Iipongolo yokOkongo otayi ka konakonwa paunongononi kOvenduka

Opolisi yaHangwena oya ti iipongolo mbyoka yi itsuwa mepya kokOkongo otayi ka tumwa kOvenduka oshiwike shika opo yi ka ningilwe omakonakono gopaunongononi.

Nakulwa omukulu nomukalimo gwomOkongo, Nathanael Nikodemus, okwi itsu iipongolo mepya lye konima sho a li ta fulu elambo lyokandjugo momasiku 12 Juli.

Omupevi komufala gwopolisi yaHangwena, Melanie Mburu, okwa lombwele oshikundaneki shoNamibian Sun ohela kutya iipongolo mbyoka otayi ka tumwa kOvenduka opo yi ka konakonwe paunongononi.

Iipongolo mbyoka oya kuthwa mo mepya lyaNikodemus moshiwike sha zi ko nonande opolisi oya kala nokutseyitha kombinga yawo lwiikando oyindji.

Sho a dhengelwa ongodhi mehuliloshiwike, Nikodemus okwa ti opolisi ye ya maandjawo yi kuthe mo iipongolo mbyoka esiku lya landula ndjoka oshikundaneki shoNamibian Sun sha nyanyangidha ehokololo ndika.

“Konima owala yesiku limwe sho wa zi mpa nokukundaneka kombinga ehokololo ndika, opolisi oye ya nokukutha po iipongolo mbyoka,” okwa ti.



Okamba yaakwiita onkulu

Egumbo lyaNikodemus oli li oometa 500 okuza pokamba onkulu yaakwiita mOkongo.

Nikodemus ota fekele kutya iipongolo mbika otashi vulika yekoma, omukwiita gwoSwapo, ngoka a dhipagelwa popepi nokamba yomutondi nokwa fumvikwa komutondi.

“Mokutala kiipongolo mbika nokombila ndjika, nakusa okwa yahwa momutse popepi, oshoka ekolotse olya yonuka nayi,” okwa ti. “Ngele oto tala nawa, mombila omu na iihwa ya fikwa shoka tashi ulike kutya omukwiita okwa yahwa tango, omudhimba tagu umbilwa moshilambo nokufikwa po lwanima.”

Nikodemus okwa holola woo kutya iikutu mbyoka ya adhikwa moshilambo oya faathana niikutu mbyoka ya li hayi zalwa koondume dhomomuthitu (kiikulo) pethimbo lyekondjelomanguluko.

“Iikutu mbika otandi yi dhimbulukwa, oyo kwa li hatu zala pethimbo lyiita yekondjelomanguluko. Mbika iipongolo ya hailwa mekondjo a ka lala nale.” [email protected]