FNB Namibia a gandja N$150 000 kiihakanwa yefundja

Ombaanga yoFNB Namibia mOmaandaha oya gandja oshimaliwa shoodola N$150 000 nelalakano shi kwatha aantu mboka ya dhengwa ya lila kefundja lyonuumvo.

Omagano ngaka, ngoka ga gandjelwa moshitopolwa shaShana, otaga lalakanene okupupaleka omutenge gu li komapepe gaantu mboka ya tembuka momagumbo gawo molwefundja noshowo mboka omaliko gawo ga hanagulwa po kefundja noonkalamwenyo nuuhupilo wawo wa ndjungandjungwa konkalo ndjoka.

Meenindjela gwombaanga yoFNB pashitopolwa Abongile Mpikwa okwa ti ekwatho ndika otali holola uukwawo wankali mboka ombaanga yu uvite pamwe niihakanwa yefundja noshimaliwa shika otashi ka longithwa mokulanda iikulya, oothewa noonete dhoomwe.

Mpikwa okwa gwedha po kutya oshimaliwa shika otashi ka topolelwa iitopolwa itatu Oshana, Omusati nOhangwena shi thike pamwe, oshitopolwa kehe otashi ka pewa N$50 000.

“Iiponga yopaushitwe oyo yimwe yomoonkalo dhomeshito dhi nyanyalitha nodhi lulumika hadhi vulu okutalela po omuntu. Iiponga mbika ohayi ya ombaadhilila ihayi londodha omuntu, onkene ohayi piyaganeka aantu nayi, aantu ohaya tembuka mo momagumbo gawo. Iiponga mbika ohayi yonagula nayi nohashi pula oshilongo ethimbo ele opo shi shune konkalo onkulu manga oshiponga inaashi ya,” okwa ti.

Okwa holola kutya oshigwana shokonooli yoshilongo, ohashi yelulwa kefundja omathimbo nomathimbo. Mpikwa okwa dhenge omuthindo kutya efundja aluhe ohali monitha aantu iihuna, iihakanwa yefundja yimwe ohayi thigwa pomutenya oshoka omagumbo nomaliko gawo ohaga hanagulwa po noshowo omahupilo gawo.

Omashongo ogendji

Oshimaliwa shika osha gandjwa kombaanga palongelokumwe noombelewa dhoongoloneya yiitopolwa mbyoka.

Ngoloneya gwoshitopolwa shaShana Elia Irimari okwa pandula ombaanga yoFNB Namibia kekwatho ndjoka tali hupitha oshigwana molwaashoka aantu oyendji natango otaya mono iihuna kuuwinayi nokiilanduli yefundja edhigu.

“Ekwatho ndika olye ya pethimbo kiihakanwa oyindji yefundja mbyoka ya dhengwa ya lila, uunene tuu mbyoka ya tapatekwa lela kiiponga yopaushitwe mbyoka tayi etwa kelunduluko lyonkalo yombepo noshowo aantu mboka omahupilo gawo gaa li nawa molwefundja,” Ngoloneya a ti.

"Inatu pewa owala iikulya ihe otwa pewa woo etumwalaka ewanawa lyuukwawowanakali, lyontalateni nolyetegameno,” okwa gwedha po.

Okwa kombo kombunda ombaanga ndjika sho aluhe hayi kambadhala okukwatha nokushuna mo sha moshigwana, hamokukwatha owala aanangeshefa ihe nopakusimaneka uuntu womuntu nokukwatela po uukalinawa wAanamibia ayehe.

Irimari okwa ti omagano ngaka otaga ka "talaleka oomwenyo dhiihakanwa oyindji yefundja, sho tayi dhimbulukithwa kutya oshigwana oshi li pamwe nayo muudhigu wawo."

- [email protected]