Kathindi a uvaneke te eta omalunduluko mOshikoto

Ngoloneya omupe gwoshitopolwa shaShikoto Sacky Kathindi okwa ti kutya otaka tala tango kokupatulula okatomeno kepangelo, okweeta po oompito dhiilonga okupitila mokwiimanga kumwe kwaagundjuka noshowo okulonga iikulya oyendji pethimbo lyelelo lye.Mbika yimwe yomiinenenima ta ka tala kuyo nokwa li e yi totha mo pethimbo lyoshituthi shokutaamba iipatululo pambelewa yombelewa yangoloneya mOmuthiya.Kathindi okwa pingene po Penda Ya Ndakolo, ngoka a wilike oshitopolwa okuza mo 2020.Oshikoto oshi na aakalimo 260 000. Kathindi okwa ti kutya ota ka kambadhala a tule wo miilonga omathaneko ngaashi taga holoka momukandauvaneko gwoSwapo.Okwa dhenge omuthindo kutya okulundulula uunamapya nuuniimuna okupitila mokunkondopeka aanafaalama otaku ka kala shimwe shomiitsa ya simana mombelewa ye.“Otatu ka gandja omakwatho nomayambidhidho gowina kaanafaalama yetu, ngaashi iilongitho nomashina gopashinanena, oombuto oombwanawa noopolohalama dhomadheulo nomalongopukululo,” okwa ti. Oshikwawo, okwa pandula omukwaniilwa gwaNdonga Omukwanilwa Fillemon Shuumba Nangolo sho a gandja evi ndjoka tali longa iikulya kOkashana, opo ku longwe iikulya oyindji.“Onda tseyithilwa koonzo dhi shi okwiinekelwa kutya koofaalama hoka otaku ka za eteyo ewanawa lyomapungu, lyomahangu niikwamboga. Omolwomvula ihayi inekelwa naanaa, aanafaalama oya pumbwa ya lande ominino dhokutekela ndhoka tadhi ya kwathele ya vule okulonga omvula ayihe, nokukondjitha omaupyakadhi hage endele pamwe nomvula ihayi loko naanaa nawa,” okwa ti.“Melelo lyandje otandi ka kwashilipaleka kutya otandi longele kumwe nepangelo tu yambidhidhe aanafaalama mbaka nayalwe moshitopolwa shetu, opo oshitopolwa she tu shi longe iikulya ya gwana muule woomvula ntano dhi li komeho.”Omathaneko gehumokomeho Kathindi okwa holola kutya mOshikoto kamu na okatomeno kepangelo, nokwa dhenge omuthindo kutya ope na ompumbwe yokupatulula okatomeno opo ka gwedhe ongushu koshikondo shonyama. Okwa ti kutya ngele oka patululwa popepi nOmangetti otaka eta po oompito dhiilonga niiyemo oyindji.Oshisimanitsa oshititatu Kathindi ta ka tala kusho osho okuyambula po okupashiyona moshitopolwa.Okwa holola kutya moshitopolwa shaShikoto omo tamu adhika oshikunino shiinamwenyo shEtosha National Park, noshitopolwa ihashi mona naanaa omauwanawa ngaashi ando tashi vulu oku ga mona okuza muuyamba mbuka womevi lyetu. Okupitila mokuhumitha komeho iinyangadhalwa yokupashiyona momidhingoloko dhetu, Kathindi okwa ti, oompito dhiilonga otadhi vulu okuholoka po nokombinga onkwawo aanangeshefa naanongo miilonga yokomake otaya nkondopekwa.Okwa gwedha po kutya okuulika uuyamba nuuthiga wopamuthigululwakalo moshitopolwa, otaku nyanyudha aatalelipo nokukokeka wo eliko lyoshitopolwa.Oshitopolwa osha taalelwa komashongo ngaashi ompumbwe yoopate, enota, nompumbwe yomatungo niikwaniipangitho, Kathindi okwa ti okukandula po omaupyakadhi agehe ngoka otwa pumbwa ekuthombinga lyaayeheyehe.“Otwi itula mo mokuhwepopaleka oshikondo shetu shuundjolowele noshelongo, oshowo mokwoopaleka omatungo getu. Onda zimina kutya omashongo ngaka itaga vulu okukandulwa po mesiku limwe,” okwa gwedha po. "Muukumwe, natu longithe nawa uuyamba (oonkondo) womoshitopolwa shetu, natu yambulii po iitopolwa yetu, nokutunga Oshikoto shoka tashi yambapaleke ayehe nokugandja oompito kaakalimo ayehe.”kenya@nmh-hub.com.na

Kathindi a uvaneke te eta omalunduluko mOshikoto

Comments

Namibian Sun 2025-08-01

Please login to leave a comment

Kathindi a uvaneke te eta omalunduluko mOshikoto

Comments

Namibian Sun 2025-08-01

Please login to leave a comment

Login