FNB ta nana aayakulwa oshimaliwa nonande omagumbo gOkongo inaga lala

Euvathanotsokumwe tali limbilike pokati kombaanga yoFNB Namibia, Elelo lyOmukunda gwaKongo nongeshefa yoOLC Properties CC otaku hokololwa lya tula aakalimo oyendji muudhigu ngele tashi ya kiiniwe yawo – otaya futu omikulu dhomagumbo haa mo haya zi oshikwawo otaya futu ishewe ohiila pomahala mpoka haya zi ngashingeyi.Aanamagumbo ya lulilwa, oya hokolola onkalo kutya “kayi shi okwiidhidhimikilwa”, oya yi moonkundathana naNamibian Sun oshiwike shika taya holola okwaauva ombili kwawo.Shi ikolela kaanamagumbo ya gumwa koshikumungu shika, FNB Namibia okwa tameke okunana oshimaliwa shomikuli komayalulilo gawo okuza muDesemba 2024, nonande momagumbo moka hamo haya zi, omagumbo ngoka ga tungwa pehala lyaa na omayakulo gamuni. Oshikumungu shika oshe etitha omaipulo kutya ombaanga oya gandja ngiini omikuli ndhino kaanakontalaka mboka inaya gwanitha po iipumbiwa yokutunga omagumbo.Oveta yetendululo lyevi moNamibia oyi indika okugandja omikuli nelalakano lyokutunga omagumbo, ihe otaga tungwa komalukanda gaa na omayakulo noshowo pwaa na omutungilo gwa tulwa po nogwa ziminwa. Omayakulo ga simana – ngaashi omeya, olusheno noompate – naga kale po.Nicolas Richard, ngoka ta popile ko aanamagumbo omugoyi mboka ya gumwa koshikumungu shika, okwa ti yo otaya nana nondatu painiwe konima sho omunakontalaka, OLC Properties CC, a ndopa okuya tungila omagumbo ge na omayakulo gi ihwa po. Ehangano olya kalelwa po komunambelewa omukuluntu, Megameno Gideon.Omagumbo oga tungwa muSeptemba 2023 moBlock 103, molukanda Okongo Proper. Nonande uuminilo owa fulwa nale, Richard okwa ti kolukanda hoka kaku na omeya nolusheno.“Otwa kala nokukambadhala okukonga omayamukulo kElelo lyOmukunda, kombaanga yoFNB Namibia, kehangano lyoOLC, nokUuministeli wOmapendulopo gIilando nOmikunda – ashike inatu mona omayamukulo taga mbilipalele,” okwa ti.“Naye tu lombwele oshili. Ngele itaye shi ningi, otatu ya fala kombelewa yOmbudsman. Shika itashi vulu okwiidhidhimikilwa. Otwa vulwa okuhepa ngeyi,” Richard a gwedha po.Omagumbo taga kulupaOkwa pula kutya oshe ende ngiini opo ombaanga yi gandje omikuli noonzapo dhomagumbo, nonande yi na ontseyo kutya kolukanda hoka kaku na omayakulo gamuni.“Oshinima sha fa owala to tungu egumbo komukunda – oshinima shoka oombanga dhaa hole. Ohandi zi nomukulukadhi gwandje, aamwandje yatano, nomuniilonga gwetu nokamwana. Oompumbwe odhindji mondjambi yimwe. Omukuli gwandje gwegumbo ogwoshimaliwa shoN$479 720, nohandi futu N$5 750 kehe komwedhi, taku gwedhwa N$2 300 gwaampoka handi hiila ngashingeyi.”Okwa gwedha po: “Hamo hatu zi momagumbo ngoka, ihe ombaanga otayi tu nana iimaliwa yetu. Otashi luluma. Otwa lombwelele kutya otatu ka pewa iipatululo shampa omagumbo ga pu okutungwa – ashike ngashingeyi otatu kanakana.”Etalelepo lyaNamibian Sun koshitopolwa hoka olya holola nkene omagumbo gamwe opo ga tungwa otaga ulike nale ga kulupa, omisa dhi wetike pomiyelo nopomakende oshowo iipeleke hayi loko.“Ombaanga inayi tu nana we oshimaliwa sigo omagumbo getu taga kwatakanithwa komayakulo gamuni,” Richard a ti. “Ngele hasho, naye tu galulile iimaliwa yetu nokulanditha po omagumbo ngaka yoyene.”‘Okwaauvathana’ pokati kelelo nomunakontalaka Omutungagumbo omukwawo, Costa Medusalem, okwa pewa omukuli gwoshimaliwa N$630 000 shegumbo lyomala gatatu gokulala. Ngashingeyi oha futu N$7 250 komukuli gwe, oshowo oohiila yoN$2 000.Mombilive ya nyolwa momasiku 3 Febuluali 2025, omukuluntu gwoshikondo shomikulu dhokutunga omagumbo moFNB Namibia, Susan-Ann Fick, okwa lombwele aayakulwa ye kutya uupyakadhi owu li pokati kelelo nomunakontalaka.“Okwaauvathana okwa tukuka pokati kongeshefa yoOLC Properties nelelo lyOmukunda gwaKongo shi nasha negandjo lyomayakulo. Ongoshizemo, aanamagumbo mbaka itaya vulu lala omagumbo gawo, oshoka inaga kwatakanithwa komayakulo gamuni,” oshikalimo shombilive tashi lesha.Namibian Sun okwa tala keuvathanotsokumwe lya shaininwe momasiku 30 Septemba 2022 kongeshefa yoOLC Properties nElelo lyOmukunda gwaKongo. Euvathano olya li tali ti kutya omunakontalaka natule mo omayakulo momomagumbo noshimaliwa tashi zi mondjato ye mwene. Euvathanotsokumwe olya pula wo OLC a gwedhele oshitaasi sholusheno shaNored sho11kVA nokutunga wo uutaasi uushona wolusheno lwoonkondo oonshona.Inashi enda nawaOmunambelewa omukuluntupithi omukulu gwelelo lyOmukunda gwaKongo, Immanuel Haikali – ngoka a shaina euvathanotsokumwe ndika – okwa ti kutya elelo lyomukunda olya pukithwa komunakontalaka.“Omunakontalaka okwa lundulula omadhiladhilo ge noina tsakanitha we shoka a li e na okutsakanitha. Ashike otwa nyolela kUuministeli wOmapendulopo gIilando nOmikunda tatu kongo omakwatho notatu kongo oshimaliwa opo tu gandje omayakulo ngoka taga pumbiwa.”Haikali okwa ti kutya etseyitho lyoomwedhi ndatu olya pelwe omukontalaka, i iyuthe kulyo, ihe sho omunakontalaka inaa yamukula, euvathano otwe li hulitha po. Omunakontalaka okwa hokolola kutya elelo lyomukunda nali gandje omayakulo – nonande hasho ya li yu uvathana petameko.Okwa gwedha po kutya otendela yokutula mo olusheno oya pitithwa konima yokuza mombelewa muJanuali nuumvo nota ti ominino owala dhomeya gohanya odho dha hupa ko inaadhi pwa, oshoka uuminolo owa fulwa nale.“Olukanda olwa li lwa tulwa omayakulo gamwe po, nomunakontalaka okwa li e na ontseyo yoshinima shika. Oya li ye na okutula mo omayakulo gi ihwa po manga inaya tameka okutunga omagumbo,” Haikali a ti.Iilonga inayi “longwa”Omunambelewa omukuluntu gwomakwatathano moFNB, Kirsty Watermeyer, okwa ti ombaanga oyi li mekwatathano naakuthimbinga ayehe opo yi potokonone omukundu nguka. Okwa fatulula kutya sho omikuli dha gandjwa, anuwa okutulwa mo komayakulo okwa li kwi ipyakidhilwa nako nonzapo yezimino oya li ya gandjwa kelelo.Nonande ongawo, okwa koleke kutya ooyene yomagumbo ohaya nanwa oshimaliwa nonande hamo haya zi momagumbo ngaka. Okwa gwedha po kutya okunanwa okwa lata nomwedhi gumwe netegameno kutya oshikumungu shegandjo lyomayakulo otashi kala sha potokononwa okuthika muDesemba 2024.Gideon okuziilila kongeshefa yoOLC, moonkundathana noshifo shoNamibian Sun, okwa ti kutya oku uvite uukwawo wanankali pamwe nooyene yomagumbo ngaka.“Ombaanga yoFNB oya ningi epuko enene petameko, ya gandja omikuli nonande olukanda kalu na onzapo yokutopolwa kwawo. Omakatasho ngaka oge tu kanithitha oshimaliwa oshindji,” okwa ti.Gideon okwe ekelehi omapopyo kutya olukanda nduka oye lu pewa pambelewa kelelo lyomukunda, okwa ti kutya ongeshefa oya kwathele elelo li mone iiyemo okupitila mokugandja oshimaliwa kaayakulwa yawo ya tunge omagumbo.“Kokutya uunake nongiini omatokolo ga lunduluka, elelo olyo owala tali vulu okuyamukula. Otaya ipopile neuvathanotsokumwe opo yaa longe iilonga yawo,” okwa gwedha po.

FNB ta nana aayakulwa oshimaliwa nonande omagumbo gOkongo inaga lala

Comments

Namibian Sun 2025-05-02

Please login to leave a comment

FNB ta nana aayakulwa oshimaliwa nonande omagumbo gOkongo inaga lala

Comments

Namibian Sun 2025-05-02

Please login to leave a comment

Login