Hengari nomufekelwa omukwawo ya pewa yoN$15 000 kehe gumwe

Konima yokukala mokalimosho oomwedhi dha konda pundatu, Minista omukulu guunamapya Mac Hengari ita lala mo we esiku ekwawo mondjedhililo yomoVenduka (Windhoek Correctional Facility) – oshowo omufekelwa pamwe naye gwoomvula 31. Aalumentu mbaka yaali oya kala mokakuma hela ya tulilwe miipandeko momasiku 26 Apilili moVenduka.

Omufekelwa pamwe naye ita tumbulwa kedhina, oshoka ye omumwayinamati gwomukiintu ngoka a patulile Hengari oshipotha shekwatonkonga.

Oya li ya pewa oomboloha yoN$15 000 kehe gumwe ku Mangestrata Monica Andjaba mEtitano, konima yiiwike iyali yepulakeno lyombooloha ndjoka lya tamekele komusilo gwomwedhi Juli nolya hulu mu4 Auguste konima sho aakalelipo yopaveta yokombinga adhihe mbali ya ti ko sha.

Oya tegelelwa ya galukile kohofa momasiku 15 Auguste ya pangulwe moshipotha shokuya oveta moshipala.



Kape na uumbangi wegandjo lyoombumbo

Aayeti yiihokola otaya ti Hengari nomufekelwa pamwe naye – omumwayinamati gwoshihakanwa shekwatonkonga – oya li taya kambadhala okugandja ombumbo komukiintu nguka opo a kuthe mo oshipotha shoka a tulila mo minista omukulu.

Aayeti yiihokolola otaya ti kutya oshihakanwa osha pewa N$220 200 momasiku 26 Apilili ongombumbo opo shi kuthe mo oshipotha shoka sha patululila Hengari.

Nonande ongawo, omupanguli metokolo lye, okwa holola omalimbililo ge mehokololo lyaayeti yiihokolola kutya oye na uumbangi moshipotha shika, ashike kape na nande uumbangi wa gandja mohofa mboka tau koleke kutya Hengari okwa gandja oombumbo.

Okwa ndhindhilike woo kutya iimaliwa inayi adhika koshihakanwa ashike oya adhika komeho gohauto, poompadhi dhaHengari.

Pethimbo lyepulakeno lyiihokolola yombooloha, Hengari okwa ti kutya iimaliwa oyindjiyindji ndjoka a adhika nayo oya li yoompumbwe dhokofaalama noyokufuta aaniilonga yomofaalama ye.

Hengari okwa ti wo kutya ita ka fadhuka po nande, oshoka oku na ekwatathano lya kola noshigwana ishewe ita ka piyaganeka oombangi nenge i idhope mo momakonakono gopolisi.

Okwa lombwele ompangu kutya okwiitaala kutya okumangwa po kwe okwo oshizemo shokutelwa omwigo.

“Onda mangwa po konima sho nda telwa omwigo,” okwa popi mompangu.



Ota ti ke na ndjo

Hengari okwa ti ke na ondjo moshipotha shokuya oveta moshipala.

Mekwatathano noshipotha shika, Hengari nomufekelwa pamwe naye otaya tamanekelwa okugandja sha nokukuthitha mo oshipotha, shoka sha kwatela mo okukuthitha mo oshipotha shaa li paveta mepingakanitho noshimaliwa.

Omukalelipo gwe gwopaveta okwa ti kutya iipotha mbika oya tungilwa kokafekela nonande kape na uumbangi washa.

Oshipotha shika osha hila nokunana Aaherero ye shi landule, yamwe mboka ya li taya indile opo Hengari a mangululwe, oshoka oyu uvite kuya ke na ondjo.