mokutsakanitha ondjodhi ye yokukala nokakefe haka landitha iikulya yopamuthigululwakalo.

“Otu na omukundu goshimaliwa mondoolopa yetu,” okwa ti. “Ngashingeyi, kandi na ehala lyokulandithila lyandje mwene. Ondjodhi yandje okumona ehala lyokulandithila nokupatulula okakefe kandje haka landitha iikulya yopamuthigululwakalo.”

Pethimbo lyetalelopo lye koNkurenkuru mOsoondaha, Omuprima Ngurare okwa pandula Kudumo molwuunangeshefa we nokwi indile elelo lyondoolopa opo li yambidhidhe aanangeshefa mboka taya kwathele oshigwana.

“Oto kwathele aanamagumbo naakwanezimo yawo noto gandja oompito dhiilonga moshigwana,” okwa ti. “Otatu yambidhidha omusita, inandi hala okumona owala ‘omungome’ [oshikwiila] shika moNkurenkuru ashike onda hala wo shi landithwe nokulandwa kOvenduka.”

Sindimba okwe shi endulula kutya nonande elelo lyondoolopa oli itula mo mokuyambidhidha aanangeshefa yomondoolopa, olya pumbwa okulandula ooveta nomilandu dhi li po.

“Otwi ilongekidha okukwatha aanangeshefa,” okwa ti. “Ashike aantu ayehe naya landule oveta ndjoka yi li po.”