Mayola omukulu a zi mokalungu konima yokutidhwa

Mayola omukulu gwaNiipa Augustus Jafet, ngoka a kuthwa miilonga kongundu tayi pangele yoSwapo konima sho a tokola oku ka kutha ombinga momahogololo gomomwedhi tagu ya ongomuulikwa i ithikamena po, ota ti okwa kala ta mwenekwa nota thiminikwa a vulike nokulandule omatokolo agehe gongundu nonande gamwe oga li itaaga tsu kumwe nOveta yOmalelo gOondoolopa.

Jafet okwa lombwele oshikundaneki shoNamibian Sun mehuliloshiwike kutya okwiidhopa mo kwaaleli yoSwapo okwe mu ningitha a kale itaa longo iilonga ye nawa, oshinima shoka she ku mu thiminika a thige po ongundu.

“Inandi hogolelwa okukala te mono ondjambi ihe okuyakula oshigwana shi hume komeho,” okwa ti. “Nonande ongawo, onda kala tandi yiwa moshipala mokutula miilonga omatokolo gomondjila gehumokomeho lyondoolopa. Onda lombwela ndi landule omilandu dhongundu, nomiikumungu ya pamba Oveta yOmalelo gOndoolopa.”

“Anuwa, shaashi ondi li kokatekete kongundu, ondi na okuvulika nokulandula omatokolo agehe gongundu – nonande ga kale itaga tsu kumwe nooveta. Onkene, inandi vula okulongela aawa yaali poshikando shimwe,” okwa gwedha po. “Embo kehe — Oveta yOmalelo gOndoolopa nEkotampango lyoSwapo — ohaga opalele mpa haga opalele, shampa itaa ga lyatele pevi Ekotampango lyoshilongo, ndjoka olyo lya shiga ko kooveta adhihe.”

A tidhwa molwokwiithikamena po

Omapopyo ge oga landula sho amushanga ndjayi gwoSwapo Sophia Shaningwa a tseyithile omukwatakanithi gwongundu yoSwapo moshitopolwa shaShikoto Armas Amukwiyu opo a kwashilipaleke kutya Jafet ke shi we mayola gwondoolopa yaNiipa, omolwetokolo lye okukala omuulikwa i ithikamena po momahogololo goshikandjohogololo shaNiipa muNovemba.

“Augustus, ngoka i inyolitha opo a kale omuulikwa i ithikamena po moshikandjohogololo Oniipa oku ka kondjithathana nokandidate yoSwapo, okwi itidha ye mwene ongoshilyo shoSwapo shi ikolelela kOkatendo 6 (1) kEkotampango lyongundu yoSwapo,” Shaningwa a nyolele Amukwiyu.

“Okuza mpaka, okwa kuthwa mo mookamunsela dhoSwapo mElelo lyOndoolopa yaNiipa noke na we opoosa momitungilo dhongundu yoSwapo,” okwa gwedha po.





Eipumomumwe molwoonkundathana naakalimo

Jafet, ngoka a li a kuthwa miilonga pakathimbo kongundu yoSwapo konima yokulongela kumwe nookamunsela dhoongundu dhoompilameno opo a hogololwe a ninge mayola, okwa ti okwaauvathana okwa lundu pombanda sho a toto epandja lyokoWhatsApp opo a kale ta kundathana naakalimo kombinga yegandjo lyomayakulo.

“Onda toto epandja lyoshigwana koWhatsApp opo ndi kundathane naakalimo meukililo. Uudhigu owe ya sho ookamunsela yaali ya popilwa uulingilingi, nonda tindi okuhalakanitha po epandja ndika konima sho ya lopota ndje kongundu,” okwa ti.

“Epandja ndjoka kalya li lyoSwapo — olya li lyokukundathana noshigwana. Okuza mpoka, oohailwa yamwe oya tameke okutala ndje ko omuwinayi.”

‘Swapo okwe shi tseya ngiini?’

Jafet okwa pula kutya oshe ende ngiini Swapo a tseye kombinga yokwiinyolitha kwe ongomuulikwa i ithikamena po nomanga esiku ndjoka Okakomisi kOmahogololo ka tula po lyokupititha omusholondondo gwookandidate dhi ithikamena po eti-16 Kotomba inaali thika.

“Nonando ando oshili, Swapo okwe shi tseya ngiini? Omwa hala kutya kaku na iiholekwa nOkakomisi kOmahogololo oko Swapo?” okwa pula.

Nonande a tidhwa mo mongundu, Jafet ota ti natango ye oshilyo oshiinekelwa shongundu tayi pangele.

“Onda zimina etokolo lyawo, ashike natango ondi itula mo moSwapo. Onda wayiminine ongundu kungame mwene nonda longitha omaliko gandje mokutaandeleka omalalakano gongundu,” okwa ti.